IOE MARK FAIPAUA NA IA GAOIA OLOA MAI LE TOOL SHOP

O le aso 21 o Tesema lea ua faatulaga e lau ai le faasalaga a le alii o Mark Faipaua, ina ua ia tautino i luma o le Faamasinoga Maualuga lona osofaia o le Tool Shop i Tafuna ma gaoi ni oloa sa i totonu e aofia ai ma se tupe.

Ua fa’amaonia e Faipaua, i le aso 16 o Iulai 2009, sa ia talepeina ai le Tool Shop i Tafuna ma ia gaoia ai se laptop, o se ‘DVD player’, o le tinoitupe e $1,100.

FAATULAGA FAAMASINOGA AUTU O VAIMALU LAMETA

O le aso 29 o Aperila 2013 ua faatulaga e le Faamasinoga Maualuga e faataunuu ai le faamasinoga autu o le alii o Vaimalu Lameta lea o lo o tuuaia i le moliaga o le faaoolima i le tulaga lua, na afua mai i le faalavelave na tulai mai i le aso 30 o Iulai 2012 i Pago Pago, lea o lo o tuuaia ai o ia i lona tu’ia o se alii i le taimi o le latou taaloga pasiketipolo.

Na faailoa e le alii na aafia i leoleo e faapea, sa fai atu le ua molia o lo o fia talanoa ia te ia, peitai na te’i ina ua tu’i e le ua molia ona foliga.

O lo o taofia pea Lameta i le toese i Tafuna ina ua le mafai ona ia totogia le $10,000 sa faatulaga e tatala ai o ia i tua.

SUESUE CID MATAUPU FAASAGA I LEOLEO

Ua suesueina nei e le Vaega o Leoleo Suesue a le Ofisa o Leoleo isi faamatalaga fou, e faatatau i isi foi pagota na tatala i tua e o e faatau.

O lea tulaga na faailoa e le alii leoleo suesue o Det. Poutoa Iamanu Jr ina ua molimau mo le itu a le malo, i le ulua’i iloiloga o le mataupu faasaga i leoleo e toalua o le toese, lea o lo o tuuaia i lo la tatala lea i tua o pagota e o e faatau.

Na taua e Det. Iamanu e faapea, o le isi inugapia a pagota ma se leoleo sa faia ina ua maea le galuega i le isi aso, lea na faataga ai e leoleo pagota e faatau mai ni a latou pia mai tupe a pagota.

O Det. Iamanu Jr na molimau i le uluai iloiloga a Rocky Tua ma Fiti Aina i luma o le alii faamasino o John Ward II, lea sa iloilo ai pe lava ni mau e lagolagoina ai sa soli se tulafono, ae poo i laua foi ua aafia o lo o tuuaia i le solia o le tulafono.

Na tetee Tua ma Aina i o la moliaga ina ua tutulai i luma o le faamasinoga maualuga i le vaiaso na tea nei, ma ua faatulaga le isi a laua iloiloga i le aso 17 Tesema.

IOE JULIANO TAVALE O LONA FAATAMALA UA MALIU AI LONA ATALII

Na tautino le tama talavou o Juliano Tavale i luma o le Faamasinoga Maualuga i le vaiaso nei e faapea, o lona faatamala na mafua ai ona maliu si ona atalii o Uliama Tavale, ina ua na le fusia o lona fusipa’u, faapea ai ma lona le auina atu o ia i le falemai mo ni togafitiga ina ua manu’a o ia i le faalavelave.

O Uliama e tasi le tausaga le matua, sa malaga ma lona tama o Juliano i le taavale i le aso 25 o Iulai 2010, ma tulai mai ai loa se faalavelave lea na manu’a ai lona ulu ma i’u ina maliu ai i le aso na soso’o ai.

Na tuuaia e le malo Juliano i moliaga e lua o le fasioti tagata pa’ivalea ma le ave taavale faatautala ua mafua ai ona oo le maliu i se tagata, peitai i lalo o se maliliega sa sainia e Tavale ma le malo ma talia e le faamasinoga, sa tali ioe ai le ua molia i le moliaga na toe teuteu e le malo o le faatamala faaletulafono ua mafua ai ona oo le maliu i lona atalii.

E lua matafaioi maioio na faailoa e le alii faamasino sili ia Tavale ina ua fesiligia o ia e uiga i lenei mataupu.