TOE MOLIA STERLIN FUGA

O le Aso Tofi na te’a nei na toe taofia ai e leoleo le alii o Sterlin Fuga mai Leone, ona o tuuaiga i lona faia o ni gaioiga e save’u ai le nonofo filemu o tagata.

I faamaumauga a le faamasinoga sa taua ai e faapea, o le uso o matua o Fuga na faafesootaia le Ofisa o Leoleo mo se fesoasoani, ina ua amata ona faatupu vevesi Fuga, ma i’u ai i lona alu ma faatutu taavale o lo o feoai i luga o le auala ae palauvale i ave taavale.

Na teena e Fuga tuuaiga o le faatupu vevesi i nofoaga faitele ina ua tulai i luma o le Faamasinoga Faaitumalo i le Aso Faraile na te’a nei, na toe tatala ai o ia i tua e faatali ai le aso Tofi o le vaiaso nei i le itula e 2:00 i le aoauli, lea ua faatulaga e toe fofogaina ai lana mataupu.

Sa toe fautuaina malosi e le alii faamasino o John Ward II ia Fuga ina ia tausi le filemu i totonu o lona aiga, ma aua nei ona toe solia se isi tulafono a le malo.

O le Aso Gafua na te’a nei na faatoa tatala ai i tua Fuga mai le falepuipui i Tafuna, talu mai le taimi le aso  3 Novema lea na taofia ai o ia, ona o tuuaiga i lona faia lea o ni gaioiga na oo ai le fefe i se tamaitai sa la nonofo faatasi mai i luga o le nofoa o se pasi sa la malaga faatasi mai ai mai Leone i le aso 3 Novema.

Ina ua tatala e le alii faamasino Fuga i le aso Gafua na te’a nei, sa fautuaina o ia e aua nei ona toe soliina se isi tulafono a le malo, peitai o le aso Tofi na toe taofia mai ai ona o tuuaiga i lona save’uina lea o le nonofo filemu i totonu o lona aiga ma tagata lautele.

TETE’E JEFFREY FUAMATU TUUAIGA MALO

O le vaiaso na tea nei na faila ai e le malo le moliaga faaopoopo faasaga ia Jeffrey Fuamatu, lea foi na ia teena ina ua tulai i luma o le Faamasinoga Faaitumalo.

Ua molia nei e le malo ia Fuamatu i le moliaga faaopoopo o le faaoolima i le tulaga tolu, e faaopoopo i le moliaga muamua o le faatupu vevesi i nofoaga faitele, e afua mai i le faalavelave lea na taofia mai ai o ia ma ni isi se toatolu o lona aiga i le amataga o le masina nei mai Faleniu, ina ua latou faia ni gaioiga e save’u ai le nonofo filemu o ni isi tagata.

O le aso Faraile na te’a nei na fuafua le malo e tatau ona faila ai moliaga faasaga ia Fuamatu, ma isi e toatolu o lona aiga e aofia ai Lufilufi Peneueta, Perekini Peneueta ma Mikaele Tauasosi, peitai ina ua valaau lenei mataupu, sa talosaga ai le loia fautua o lo o tulai mo i latou uma nei e toe tolopo le mataupu i se isi lua vaiaso.

O lo o tuuaia uma Lufilufi, o lona toalua o Perekini ma lona tuagane o Mikaele i le moliaga o le faatupu vevesi i nofoaga faitele.

O le aso 28 Tesema lea ua faatulaga e toe fofogaina ai lenei mataupu i luma o le faamasinoga, ma o lo o tumau pea poloaiga o lo o tatala ai Fuamatu ma isi o lona aiga, e aofia ai le faasa lea ona o latou toe oo i le fanua ma le fale o le aiga lea na tulai mai ai le vevesi, pe toe taumafai foi e faafesootai le aiga i se isi auala.

O le vevesi na mafua mai ina ua agai atu Lufilufi Peneueta ma lona aiga e momoli se tusi e faatula’i ese ai le aiga na aafia mai le fanua, ae avea ma itu na logo ai e le aiga le ofisa o leoleo ma taofia ai loa i latou nei e toafa.

SASA LE ULU O SE ALII I LE SAMALA

O le alii lea na ia sasaina foliga o le isi alii i se samala, ua faamoemoe le malo e tatau ona o latou failaina i le vaiaso nei moliaga faaopoopo faasaga i lenei mataupu.

O le vaiaso na te’a nei na tulai mai ai lenei faalavelave i Tafuna, ina ua tulai mai se feeseeseaiga i le va o le alii ua molia ma le ua manu’a, ma faaaoga ai loa e le ua molia le samala e ta ai foliga o le alii na manu’a.

I ni ripoti na taua ai, o le mata agavale o le alii na aafia na tau ai le samala ma manu’a tigaina ai o ia, ma faanatinati atu ai o ia i le falemai mo togafitiga, ae taofia le alii na faatinoina le solitulafono i le toese i Tafuna.

O le taeao nei lea ua faamoemoe le malo e tatau ona latou faialina ai moliaga faaopoopo faasaga i lenei mataupu.

FAUTUAINA SE ALII FAI FAIVA I LANA AMIO

O le alii faifaiva lea na ia togiina se vaa fagota i se fagupia i le vaiaso na te’a nei, ua fautuaina o ia e le alii faamasino o John Ward II ina ia aua nei ona toe faia se isi gaioiga, e ono save’u ai le nonofo filemu o isi alii fai faiva i luga o le vaa fagota na tulai mai ai le vevesi, a ia tumau pea ona nofo i luga o le vaa fagota lea o lo o fagota ai, ae sei faagasolo taualumaga o lana mataupu.

O se vevesi na tulai mai i le po o le aso Tofi na te’a nei, na faaiu i le togi ai e le ua molia o se fagupia agai i le isi vaa fagota sa taula ai ai le uafu o vaa faila, le Marina i Malaloa, ma taofia ai loa o ia i le toese i le po lea, e faatali ai le taimi e tulai ai i luma o le faamasinoga faaitumalo il e aso Faraile na tea nei.

Na teena e le ua molia le moliaga o le faatupu vevesi i nofoaga faitele, ma ua faatulaga ai loa le isi ana iloiloga e faia lea i le faaiuga o le vaiaso nei.