MOLIA VAIMAGALO I LE SOLA MAI LE TOESE

Na fa’aalia e se alii pagota na sola mai i le toese i le 2010, i ni isi o molimau a le malo, na mafua ona ia sola, ona o sona faamoemoega e fasiotia le alii faamasino sili ia Michael Kruse, ina ua toe faaopoopo ni isi tausaga i lona fa’asalaga faafalepuipui.

Ae peitai, ina ua fesiligia o ia e leoleo i le mafuaaga na sola ai, sa ia tali, na faatonuina o ia e se alii e igoa ia Romeo Peretania, o se tasi na fa’apagota muamua, e alu atu i le vaega o loo faigaluega ai e aumai sana tupe, ma e talitonu o ia o se mea sa fuafuaina e Peretania ina ia maua ai o ia.

O le taeao ananafi na tulai ai Lorenzo Vaimagalo i luma o le Faamasinoga Faaitumalo, ona o le mataupu fou e pei ona tuuaia ai o ia, ma ua toe taofia nei o ia i le toese i Tafuna e aunoa ma se tupe ua faatulaga e tatala ai, e faatali ai le Aso Tofi lea ua faamoemoe e toe valaau ai lana mataupu.

E sola Vaimagalo mai i le falepuipui, ae o lo o tuli sona faasalaga e 12 tausaga, i ni isi foi moliaga ua ta’usala ai.

I faamaumauga a le faamasinoga o lo o taua ai e faapea, ia Iulai 16, 2010, na telefoni ai Vaimagalo ia Peretania, ma fai i ai o ia lea ua alu atu i lana fale faigaluega e aumai sana tupe.

Na taua e le malo, o le taimi lava na uma ai ona talanoa Peretania ma Vaimagalo i le telefoni, na vili ai loa e Peretania leoleo o le falepuipui ma faailoa i ai, o Vaimagalo lea ua sola ese mai le toese.

Na faailoa e le isi molimau i leoleo e faapea, na faateia lo latou aiga ina ua tu atu Vaimagalo i lo latou fale.  Na fa’ailoa i ai e Vaimagalo, o ia na solia mai i tua e fasioti le alii faamasino sili.

Fai mai le malo, na faailoa e Vaimagalo i le molimau e faapea, o le a alu i le fale o le isi ana uo i Faleniu e aumai se fana, peitai sa fai i ai le molimau, o le a ia logoina leoleo.

O le aso lava lea na maua ai e leoleo le ua molia o tietie atu i se taavale, ina ua telefoni e le alii e ana le taavale ia leoleo o le falepuipui ma faailoa i ai, o lea o le a alu e piki Vaimagalo ma la tietie i se faleoloa i Iliili.

Na ona tu lava o le taavale i luma o le faleoloa, savali ma le ave taavale i le faleoloa, ae laga atu ma leoleo ua loka mai Vaimagalo o lo o nofo i le nofoa pito i luma o le taavale ma toe ave loa o ia i le falepuipui.

FAATULAGA FAAMASINOGA AUTU O STURKY ALLEN

O le aso 11 Ianuari 2013 lea ua faatulaga e le Faamasinoga Maualuga, e faataunuu ai le faamasinoga autu a Stoechkict “Sturky” Allen, ina ua talia e le faamasinoga le talosaga a le loia tutoatasi ia Marcellus Tala Uiagalelei, e tuuina atu loa le mataupu lenei e faataunuu sona faamasinoga autu.

O se tasi lenei o mataupu sa tauaveina e le alii sa avea muamua ma Loia Tutoatasi ia Faamomoi Masaniai Jr, peitai e oo mai lava i le vaiaso na te’a nei e le i maua lava se i’uga.

Na faailoa e Uiagalelei i le faamasinoga, e ui o lo o avanoa pea faila o le mataupu a Allen i lona ofisa, peitai e lei maua lava se avanoa a lana loia o Fiti Sunia e oo atu ai e iloilo ma vaavaai i ai, o le mafuaaga lea ua ia talosagaina ai le faataunuu o se faamasinoga autu o lenei mataupu.

O Allen o lo o tuuaia e le malo i moliaga mamafa e tolu o le faia lea o faamaumauga sese, tasi le moliaga o le ave faagaoi o tupe sa i lalo o lana vaavaaia, faapea ai ma le faaaoga o lona tulaga o se tagata faigaluega a le malo, e faatino ai gaioiga faaalatua.

O moliaga o lo o tuuaia ai Allen, na afua mai i le va o le 2007 ma le 2008, ina ua ia faaaogaina ni tupe sa totogi atu e tagata mo le faia o a latou pepa malaga (Certificates of Identity-CI).

I faamaumauga o lo o taua ai e faapea, o se ulugalii sa faamoemoe e fia malaga i Samoa, na o i le Ofisa o le Loia Sili i le aso 6 o Tesema 2007 e talosaga ni CI mo le latou aumalaga, peitai sa faailoa i ai e Allen e o atu i lona fale i Vaitogi latou te talanoa ai, ona o lo o pisi tele o ia i le aso lea.

O lo o tuuaia e le malo e faapea, e $50 le tau o le CI e tasi na faailoa i ai e Allen i le ulugalii, ma totogi atu ai loa e le ulugalii le $250 ia te ia, peitai ina ua malaga le aiga i Samoa i le aso 24 o Tesema 2007, na iloa ai o le isi CI ua uma lona aoga ae o le isi CI o lo o faaaoga foi e seisi tagata.

Na talosaga le ulugalii i sui o le Ofisa o Femalagaaiga a Samoa mo se avanoa, ma la totogia ai le $150 (tupe Amerika) mo CI e lua sa faaletonu, e mafai ai ona ulufale i totonu o Samoa.