FAATUPULAIA FUSUAGA VA O KEGI A TUPULAGA

Ua maitauina i totonu o le tolu vaiaso talu ai le faatupulaia lea o le faafitauli i fusuaga i le va o kegi (gang) a tupulaga o le atunuu, ma i’u ina loka ai nisi o tupulaga mai le afioaga o Pago Pago.

I le faaiuga o le masina na te’a nei, na taofia ai e leoleo ni alii talavou se toalima mai Pago Pago ona o fusuaga, faatupu vevesi atoa ai ma le tauai ma’a ma le faaoolima, lea na tutulai ai i luma o le faamasinoga faaitumalo.

A’o le’i tatalaina i latou i tua, sa fautuaina malosi i latou e le alii faamasino o John Ward II ina ia aua nei o latou toe faatasitasi i se nofoaga ma fai ai ni taupulepulega mo ni misa po o fusuaga, faasa foi ona o latou toe soli se tulafono pe toe taumafai e faafesootai i latou na aafia i lenei mataupu.

Ae i le faaiuga o le vaiaso na te’a nei, na toe taofia ai e leoleo isi tupulaga mai Pago Pago lava e aofia ai ma isi sa taofia muamua ae na toe tatala, ona o fusuaga ma tauaiga ma’a sa faia i le va ma isi foi tupulaga i le faaiuga o le vaiaso.

O le taeao ananafi na toe valaauina ai mataupu a tupulaga talavou nei i luma o le faamasinoga, ma ua fuafua e toe fofogaina i le faaiuga o le masina nei.

Na matua faatumulia fafo o le potu faamasino faaitumalo i leoleo mai le Ofisa Autu a leoleo i Fagatogo, ina ua faalogo i tala e faatatau i se tagata na ia folafola lona faafefe o se leoleo sa lokaina se tasi o tamaitai talavou e aiga i ai lea alii.

O le tamaitai lea e 16 tausaga le matua, ma o lo o tuuaia i lo la o atu ma seisi tagata i se faleoloa, a’o ufi o la foliga i ni solosolo, ae fai i le faatauoloa e avatu ni pia ma ni sikaleti.

Na taua e le loia a le malo o Terri Bulinger i le Samoa News, na taufetuli i fafo le toalua lea ina ua musu le faatauoloa e fai le mea na la mananao i ai, ma o le po lea na loka ai le teineititi e 16 tausaga le matua ma isi tamaitai sa la toalua o Unutoa Vaiomata Emotu, na telefoni atu ai se tagata e aiga i le tamaitai 16 tausaga ma faafefe leoleo e ala i lona fanaina o ia.

Ua i ai le fuafuaga a le malo o le a latou failaina moliaga faaopoopo faasaga i lenei mataupu pe afai ae maea a latou suesuega o loo faagasolo i le taimi nei.

TALOSAGA FAIFEAU FAAMASINOGA E FAAILOA MOLIMAU MALO

Ua i luma o le Faamasinoga Maualuga le isi talosaga na faaulu e le alii faifeau ia Rev. Nikolao Fa’asala, tauala atu i lana loia fautua o Mark Ude, ina ia faatonu le itu a le malo, e faailoa atu i luma o le faamasinoga mea molimau o le a latou faaaogaina i le taimi e faataunuu ai se faamasinoga iloilo o le mataupu faasaga ia te ia.

Na taua e Ude e faapea, ua maea ona faila e le itu a le malo sa latou tali e uiga i le talosaga, ma ua faailoa e le loia a le malo o Cecilia Reyna le sauni o le malo e faaaoga mea molimau sa maua mai i le faila a le ua molia e taua i le gagana faaperetania o le ‘defendant’s discipline file’, peitai na taua e Ude, e le faatagaina ona faaaoga faamaumauga mai le faila e pei ona taua, i lalo o se maliliega na sainia e le Falemeli a le malo tele o Amerika ma le Falemeli i le teritori nei.

E tolu moliaga o lo o tuuaia ai e le malo Faasala, lea e aofia ai le gaoi, ave faagaoi o tupe sa i lalo o lana vaavaaia, faapea ai ma lona faia o ni gaioiga ina ia soli ai e le isi tagata le tulafono.

I le maea ai o faafinauga a loia i lenei mataupu, na faia ai loa le faaiuga a le faamasinoga, o le a taoto atu le mataupu mo sa latou faaiuga, pe afai e maea ona o latou iloiloina talosaga ma mau e lagolagoina ai.

O lo o tumau pea poloaiga o lo o tatala ai Faasala i tua ina ua ia totogiina le tupe e $5,000 na faatulaga e tatala ai o ia.

FAATULAGA FAAMASINOGA AUTU O SE ALII MAI FILIPAINA

O le alii mai Filipaina lea o loo tuuaia i lona tagofia lea o itutinosa o se tamaitai, faaoolima i le tulaga tolu, faatupu vevesi i nofoaga faitele, atoa ai ma lona tete’a atu i leoleo ina ua pu’e faapagota o ia, ua faatulaga e le faamasinoga lana faamasinoga autu e faia lea i le aso 12 Oketopa.

E lei talia e le alii o Victor Liwan Tacloloy se ofa na tuuina atu e le malo ia te ia, ma faatulaga ai loa lana faamasinoga autu.

Fai mai faamaumauga a le malo, o lenei mataupu na alia’e mai i le masina o Oketopa 2011, ao i ai le ua molia ma le tamaitai na aafia, ina ua maea le inugapia, o iina na tuuaia ai lo ae le malo le ua molia i lona taumafai lea e tagofia itutinosa o le na aafia.

O le tamaitai loia fautua ia Ruth Risch-Fuatagavi o loo tulai mo le ua molia, ae o Mitzie Folau o loo tulai mo le itu a le malo.