Ads by Google Ads by Google

Tala o Faamasinoga

FAAMAONIA MOLIAGA O LE TALIA O OLOA GAOI FAASAGA IA KERUPI URIMA

O se alii e 21 tausaga le matua lea na ulua’i tuuaia e le malo i moliaga mamafa e tolu e aofia ai le talepe fale i le tulaga muamua, gaoi ma lona taliaina o ni oloa sa ave faagaoi e ni isi tagata, ua talia e le faamasinoga lana tali ioe i le moliaga o lona talia o ni oloa sa avea faagaoi, i lalo o se maliliega ua latou sainia ma le malo ma fofogaina ai i luma o le faamasinoga i le taeao ananafi.

I le tali ioe ai o le alii o Kerupi Urima, na ia ta’utino ai e faapea, i le va o le aso 8 ma le aso 9 o Me, 2012 i Amerika Samoa, na ia taliaina ai ni oloa mai ia Ioane Faimata. Ma sa ia iloa lelei o nei oloa na gaoi mai e Faamata mai le Bell Mart Store.

Ina ua fesiligia e le alii faamasino sili ia Michael Kruse po o a oloa sa tuu atu e Faimata ia te ia, na tali Urima, o pepa sikaleti ma le $100.

O lo o taofia pea Urima i le toese i Tafuna e faatali ai le aso 22 Fepuari lea ua faatulaga e lau ai lona faasalaga.

APERAAMO LEVI MA ALATISE FONOTI

O le aso 12 o Aokuso ua faatulagaina ai faamasinoga autu mo Aperaamo Levi ma Alatise Fonoti, lea na o la pelogia ni tagata e silia ma le to’a 20 e faapea, o laua o FBI ma o la faatonuina nei tagata e faia ni galuega e aunoa ma le totogia o i latou.

Ae o le a faafoeina le la mataupu e Lyle L. Richmond ona o se tasi o tagata o lo o aafia i lenei mataupu, e aiga i le alii faamasino sili ia Michael Kruse.

I se iloiloga sa faia i le masina o Tesema 2012, na faailoa ai e le malo i le faamasinoga e faapea, pau le vaega o lo o totoe o lo o manaomia e le malo e faamaea, o le tuu faatasia lea o tupe o lo o nofo aitalafu ai Levi ma Fonoti i tagata na aafia, a mae’a, ona tuuina atu loa lea o se ofa mo i laua nei, peitai ina ua toe valaauina lenei mataupu i le vaiaso nei, sa talosagaina ai e le itu tete’e le tuuina atu o le mataupu e faataunuu sona faamasinoga iloilo.

O Levi ma Fonoti o lo o tuuaia i moliaga o le gaoi ma o lo o taofia pea i la’ua i le toese i le taimi nei e faataunuu ai lo la faamasinoga autu.

FAATALI SE FAAIUGA A LE FAAMASINOGA I LE TALOSAGA A POLONE SAVEA

Ua taoto atu nei i se faaiuga a le Faamasinoga Maualuga le talosaga na faaulu e le loia a le alii o Polone Savea, mo le tatalaina o ia i tua mai le toese e faatali ai taualumaga o lana faamasinoga, ina ua maea ona ia tuuina atu ni taavale se tolu e faamau ai le tatalaina o ia i tua.

Na teena e le faamasinoga le ulua’i talosaga a Savea i le vaiaso na te’a nei, ma poloaina ai e le alii faamasino sili ia Michael Kruse le loia a le ua molia o Michael White ina ia toe tuuina atu se isi talosaga i le faamasinoga.

I le taeao ananafi ina ua toe valaau le mataupu a Savea, na faailoa ai e lana loia e faapea, e tolu taavale ua maea ona faamauina e tatala ai le ua molia i tua, e tusa lo latou tau aofa’i ma le $40,625.

E $30,000 le tupe atoa na poloaina e le faamasinoga e totogi, ona faatoa mafai lea ona tatala Savea i tua, tusa lea e ta’i $15,000 i le mataupu e tasi mai mataupu tau solitulafono e lua o lo o tuuaia ai o ia e le malo, ona o le faalavelave e aofia ai lona tuuina atu o ni ID pepelo i ni tamaitai mai Asia se toalua e lei leva ona taunuu mai i le atunuu i le tausaga na te’a nei.

SAUNI PAGOTA NA SOSOLA E TALI IOE I O LA MOLIAGA

O alii pagota e toalua ia o lo o tuuaia i le sosola ese i tua mai le toese ao taofia ai mo le tuliina o a la faasalaga faafalepuipui, ua la sauni e tali ioe i tuuaiga a le malo i le vaiaso fou.

O ananafi na faatulaga ai le uluai iloiloga a i laua nei e toalua, peitai ina ua valaauina le la mataupu, sa faailoa ai loa e la loia i le faamasinoga e faapea, ua sauni Derek Ropati ma PouniuLiu e tali ioe i la moliaga.

O le aso 24 Ianuari lea ua faamoemoe e toe tutulai ai i laua nei i luma o le faamasinoga, ma o lo o taofia pea i laua i le toese i le taimi nei.