Ads by Google Ads by Google

Tala o Faamasinoga

BRIAN THOMPSON

E le’i faataunuuina le faamasinoga autu a le alii o Brian Thompson lea sa faatulaga e faia i luma o le Faamasinoga Maualuga i le Aso Lua na te’a nei, ina ua faila e itu e lua se maliliega ua maea na o latou sainia i luma o le faamasinoga e faaiuina ai lenei mataupu.

I totonu o le maliliega lea na sainia e Thompson ma le malo, lea foi ua talia e le faamasinoga, ua ioe ai Thompson i le moliaga mama lea ua toe sui e le malo o le fa’ao’olima i le tulaga tolu. O Thompson na uluai tu’ua’ia e le malo i le moli’aga mamafa o le faia o ni uiga mataga fa’afeusua’iga i le tulaga muamua.

O lea moliaga na afua mai i se faalavelave na tulai mai i le fale o le ua molia, lea na tuuaia ai o ia e le malo i lona tago lea i se tamaitai ina ua mae’a se pati sa faia i lona fale i le tausaga na te’a nei.

O le aso 20 Ianuari 2012 lea ua faatulaga e fofogaina ai le fa’asalaga a le fa’amasinoga maualuga fa’asaga i le ua molia, lea o lo o tatalaina pea i tua i lalo o poloaiga mai le faamasinoga.

TOALUA FAANOFOVAAVAAIA VEVESI NA TULAI MAI AOGA SAMOANA

Mai le toafa na tuuaia e le malo i le faalavelave lea na tulai mai i le Aoga Maualuga a Samoana i le masina o Fepuari o le tausaga nei, o le toalua o i latou nei ua maea ona la ioeina  moliaga o le faatupu vevesi i nofoaga faitele, o le isi toatasi ua solofua e le faamasinoga le moliaga faasaga ia te ia, ae o le isi toatasi ua maea ona faatulaga e le faamasinoga le aso e fofogaina ai lona faamasinoga autu.

O i latou sa tuuaia e le malo i lenei mataupu, o alo uma o le afioga i le Komesina o Leoleo, lea e aofia ai Blanche ma Deevon Tua, lea ua maea ona la ioeina moliaga mama o le faatupuvevesi i nofoaga faitele.

O le isi toalua e aofia ai Sandra Herrera Sopoaga lea ua solofua e le faamasinoga le moliaga o le faatupu vevesi sa tuuaia ai o ia, ma Sandra Herrera lea foi o loo tuuai i le moliaga mama o le faatupu vevesi i nofoaga faitele, lea ua faatulaga lana faamasinoga autu e faia i le tausaga fou.

Na faailoa e Blanche i luma o le faamasinoga, o tamaitai aoga ia na aafia i le vevesi lea na mafua ai ona faila e le malo moliaga faasaga ia i laua ma lana tama, o nisi o lona auaiga. Sa ia faailoa i le faamasinoga lona taumafai e faatino ona tiute faamatua i lea aso, ina ua tulai mai le vevesi i le va o fanau aoga nei, ona o lona manatu e aoao ia te i latou se lesona, peitai na saunoa le alii faamasino o John Ward II, o nisi foi taimi e mafai ai ona avea matua ma faiaoga, latou te aoao mea lelei i fanau.

Saunoa Ward, e sili ai ona televave le pu’e a fanau i gaioiga e faia e matua nai lo mea latou te aoaoina ai i latou.

“E manaomia foi ona tatou aoao fanau ina ia tausi le filemu, ma aua nei o latou toe faatupuina ni vevesi i totonu o aoga, ona ua maitauina le faatupulaia o faafitauli e tauai ai e fanau aoga pasi aoga i taimi o taavale,”  o le saunoa lea a Ward.

E 6 masina lea ua faanofovaavaaia ai Blanche ma Deevon i lalo o poloaiga a le faamasinoga e ao ona la usitai i ai.

O nisi o ia poloaiga e aofia ai lo la auai lea i ni aoaoga faa faufautua e fesoasoani i le foia o le ita, aua nei o la toe soli se tulafono, ma ia asiasi i le Ofisa Faanofovaavaaia i masina taitasi mo le mataituina lea o tulaga uma o le la faanofovaavaaia.

Ua poloaina foi e le faamasinoga i laua ua molia la te totogiina salatupe tai $50.

FAATULAGA ULUAI ILOILOGA O TAMAITAI E TOAFA

O tamaitai e toafa ia o loo taofia i le toese i Tafuna, ona o tuuaiga i lo latou faaoolima lea i se isi tamaitai i Fatu ma Futi i le Aso Faafetai na te’a nei, ua faatulaga le latou uluai iloiloga e faia lea i le aso Faraile o le vaiaso nei, lea o le a iloilo ai e le faamasinoga molimau a le malo, pe faamaonia sa soli se tulafono, ae poo i latou foi o loo taofia i le toese o loo tuuaia i le soliina lea o le tulafono.

Afai ae faamaonia e le faamasinoga tulaga e pei ona taua mai molimau a le malo, ona tuuina atu loa lea o lenei mataupu i luma o le faamasinoga maualuga e faaauau ai iloiloga o a latou mataupu.

O le mataupu faasaga ia Serrah Mauga, Evelyn Mauga, Le’alai Mauga ma Simaima Mila na toe fofogaina i luma o le alii faamasino o John Ward II i le aso Lua na tea nei, mo le tofiaina lea o ni loia e tulai mo le isi toalua o i latou o loo molia, ma tofia ai loa le alii loia ia Fiti Sunia e tulai mo Serrah, ae o le tamaitai loia o Jennifer Joneson e tulai mo Evelyn.

O i latou nei e toafa o loo tuuaia i le moliaga o le faaoolima i le tulaga muamua, taofia faapagota o se tagata, atoa ai ma le faatupu vevesi i nofoaga faitele, ona o le faalavelave lea na tulai mai i Fatu ma Futi i le Aso Faafetai, lea o loo tuuaia ai i latou i lo latou faaoolima lea i se tamaitai sa auau ma nisi o lona aiga i le sami.

E tai $18,000 lea ua faatulaga e le faamasinoga e totogi ona faatoa mafai lea ona tatala i latou nei e toafa i tua mai le toese.