Ads by Google Ads by Google

Tala o Faamasinoga

TUUAIA I LE FASIGA O LANA TAMA TEINE 4 TAUSAGA

O le Aso Lulu na te’a nei na loka ai e leoleo se tina talavou mai Leone, ina ua ia fasia slana tama teine e 4 tausaga le matua ma manu’a tigaina ai lenei alualutoto, e pei ona taua i faamaumauga a le faamasinoga.

E le o mafai ona faalauiloa le suafa o le tina ua molia, ona o puipuiga i lalo o le tulafono i mataupu e aafia ai fanau iti.

O le taeao ananafi na tulai ai le ua molia i luma o le Faamasinoga Faaitumalo, ma ia teena ai le moliaga o le faatupu vevesi ma le faaoolima.

O le tina matua a le alualutoto na ia logoina le Ofisa o Leoleo i Tafuna e uiga i lenei mataupu.

I faamaumauga a le faamasinoga o lo o taua ai e faapea, ina ua uma ona tupu le faalavelave, na savali ese mai ai le teineititi na aafia mai lo latou fale ae agai atu i le nofoaga o lo o i ai se pamu kesi i Leone.

Na iloa e ni isi sa i ai i le pamu kesi le savali atu na o le teineititi i luga o le alatele, ma o latou telefoni ai loa i le tina matua o le teineititi.  Na alu atu le tuagane o le tina matua ma piki le teineititi ma ave i le fale, o iina na iloa ai e le tina matua manu’a o lo o i vaega eseese o le tino o lenei alualutoto, ma ia logoina ai le ofisa o leoleo.

Ina ua fesiligia e leoleo le ua molia i le mafuaaga o le faalavelave sa ia taua ai e faapea, ona ua leaga uma ai ni isi o pepa aoga ina ua masaa ai i luga le lotion ma le fagu faamanogi sa taalo ai.

Na ioe le tina sa ia faaaoga ona lima e sasa ai lana tama faapea ai ma le seevae.

LOKA INA UA FAAOOLIMA PERESETENE PTA SAMOANA

O le alii lea o lo o tuuaia i lona faaoolima i le peresetene o le PTA a le aoga maualuga a Samoana, ua molia nei i le  faaoolima i le tulaga lua faapea ai ma le faatupu vevesi i nofoaga faitele, ma o lo o taofia pea o ia i le toese i Tafuna i le taimi nei seia ona totogia le $10,000 ona e tatala ai i tua.

Ua faamoemoe o le vaiaso fou e toe fofogaina ai le mataupu a Taumaloto Aiava.

O le faalavelave na tulai mai i le vaiaso na te’a nei ina ua alu atu le peresetene o le PTA a Samoana e piki mai lona afafine o lo o i ai i aoga volipolo a le aoga, ae tulai mai ai loa le faalavelave.

Na faamatala e Niuuinitone Tamalii i leoleo e faapea, ao paka lana taavale i tafatafa o le ulu e faafesaga’i ma potu aoga i totonu o le lotoa, na te’i ina ua alu atu le ua molia ma fai atu ia te ia, po o ia lea sa valaau i lana uo teine.

Na taua e Tamalii lona le malamalama i le mea sa talanoa atu ai le ua molia ia te ia, ma ia faailoa i ai e faapea, o ia o le peresetene o le PTA a Samoana, o ia foi na alu atu e piki mai lona afafine o lo o i ai i aoga volipolo a lana au, a’o le taimi lea o lo o uu e le ua molia se u’amea tatala pa’u taavale.

Na faateia Tamalii ina ua ta e le ua molia lona ulu peitai sa misi ae tau le u’amea i lana taavale, ona faaaoga lea e le ua molia o le pito o le u’amea tatala pa’u e soso’a ai foliga o Tamali’i.

Afai ae mafai ona tatala Aiava i tua mai le toese, ua poloaina o ia e le faamasinoga ina ia aua nei ona toe taumafai e faafesootai Tamalii, po o ni isi foi o lona aiga, a ia tausi i tulafono ma auai i taimi uma e valaau ai lana mataupu.

MOLIA LE ALII TALEPE FALE AMIO VALEA

O le alii amio valea lea na ia sasae le uaea faamalama o le potu sa moe ai se tamaitai talavou ma ulufale faamalosi i totonu ma taoto telenoa i luga o le tamaitai na aafia, ua molia nei e le malo i le moliaga mamafa o le talepe fale i le tulaga muamua ma moliaga mama e lua o le faaleaga meatotino i le tulaga tolu ma le faaoolima i le tulaga tolu.

O le taeao ananafi na faatoa faila ai e le malo moliaga faaopoopo faasaga ia Toma Lisi, ma ua taofia nei o ia i le toese i Tafuna sei vagana ua totogi le $30,000 ona faatoa mafai ona tatala o ia i tua mai le falepuipui.

Afai ae mafai ona tatala Lisi i tua, ua poloaina o ia e le faamasinoga ina ia aua nei toe taumafai e faafesootai le tamaitai na aafia poo lona aiga i soo se auala, pe toe latalata i ai i lo latou fale.