Ads by Google Ads by Google

Tala o Faamasinoga

JIN HUA TONG SULLIVAN

O le tina mai Asia lea o lo o tuuaia faatasi ma se alii mai le Ofisa o Femalagaaiga, i le mataupu e faatatau i ID pepelo, ua faatulaga lana ulua’i iloiloga e faia i le aso 19 o Fepuari, ina ua ia teena le moliaga e tasi o lo o tuuaia ai o ia e le malo i le vaiaso na te’a nei.

O le Aso Faraile na tea nei na tulai ai Jin Hua Tong Sullivan i luma o le Faamasinoga Maualuga.

O lo o tuuaia Sullivan i le moliaga mamafa e tasi, o lona totogi tupe o se tagata faigaluega a le malo ina ia faia ni faiga faaalatua. O lea molia Sullivan i lona tuuina o le $200 ia Polone Savea o le Ofisa o Femalagaaiga, mo le pu’eina o ID mo ni tamaitai mai Saina se toalua na taunuu mai i le atunuu i le 2011.

O lo o tumau pea poloaiga a le faamasinoga o lo o tatala ai Sullivan i tua, e faatali ai le aso lea ua faamoemoe e toe tulai ai i luma o le Faamasinoga.

O le tamaitai loia ia Kimberly Hyde o lo o tulai mo le malo, ae o le alii loia ia Fiti Sunia o lo o avea ma loia fautua a Sullivan.

SAUNI PAEA LATU E TALI IOE I ONA MOLIAGA

Ua saunia nei le alii o Paea Latu, lea o loo tuuaia i le molaiga mamafa e tasi o le faaoolima i le tulaga, moliaga mama e lua o le faaleagaina o meatotino a seisi tagata i le tulaga lua ma le faia o ni gaioga e ono lamatia ai le saogalemu o fanau, e tali ioe i nei tu’ua’iga.

O Latu o lo o tuuaia i lona so’aina faalua o le taavale sa i ai i totonu se fafine, o lana tama ma le tama a lana tama e 3 tausaga le matua.

Na faailoa e le loia a Latu o Leslie Cardin i luma o le Faamasinoga Maualuga i le vaiaso na tea nei e faapea, ua maea ona tuuina atu e le malo sa latou ofa mo Latu, ma ua sauni foi le ua molia na te taliaina lea ofa.

O le aso 20 o Ianuari lea ua faamoemoe e fofoga aloaia ai le maliliega lea ua sauni Latu na te sainia ma le malo, ma faamuta ai loa lana mataupu.

O tuuaiga faasaga ia Latu na afua mai i le faalavelave lea na tulai mai i Faleniu i le aso 15 Aokuso 2012, ina ua le fiafia le ua molia le tama a le fafine na aafia, ma alu atu ai loa ma taumafai e tu’i le fafine ao nonofo i totonu o le taavale le fafine ma lana tama ma lona grand daughter.

Ina ua maea, sa oso le lua molia i lana taavale ma so’a faalua ai itu e lua o le taavale a le fafine na aafia ao i ai i totonu ma lana fanau, ma o lea gaioiga na mafua fefefe ai le fafine na aafia ma lana fanau, e pei ona o latou faailoa i leoleo.

O lo o tumau pea poloaiga a le faamasinoga o lo o tatala ai Latu i tua, e faatali ai le aso lea ua faatulaga e toe tulai ai i luma o le faamasinoga.

FAATONU SE TOEAINA 60 TAUSAGA E AUA LE TOE INU PIA

O se tama matua e 60 tausaga le matua mai Nuuuli lea na ‘ona atu ma faavevesi si olomatua ma si ana fanau, atoa ai ma lona lu’iina solo o tamaiti o aiga latou te tuaoi, ua faatonu e le alii faamasino o John Ward II e aua ne’i ona toe tagofia le ava malosi, pe toe taumafai e faatupu se vevesi i le va o ia ma lona aiga po o na tuaoi, ina ua tulai i luma o le faamasinoga faaitumalo i le vaiaso na tea nei.

Na teena e le ua moliaga le moliaga o le faatupu vevesi i nofoaga faitele ma lona aiga, ma ua toe tolopo lana mataupu e toe fofogaina i le faaiuga o le masina nei.

O tuuaiga faasaga i le ua molia, na afua mai ina ua vili e lona toalua le ofisa o leoleo mo se fesoasoani, ina ua fiu e tau faamoe le ua molia, ae ua le mafai le fia fusu i tamaiti o le isi aiga tuaoi, e aunoa ma se mafuaaga tatau.

Na taua e le tina o le aiga i leoleo e faapea, na te’i ina ua ‘ona atu lona toalua i le fale ma amata ona faamisamisa i tamaiti o le isi aiga latou te tuaoi, e aunoa ma se mafuaaga, ae ina ua taumafai e ave i le fale e faamoe, sa ita ma palauvale, atoa ai ma le tauai solo o mea aoga i totonu o le fale, e aofia ai le latou pusa aisa.

E le o se taimi muamua lea ua faia ai e le toeina matua lea ia ituaiga uiga, o le ‘ona atu ma fia ulavale solo i o latou aiga tuaoi.