Ads by Google Ads by Google

Tala o Faamasinoga

MOLIA SE PAGOTA I LE SOLA ESE MAI LE TOESE

Ua toe molia nei le alii pagota o Derek Ropati lea sa tuli lona faasalaga ina ua ta’usala i le faaoo o le oti o lona ‘uncle’, ina ua sola mai i le toese i le tausaga ua tuanai.

O le moliaga fou o Ropati, e mafai ona faasala ai se tasi i le toese mo le umi e le silia ma le 5 tausaga, pe faasala foi i le salatupe e le silia i le $5,000, po o le faasalaga uma e lua.

E tusa ai ma faamaumauga a le faamasinoga o lo o taua ai e faapea, o le aso 13 o Aperila 2011 na logo ai e leoleo o le falepuipui Vaega o Leoleo Suesue, ona o se alii pagota ua sola ese mai le toese, i le taimi o faigalotu a pagota.

Sa maua atu e Leoleo Su’esu’e ia Ropati i le fale o lona tuafafine,.

Na fa’aalia e Ropati, na mafua ona sola i le fale o lona tuafafine, ona o le leaga o meaai o lo o fafaga ai pagota i le falepuipui.

O le taeao ananafi na tulai ai Ropati i luma o le Faamasinoga Maualuga mo lana uluai iloiloga, ma ia teena ai le moliaga e tasi ua faia faasaga ia te ia.

O le aso 13 o Ianuari 2013 lea ua faatulaga e faia ai le ulua’i iloiloga o le mataupu a Ropati, ma o lo o taofia pea o ia i le toese i Tafuna.

LOKENI NUUSOLIA

O le aso 25 o Ianuari 2013 lea ua faatulaga e lau ai le faasalaga a le alii o Lokeni Nuusolia, ina ua ia ioeina le moliaga mama o lona talia o ni oloa sa ave faagaoi e ni isi tagata.  O lea moliaga e mafai ona faasala ai o ia i le toese mo le umi e le sili atu i le tausaga, pe faasala foi i se salatupe e le sili atu i le $1,000, po o faasalaga uma e lua.

I le tali ioe ai o Nuusolia i le moliaga lea ua toe teuteu e le malo, na ia tautino ai i luma o le faamasinoga e faapea, o ia na fesoasoani i alii e toatolu, o Sefo, Time ma Saifoloi, e nana le pusa tupe u’amea i lona fale, lea na gaoia mai e le au alii ia e toatolu mai i se faleoloa.

Ua malie le ua molia o le a ia molimau ma le faamaoni mo le itu a le malo, i taimi e faia ai faamasinoga autu a Sefo, Time ma Saifoloi.

O lo o tumau pea poloaiga o lo o tatala ai Nuusolia i tua e faatali ai le aso e lau ai lona faasalaga.

HYMIE SEFO

O le aso 25 o Iuni, 2013 ua faatulaga e faia ai le faamasinoga autu o Hymie Sefo, ina ua leai se faaiuga a le Faamasinoga Maualuga e tuuina atu i le latou maliliega lea na sainia ma le malo i le aso ananafi.

O Sefo o lo o tuuaia e le malo i le  talepeina ma ni isi alii, le faleoloa o le FJ & P Kruse i le 2009 ma gaoia ni oloa sa aofia ai ma se pusa tupe u’amea.  E le gata i lea, o lo o molia foi Sefo i lona taliaina o se laptop sa gaoia e se isi alii mai le Ofisa o le Aoga Maualuga a Leone i le amataga o le tausaga nei.

I le mataupu na tulai mai i le 2009, o lo o tuuaia Sefo i moliaga mamafa e lua, o le talepe fale i le tulaga muamua ma le gaoi, ae i le mataupu lea e aafia ai le Aoga Maualuga a Leone, o lo o tuuaia ai o ia i le moliaga mamafa e tasi, o lona taliaina o ni oloa sa gaoi e se tagata.

Ina ua fesiligia e le faamasinoga le itu a le malo i le mafuaaga ua manatu e solofua ai moliaga pito sili ona mamafa o lo o tuuaia ai Sefo, ae tali ioe i le moliaga feololo, na taua ai e le loia a le malo o Cecilia Reyna e faapea, talu ai ua malaga uma i fafo molimau e toatolu sa fuafua e molimau mo le malo i le ulua’i mataupu o lo o tuuaia ai Sefo, ua manatu ai le malo e solofua ulua’i moliaga faasaga ia te ia, ae tali ioe i le moliaga o lo o i le mataupu lona lua.

E lei umi se taimi na iloilo ai e le alii faamasino sili lagolago ia Lyle L. Richmond ma le alii faamasino lagolago ia Mamea Sala Jr se faaiuga i lenei mataupu, ae o la faaiuina loa ina ia faatulaga le aso 25 Iuni 2013 e faia ai le faamasinoga autu a Sefo mo mataupu uma lua o lo o tuuaia ai o ia, ina ia mafai ai e le malo ona aami ana molimau mo lenei mataupu.

O lo o taofia pea Sefo i le toese i Tafuna ina ua le mafai ona ia totogi le tupe sa faatulaga e tatala ai o ia, e faatali ai le aso lea ua faamoemoe e faataunuu ai lana faamasinoga autu.