Ads by Google Ads by Google

Tala o Faamasinoga

TETE’E JOVIAN TOLOA I TUUAIGA A LE MALO

Na teena e le alii o Jovian Toloa moliaga faasaga ia te ia, ina ua tulai i luma o le Faamasinoga Maualuga i le taeao ananafi, ma ua faatulaga ai loa lona uluai iloiloga i le masina fou.

O lo o tuuaia e le malo Toloa i le  faaoolima i le tulaga lua, faatupu vevesi i nofoaga faitele, ma lona faia o ni gaioiga e ono lamatia ai le sogalemu o se fanau.

O moliaga ua tuuaia ai Toloa na afua mai i se faalavelave na o latou fasia ai ma isi alii se Samaria Agalelei na alu atu e momoli atu se tama’ita’i e masani ai, a’o i ai ma si ona afafine e 5 tausaga le matua i totonu o le taavale.

O lo o tuuaia e le malo Toloa i lona faaaogaina o se paipa e sasa ai le alii na aafia, ma gau ese ai le isi ona nifo (tulou) atoa ai ma le unaoa o ona foliga.

O lo o taofia pea Toloa i le toese i Tafuna ina ua le mafai ona ia totogi le $10,000 ua faatulaga e tatala ai o ia i tua.

TOFU FA’AMASINOGA MAUALUGA MATAUPU ALI’I TUUAIA FASIGA LONA TOALUA

O le tama lea ua tuuaia e le malo i le fasiga o si ona toalua i le lua tausaga talu ai, ua tofu atu nei i luma o le Faamasinoga Maualuga lana mataupu, e pei ona tulai ai o ia i le taeao ananafi ma ia teena tuuaiga faasaga ia te ia.

O lo o molia o ia i le  faaoolima i le tulaga lua, atoa ai ma le faatupu vevesi i nofoaga faitele.

E le o mafai ona faalauiloa le suafa o lenei alii ona o puipuiga i lalo o le tulafono mo le tina, ae ua faamoemoe o le aso 11 o Ianuari 2013 e faia ai le ulua’i iloiloga o lenei mataupu.

O le faalavelave lenei na tulai mai i le masina o Me 2010 ae o lea faatoa faila e le malo moliaga faasaga i le tamaloa i le vaiaso na te’a nei.

O le vevesi i le va o le ulugalii na amata mai ina ua fo’i mai le fafine mai sana tafaoga i le po o le Aso Toonai, 15 o Me, 2010, ma i’u ina fasi ai si fafine e pei ona taua i faamaumauga a le faamasinoga.

Na amata i taugaupu le vevesi a le ulugalii, sosoo ai loa ma le tuliga na aga’i i le sami, ma toe faai’u mai ai i totonu o le fale, lea na faaaoga ai loa e le tamaloa le uaea o le ili e alu i leu ila e sasa ai si ona toalua, ma leaga uma ai vae, lima ma isi vaega o le tino o le fafine.

O si tama’i avanoa na maua e le fafine, na oso ai i le faamalama o le latou fale ma sulu i le fale o lona aunty mo se fesoasoani.  Na faamatala e le aunty i leoleo, lona lagona o se tagata o valaau atu i lona igoa, o lea na tamo’e ai i fafo o lona fale e vaai po o ai, ae te’i i le oo atu i fafo, o lo o taatia telenoa mai si ona tei i luga o le malae ae o lo o tu ai le ua molia i ona luga, ae o le taimi foi lea na ia faalogo atu ai o lo o alaga mai si ona tei, “ ta fia ola.”

O lo o tumau pea tuutuuga o lo o tatala ai le ua molia i tua, ao faagasolo ai taualumaga o lona faamasinoga.

MANA’O TITO MALAE FA’ATAUNU’U SONA FA’AMASINOGA ILOILO

Ua talia e le Faamasinoga Maualuga le fanoga a le alii o Tito Malae, lea na tauala atu i lana loia fautua o Marcellus Talaimalo Uiagalele, mo le tuuina atu o lana mataupu e faataunuu sana faamasinoga autu (jury trial).

O le aso 9 o Iulai 2013 lea ua faatulaga e faataunuu ai le faamasinoga iloilo o lenei mataupu.

O lo o tuuaia Malae i le moliaga mamafa o le faaoolima i le tulaga lua, ma le moliaga mama o le faatupu vevesi i nofoaga faitele, ona o se faalavelave na tulai mai i Iliili i ni masina ua tuana’i atu, lea o lo o tuuaia ai o ia i lona faaaogaina o se ma’a e faaoo ai manu’a i le alii na aafia.

O lea vevesi na amata mai i se taugaupu a Malae ma le alii na aafia e mafua i le fanua.

Fai mai faamaumauga a le malo, e faatolu ona tu’i e Malae le ulu o le alii na aafia i le ma’a, ma mafua ai ona manaomia filo e 12 e su’i ai lea manu’a.

O lo o tete’e malosi Malae i tuuaiga a le malo, ma o lo o tumau pea poloaiga o lo o tatala ai o ia i tua ina ua ia totogi le $5,000 sa faatulaga e le faamasinoga, e faatalitali ai le aso o lona faamasinoga autu.