IOE MALAEOLA FOLASA Jr NA TAUMAFAI E SUSUNU LE PAMU KESI I UTULEI

O le vaiaso na tea nei na tali ioe ai le alii 34 tausaga, o Malaeola Folasa Jr i le moliaga o le taumafai e susunu le pamu kesi a le Morris Scanlan i Utulei, ia Setema 27, 2012, i lalo o se maliliega sa latou sainia ma le malo ma talia e le faamasinoga.

Ua talosaga ai loa le malo e solofua le moliaga o le faatupu vevesi i nofoaga faitele.

Ua ta’usala ai nei Folasa e le faamasinoga, ma sa ia taua, e faalua ona ia taumafai e tuu le gutu o le fagaau e utu ai penisini o taavale i se afi penisini sa ia uuina o lo o mumu, ma toe lava o nai inisi pa’i le gutu o le fagaau i le afi penisini o lo o mumu, ae o atu loa tama faigaluega o le pamu kesi ma taumafai e aveese le gutu o le fagaau mai lona lima, ao le’i oo i le taimi e tulai mai ai se faalavelave matuia.

O lo o taofia pea Folasa i le toese i Tafuna e faatali ai le aso 8 o Fepuari lea ua faatulaga e lau ai lona faasalaga.

FAAAOGA LE TATALA PA’U E SASA AI LE ULU PERESITENE PTA SAMOANA

O le alii lea na ia faaaogaina se tatala pa’u e faaoo ai manu’a i le Peresetene o le Asosi a Matua ma Faiaoga, a le aoga maualuga a Samoana, ua ia tausala e le faamasinoga i le solitulafono o le faaoolima i le tulaga lua, ina ua talia se maliliega sa ia sainia ma le malo i le vaiaso na tea nei.

I le tali ioe ai o le alii o Taumaloto Aiava, 40 tausaga i le moliaga o le faaoolima i le tulaga lua, na ia tautino ai i le Faamasinoga Maualuga e faapea, i se taimi o le aso 31 Novema 2012 i Utulei, sa ia taina ai le ulu o le na aafia i se u’amea tatala pa’u peitai sa misi, o lea na ia faaaoga ai loa le pito maai o le tatala pa’u ma tutui ai foliga o le na aafia ma manu’a ai.

Na talosaga le malo e solofua le moliaga o le faatupu vevesi i nofoaga faitele.

I se vaega o le maliliega a le ua molia ma le malo, ua malie ai le ua molia na te totogiina le $126 i le alii na aafia, mo le pili o le falema’i i le taimi na taofia ai o ia ona o manu’a na aafia ai.

Ua manatu loia e faatali le tuuina atu o ni a laua faafinauga mo se faasalaga, sei maea ona la faitau i se ripoti a le Ofisa Nofovaavaaia, peitai ua malamalama Aiavå, tusa lava pe finau loia i le faamasinoga mo se faasalaga mama mo ia, e pule le faamasinoga pe talia pe teena ia faafinauga.

Ua ia malamalama foi, e le mafai ona toe suia lana tali ioe ua tuuina atu i le faamasinoga, pe afai e tuu mai lana faasalaga ae le tusa ai ma lona mana’o.

O lo o taofia pea Aiavå i le toese i Tafuna i le taimi nei e faatali ai le aso 8 Fepuari lea ua faatulaga e lau ai lona faasalaga.

TETE’E SEILA LADY NAOMI TUUAIGA FAASGA IA TE IA

Na teena e le alii Seila o le vaa a le Lady Naomi tuuaiga a le malo faasaga ia te ia, ina ua tulai i luma o le Faamasinoga Maualuga i le taeao ananafi.

I le teena ai e le alii o Feagaiga Siilata o tuuaiga faasaga ia te ia, ua faatulaga ai loa lana ulua’i iloiloga e faia lea i le aso 28 Fepuari.

O le alii o Feagaiga Siilata o lo o tuuaia i moliaga o le faiaiga lea ma se teineititi e laititi i lalo o le tulafono; tagofia o itutinosa o se tama’ita’i; faia o uiga mataga faafeusuaiga, atoa ai ma le faia o ni gaioiga e ono lamatia ai le saogalemu o fanau laiti.

O tuuaiga faasaga ia Siilata na afua mai i le taimi na malaga mai ai le vaa o le Lady Naomi mai Apia i Amerika Samoa nei i le aso 27 Tesema 2012, lea e faapea na aafia ai se tama’ita’i e 15 tausaga le matua, sa malaga faatasi mai ma lona tina i luga o le vaa.

I faamaumauga a le faamasinoga o lo o taua ai e faapea, o le tama’ita’i na aafia na alu atu e faasavili i le isi itu o le vaa, ina ua faalogo ua tau aafia o ia i le ma’i vasa, ae tula’i mai ai loa le faalavelave e pei ona molia ai le Seila o le va’a.

O lo o taofia pea Siilata i le toese i Tafuna e faatali ai le aso lea ua faamoemoe e toe tulai ai i luma o le faamasinoga.