TUUAIA NI ALII SE TOAFA MAI ALAO FAATUPU VEVESI

E toafa ni alii na taofia mai e leoleo i le faaiuga o le vaiaso na te’a nei mai le afioaga o Alao, ona o tuuaiga i le faatupu vevesi i totonu o le nuu, tagofia o le ava malosi i nofoaga faasaina, faapea ai ma le isi o lo o tuuaia i le inupia ae le’i atoa le 21 tausaga le matua.

O ni tagata o le nuu na logoina leoleo i lenei faalavelave i le po o le Aso Toona’i, ina ua faalogoina uiga le mafaufau o Loreto Alailesulu, Taualii Mulifa’i ma alii e toalua e ta’i 19 tausaga, e pei o le faaumuumu ma le faamisa.

I faamaumauga a le faamasinoga o lo o taua ai e faapea, na taumafai leoleo e faafilemu Loreto ma ave i totonu o le taavale, ae faalavelave atu ai Taualii i galuega a leoleo o lo o fai. Sa fautuaina e leoleo ia Taualii e aua le faalavelave i a latou galuega, peitai sa faaauau pea ona faalavelave Taualii ao taumafai leoleo e loka Loreto, ma i’u i le loka ai ma Taualii.

O Taualii o lo o tuuaia i le moliaga o le faalavelave i galuega a leoleo, o alii laiti e toalua o lo o tuuaia i le faatupu vevesi i nofoaga faitele ma le faaoolima i le tulaga tolu, a’o Loreto o lo o tuuaia i le faatupu vevesi i nofoaga faitele.

Ua toe tatalaina nei i tua i latou uma nei e faatali ai le aso lea ua faatulaga e toe fofogaina ai a latou mataupu i luma o le faamasinoga.

TOLOPO LE FOFOGAINA O LE MALILIEAGA A AARON WISDOM

O le aso 7 o Ianuari 2013 lea ua faatulaga e fofogaina ai le maliliega aufaatasi ua maea ona saini e Aaron Wisdom ma le malo, ina ua le mafai ona faataunuuina ananafi ona o lo o malaga i Apia le alii faamasino sili ia Michael Kruse.

I le valaau ai o lenei mataupu i luma o le alii faamasino le tumau ia Elvis P. Patea, e le gata ua toe faatulaga ai e Patea le aso e fofoga aloaia ai le maliliega aufaatasi a Wisdom ma le malo, ae ua faaleaoga ai foi ma le faamasinoga autu o lenei mataupu lea sa faamoemoe e faia i le vaiaso fou.

O lo o tuuaia e le malo ia Wisdom i moliaga o le umia faasolitulafono o fualaau faasaina. O ia moliaga na afua mai i le taimi na sue ai e alii Ofisa o le Tiute se container e 20 futu na aumai i le vaa oloa i le aso 13 Ianuari 2012, ma latou maua ai ni vaega o le laau o le mariuana ma latou logoina ai loa le Vaega o le Vice and Narcotics a le Ofisa o Leoleo mo sa latou suesuega.

O lo o tuuaia foi le maua ai o ni pusa o lo o i ai pulufana faapea ai ma ni fana se tolu sa i ai i totonu o le container.

O isi mea na maua e aofia ai mea e faaaoga e ula ai le pauta oona o le aisa, faapea ai ma mea e fesootai ma le totoina o mariuana, aemaise ai o se api ma tusiata e faatatau i auala e toto ma faaola ai le mariuana.

O Wisdom o se alii e malaga mai i San Diego, o lo o tatala i tua ina ua ia totogi le $20,000 sa faatulaga e le faamasinoga.

SAUNI NESIASI LATU TALI IOE ONA MOLIAGA

O le alii mai Tonga lea o lo o tuuaia i lona gaoiina lea o le ato a se fafine mai Asia sa i ai le lata i le $15,000 i totonu, ua toe tolopo lana mataupu i le aso 7 Ianuari 2013 ma le faamoemoe o loia, e tatau ona oo atu i le aso lea ua maea ona faila i luma o le faamasinoga le maliliega a le malo ma le ua molia, ma sauni ai loa o ia e tali ioe i tuuaiga a le malo.

O le taeao ananafi na toe valaau ai le mataupu a le alii o Nesiasi Latu i luma o le alii faamasino le tumau ia Elvis P. Patea, lea o lo o sui tulaga i le afioga i le faamasino sili ia Michael Kruse o lo o livi, ma faailoa ai loa e loia i le faamasinoga le tulaga ua i ai talanoaga mo se maliliega o lo o faia i le taimi nei i le va o Latu ma le malo.

Na talia e le alii faamasino talosaga a loia e toe tolopo le mataupu, ma faatulaga ai loa le isi iloiloga i le masina fou.

O le ato a le fafine sa i totonu o lana taavale, lea na tuu i totonu o le taavale, ae o ma lona toalua ua fai le misa ma le isi alii mai Asia i totonu o le fale a lea alii, peitai ina ua toe foi ane si fafine i lana taavale, e le gata ua gasu solo totonu ae ua ave e le tagata lana ato tupe sa i ai.

Na faailoa e le tina lea i leoleo, e tusa ma le $15,000 le tinoitupe sa i totonu o lana ato. Na faailoa e molimau i leoleo le tufatufa atu e Latu o ni tupe ia i latou ma lana faaupuga, o tupe e faatau ai ni a latou pia.

O lo o taofia pea Latu i le toese i Tafuna e faatali ai le aso lea ua faatulaga e toe tulai ai i luma o le faamasinoga.

O afioga i alii faamasino lagolago ia Logoai Siaki ma Faamausili Faasua Poumele sa lagolagosua i le alii faamasino ia Patea i le iloiloina o lenei mataupu.