Tala o Faamasinoga
ILALIO FALANI
O se fa’alavelave na tula’i mai i Laulii i le vaiaso ua mavae, ua tu’uaia ai nei le alii o Ilalio Falani i le umia o se aupega.
I faamaumauga a le faamasinoga o lo o taua ai e faapea, ao i ai le alii leoleo suesue o Det. Ioane Paselio i luma o le faleoloa o le JS Mart i Laulii, sa ia faalogoina ai se pao tele, ma ona vaaia ni “fireworks” i luga o le ea, na toe lagona e le alii leoleo seisi pa’o, sa ia masalomia o se fana sa faapa e se tagata.
E fetaui le taamilo atu o Det. Paselio i tua o le faleoloa, ae ona vaaia le agai mai o Falani mai i le togavao i tua o lona fale.
Na faafiti Falani, ina ua suesueina e le leoleo. Na lagona e le alii leoleo le manogi pia o Falani. Na fiu le alii leoleo e suesue Falani ma le alii na la inu pia faatasi, ae fa’afiti lava, e la te le’i lagona ni pao. O le fesili o le alii leoleo i le toalua o Falani, sa mafai ai loa ona manino le mataupu.
I lana sailiga na maua ai e le alii leoleo se fana sa nana i lalo o fasi apa i tafatafa o le vaega sa inupia ai Falani. Na fesiligia e le leoleo ia le toalua o Falani po o ai e ana le fana, na tali le fafine, o Falani.
Ua taofia nei e leoleo le fana ina ua faamaonia i a latou suesuega, e le gata e le o leistalaina le fana, ae o le ituaiga fana foi lea e le faatagaina i le teritori.
E lima moliaga mama e fesootai i le umia ma le faaaoga faasolitulafono o se aupega ua tuuaia ai e le malo le ua molia.
FALEPUIPUI NATASHA UIA MO LE 6 MASIN
E 6 masina lea ua faa falepuipui ai e le Faamasinoga Maualuga le tamaitai o Natasha Uia, ina ua nofosala o ia i le solitulafono o le faaoolima i le tulaga lua, ona o le faalavelave lea na ia sasaina ai le ulu o le isi tamaitai i se fagupia ma manu’a ai.
O isi moliaga na tuuaia ai e le malo Uia e pei o le faatupu vevesi i nofoaga faitele ma le inupia ae lei atoa le 21 tausaga, na solofua ina ua talia e le faamasinoga le maliliega na saini e Uia ma le malo.
Ao lei tuuina atu le faasalaga a le faamasinoga, na faatoese Uia e tusa ai o le solitulafono sa ia faia, lea ua mafua ai ona taofia o ia i le toese. Sa ia faatoese foi i lona aiga faatasi ai ma lana talosaga i le faamasinoga, ina ia tuu atu se isi avanoa sei toe faaleleia ai lona olaga.
Na talia e le faamasinoga le talosaga a le ua molia atoa ai ma faafinauga a loia, ma poloaina ai loa Uia e tuli masina e 6 i le toese i Tafuna, o se tasi lea o tuutuuga o lana faanofovaavaaia e 5 tausaga.
Ua poloaina foi o ia na te totogia le $230 i le tamaitai na aafia, mo lana pili i le falemai.
Saunoa le alii faamasino sili lagolago o Lyle L. Richmond, e leai se manatu o le faamasinoga e taofia Uia i le toese mo se taimi umi.
O le alii loia ia Cabel Poag na tulai mo le malo, ae o le alii loia fautua o Michael White na tulai mo Uia i lenei mataupu.