Ads by Google Ads by Google

Tala o Faamasinoga

SASA FOLIGA O SE TAMAITAI I LE FAGUPIA

O le alii lea na ia sasaina foliga o se tamaitai i se fagupia ona o se Losalio, ua faatonu e le faamasinoga ina ia faatoese i le tamaitai na aafia, ma ia auai i ni aoaoga faapitoa e faatonutonu ai aafiaga o le ava malosi, ma aoga mo le faatonutonuina o le loto ita.

E 20 masina lea ua faasala ai e le Faamasinoga Maualuga le alii o Mareko Malaefono Lemafa i le toese i Tafuna, ina ua faamaonia le moliaga o le faaoolima, o se tuutuuga lea o lana nofovaavaaia e 5 tausaga mai le faamasinoga.

Na faatoese le ua molia i le faamasinoga e tusa ai o le solitulafono sa ia faia, sa ia faatoese foi i lona aiga, o lana ekalesia aemaise o le tamaitai na aafia.

Na taua e le loia a Lemafa o Michael White e faapea, o lenei alii, o se tupulaga e le aoga i ai le ava malosi, pe a fuafua i le faalavelave na tulai mai. Na talosaga le alii loia i le faamasinoga ina ia faanofovaavaaia le ua molia, peitai fai mai le loia a le malo o Cecilia Reyna, e pule lava le faamasinoga i lana faaiuga e tuu mai mo le ua molia.

E ui i le matuia o le gaioiga na faia e le ua molia, peitai o le itu taua na faafetaia e le faamasinoga, e lei matuia tele manu’a na aafia ai le tamaitai na aafia, sei vagana ai lava lona nifo na gau ina ua tau ai le fagu.

E 5 tausaga na manatu le faamasinoga e faasala ai le ua molia, peitai ua faamalumalu le faataunuuina o lea faasalaga, ae ua faanofovaavaaia o ia mo le 5 tausaga i lalo o poloaiga a le faamasinoga.

O ni isi o ia poloaiga e aofia ai le faasa ona ia toe tagofia le ava malosi, faatoese i le tamaitai na aafia, ma ia auai i aoaoga e fesoasoani ai i aafiaga o le ava malosi, atoa ai aoga faufautua e taofiofi ai le televave o le ita.

MU MATUU

O le alii lea o lo o tuuaia i lona aafia lea i le talepeina ma le gaoiina o le faleaoga a le aoga maualuga a Leone i le amataga o le tausaga nei, ua faatulaga lana faamasinoga autu e faia lea i le aso 6 o Me o le tausaga fou.

O Mu Matuu lea o lo o taofia pea i le toese i Tafuna i le taimi nei, o lo o tuuaia i moliaga o le talepe fale i le tulaga muamua, gaoi faapea ai ma moliaga e lua o lona taliaina lea o ni oloa sa ave faagaoi e ni isi tagata.

O ia moliaga na afua mai i le faalavelave lea na tulai mai i le aso 12 Ianuari 2012 i Leone, ina ua osofaia e ni tagata le ofisa o le aoga maualuga a Leone ae gaoi ni masini laptop sa i totonu. Fai mai le malo, o Matuu le isi na aafia ai i le gaioiga lea.

Ina ua fofogaina le mataupu a Matuu i le aso Faraile na te’a nei, na faailoa ai e lana loia o Michael White i le faamasinoga, ua leai lava se maliliega ua mafai ona taunuu i ai le malo ma le ua molia, ma ua manaomia ai le tuuina atu loa o lenei mataupu e faataunuu sona faamasinoga autu.

TOLOPO MATAUPU A MIGO MISA MA NEMAIA POAMO

O alii e toalua ia o lo o tuuaia i le maliu ai o le alii o Sio Faumui, poo Chico e pei ona iloa ai e le toatele, ua toe tolopo le fofogaina o le latou maliliega lea ua maea ona sainia ma le malo, ina ua faatonu e le alii faamasino loia e tausisi ma amanaia le faatonuga sa tuuina atu e le faamasinoga i le masina o Aperila o le tausaga nei.

O lea poloaiga o lo o talosaga ai le faamasinoga i loia ina ia faamanino atu le mafuaaga ua pau maualalo ai le moliaga lea ua sauni alii nei e tali ioe i ai.

O Migo Misa ma Nemaia Poamo, o lo o tuuaia faatasi ma Sefo Siaulaiga poo Raponi Siaulaiga i le moliaga o le fasioti tagata i le tulaga lua, ona o le maliu o Chico i le masina o Iuni o le tausaga na te’a nei, peitai ua faailoa e loia a Misa ma Poamo i le faamasinoga, ua maea ona sainia e i laua e toalua sa latou maliliega ma le malo ma ua sauni foi loia e faalauiloa lea maliliega.

Saunoa le alii faamasino sili lagolago ia Lyle L. Richmond, e tatau ona tuuina atu se ripoti e faailoa atu ai le mafuaaga tonu na maliu ai Chico, peitai na faailoa e le loia a le malo o Mitzie Jessop, o lo o ia te ia le kopi o le ripoti e uiga i le taotoga lea sa faia e suesue ai le mafuaaga o le maliu o lenei alii.

Ua toe taofia Misa ma Poamo i le toese e faatali ai le aso lea o le a fofogaina ai la latou maliliega i luma o le faamasinoga.