TATALA I TUA LE ALII NA SUIA FUAINUMERA O LANA SIAKI

O le alii lea na ia toe suia fuainumera sa i luga o lana siaki mulimuli na tuu atu e le kamupani sa galue ai, ua tatala i tua mai le toese i le vaiaso na te’a nei, ae ua poloaina o ia e le faamasinoga na te toe totogia le$1,000 lea sa ia gaoia mai lana kamupani, atoa ai ma le salatupe e $500.

Na uluai tuuaia e le malo le alii o Mamoe Vaoga i le moliaga o le gaoi atoa ai ma moliaga e lua o le faia o faamaumauga sese ma le tau faavalea, peitai i le maliliega sa ia sainia ma le malo ma talia e le faamasinoga, sa ia ioeina ai le moliaga o lona faia o ni faamaumauga tau faasese, ae solofua isi moliaga e lua.

Na faatoese Vaoga i le faamasinoga e tusa ai o le solitulafono sa ia faia, sa ia faatoese foi i le kamupani sa galue ai, ona o le mea sese sa ia faia, ma ia tautino ai na te le toe soliina se tulafono.

Na malilie loia e faanofovaavaaia Vaoga, ma ia poloaina o ia na te toe totogi le tupe sa ia gaoia mai le kamupani na galue muamua ai.

E fitu tausaga na manatu le faamasinoga e loka ai Vaoga i le toese, peitai ua faamalumalu le tuliina o lea faasalaga, ae ua faanofovaavaaia o ia mo tausaga e 7 i lalo o poloaiga a le faamasinoga, lea e aofia ai le faasa lea o ia ona toe tago i le ava malosi, faasa ona ia toe soli se tulafono, a ia avea o ia ma se tagatanuu lelei e tausisi i le tulafono i soo se taimi.

FESILIGIA ROMEO AUALA NA LOKA AI O IA E LEOLEO

O le vaiaso na tea nei na faila ai e Romeo Peretania sana talosaga i le faamasinoga maualuga, tauala atu i lana loia fautua, e fesiligia ai mau a le malo o loo lagolagoina ai le taofia faapagota o ia i le toese i Tafuna i le taimi nei, atoa ai ma le faailoaina atu o mafuaaga e manatu le malo ua talafeagai ai le taofia o ia i le falepuipui.

Fai mai le talosaga a Peretania, e le o i ai ni mau faamaonia e lagolagoina ai tuuaiga ua faia faasaga ia te ia e le malo. Sa ia taua foi, o faamaumauga e pei ona taua e le malo mai le latou molimau faapitoa, e le gata ua tuai, ae le o mafai foi ona lagolagoina ai tuuaiga sa ia soli se vaega o le tulafono.

O loo taua foi i se vaega o le talosaga ua i luma o le faamasinoga e faapea, o le sailia o le fale ma mea totino a le ua molia, sa faia e aunoa ma se masalosaloga tatau, ma o lea gaioiga ua faaleaogaina ai ona aia tatau faaletulafono i lalo o le Vaega 4 o le Tulafono Toe Teuteu a le malo tele o Amerika.

O Peretania o loo tuuaia i lona umia faasolitulafono o le pauta o le aisa ma le faamoemoe e tulei ma faatau atu i isi tagata.

Ina ua osofaia e leoleo le fale a le ua molia i lalo o se poloaiga a le faamasinoga, sa maua i ai pepa iila laiti se 12 o loo i ai vaega o le pauta faasaina o le aisa, faapea ai ma se paipa e faaaoga e tagata e ula ai le aisa, faapea ai ma le tupe e $226.

O le aso 18 Setema lea ua faamoemoe e toe fofogaina ai lenei mataupu, ma o loo taofia pea Peretania i le toese i Tafuna.

FAASALA AVE TAAVALE NA LAFOAIA LAPISI I ILIILI

O le vaiaso na te’a nei na tuuina atu ai e le Matagaluega a Leoleo pepa sala (citations) i ave taavale o taavale ia na maua e le pulenuu o le afioaga o Iliili, o lafoa’i lapisi i tafatafa o le alatele i le lua vaiaso talu ai.

I se tusi na tuuina atu e le Taitai Leoleo ia Cpt. Vai Maiava i le afioga i le alii faipule ia Larry Sanitoa, lea foi na maua e le Samoa News, o loo faamaonia atu ai e le susuga Cpt. Maiava le maea lea ona tuuina atu o pepa sala ia ve taavale o taavale e pei ona taua.

Saunoa Cpt. Maiava, o loo faaauau pea galuega a le matagaluega mo le mataituina lea o i latou e le o usitai i le tulafono.