Ads by Google Ads by Google

Tala o Faamasinoga

TETE’E LE ALII O LO O TUUAIA I LE MA’ITAGA O LONA TAUSOGA

Na teena e le alii 21 tausaga le matua, lea o lo o tuuaia i le ma’itaga o lona tausoga e 14 tausaga le matua, moliaga faasaga ia te ia, ina ua tulai i luma o le Faamasinoga Maualuga i le taeao ananafi ma ua faatulaga ai lona uluai iloiloga e faia i le aso 10 o Ianuari 2013.

I faamaumauga o lo o taua ai le amata tulai mai o lenei faalavelave i le masina o Iuni seia oo mai ia Aokuso na te’a nei, ina ua faia se mafutaga faaleulugalii i le va o le alii ua molia ma le tamaitai o lo o aafia, ma i’u ina ma’itaga ai lea tamaitai.

O lo o tuuaia le ua molia i moliaga mamafa e lua o le faiaiga ma se teineititi e laititi i lalo o le tulafono atoa ai ma le faia o feusuaiga mataga, faapea ai ma le moliaga mama o lona faia o ni gaioiga e ono lamatia ai le saogalemu o fanau laiti.

O lo o taofia pea i le toese le ua molia i le toese i Tafuna e faatalitali ai le aso lea ua faatulaga e toe fofogaina ai lana mataupu.

TATALA I TUA IA VILI ONEY

Ua tatala i tua mai le toese i Tafuna le alii o Vili Oney, ina ua talia e le Faamasinoga Maualuga sana talosaga na faaulu e lana loia o Sharron Rancourt, mo le vave tatalaina o ia i tua ina ua maea ona ia totogi lana salatupe e $3,000.

O le afioga i le alii faamasino sili lagolago ia Lyle L. Richmond ma le alii faamasino lagolago ia Mamea Sala Jr na iloiloina le talosaga a Oney ma tuuina mai ai le la faaiuga i le aso ananafi, ina ua talitonu alii faamasino, ua usitaia e le ua molia se tasi o tuutuuga o lana nofovaavaaia, o le vave totogi lea o lana salatupe e $3,000 ona faaitiitia ai loa lea o lana faasalaga faafalepuipui i le 6 masina.

O Oney na faasala e le faamasinoga i le toese mo le tausaga atoa, o se tasi lea o tuutuuga o lana nofovaavaaia e 5 tausaga, ina ua tausala o ia i le solitulafono o le umia faasolitulafono o vaega o le laau faasaina o le mariuana.

I le taimi na lau ai le faasalaga a Oney, na ioeina ai e alii faamasino faamatalaga uma e uiga ia te ia, o ia o se alii e lelei i le aoga ma faamaoni, ae na amata i ai suiga i lona olaga ina ua faauu mai i le aoga ma amata loa ona faauo atu i isi tamaiti amio le taupulea.

Ua fautuaina e le faamasinoga le ua molia ina ia tumau pea lona usitaia o tuutuuga uma o lana nofovaavaaia sa tuuina atu i le aso na lau ai lana faasalaga.

TULAI LE TINA NA IA SASAINA LANA TAMA LUMA FAAMASINOGA MAUALUGA

O le tina talavou lea o lo o tuuaia i lona sauaina o lana tama e 4 tausaga le matua, e ala i lona sasaina o ona lima i se seevae, na tulai i luma o le Faamasinoga Maualuga i le taeao ananafi ma teena le moliaga mamafa e tasi o lo o tuuaia ai o ia.

I lona teena ai o tuuaiga a le malo, ua faatulaga ai loa lana uluai iloiloga e faia lea i le masina fou, lea ua faamoemoe e tatau ona oo atu i le aso taimi lea, ua manino se tulaga o le a taoto ai le latou mataupu ma le malo, i le faia lea o se maliliega poo le tuuina atu loa o le mataupu e faataunuu se aso e faia ai lana faamasinoga autu.

O lenei mataupu na tofu atu i le ofisa o leoleo ina ua sola ese mai le alualutoto na aafia mai lo latou fale ina ua maea ona sasa e le ua molia, o lona tina lea, ma agai atu i luga o le auala, ma iloa ai e ni isi o ia ma latou viliina ai loa lona grandmother (o le tina lea o le tama o le alualutoto na aafia), ma auina atu ai loa lenei alualutoto i le fale o lona grandmother, ma iloa ai unaoa i lona tino atoa, ma logo ai loa leoleo mo se fesoasoani.

Ina ua fesiligia e leoleo le ua molia, sa ia ioeina ai lona faaaogaina o ona lima ma se seevae e sasa ai le tino o lana tama.