ANDREW PETERS

Ua tu’ua’ia Andrew Peters i le gaoi ma le sola ese mai leoleo, ina ua masalomia lona gaoia o se telefoni feavea’i mai totonu o se taxi sa paka i luma o se faleoloa i Pago Pago, a’o alu le ave taxi e fai lana faatau.

Na ta’ua i fa’amaumauga a le fa’amasinoga e fa’apea, na vaaia e le ave taxi le ua molia o lo o ui ane i le isi itu o lana taavale, ae ina ua sau i fafo sa ia vaaia alii e toatolu sa i luma o le faleoloa ua taufetuli i le atoa, peitai ua leai lana telefoni sa i totonu, sa lei manatu foi na te tuliloaina le au alii ia ua sosola.

Na faailloa e le ave taxi i le ofisa o leoleo ma agai atu ai loa leoleo e saili le ua molia ona o lo o masalomia foi o ia i nisi o mataupu o lo o ta’u ai foi lona igoa.

A’o le’i faia le tuliga a leoleo ma Peters, na tuu e Peters i isi alii le telefoni sa ia gaoia ma lana faamatalaga e toe faafoi i leoleo, leaga e le fia alu i le falepuipui o ia lea o lo o fuafua e malaga i Hawaii ia Me 24, 2012.

E ui sa umi se taimi o fai tuliga a leoleo ma Peters, peitai na i’u lava ina maua ma taofia o ia i le toese.

O lo o taofia pea i le toese le ua molia ina ua le mafai ona ia totogia le $30,000 sa faatulaga e tatala ai o ia i tua, e faatali ai lana ulua’i iloiloga i le aso 9 Iulai.

VILI ONEY

O le aso 28 o Iulai lea ua faatulaga e fofoga ai le faasalaga a le alii o Vili Oney, i le maea ai ona ia tali ioe i le moliaga feololo o le umia faasolitulafono o se vaega o fualaau faasaina o le mariuana, i lalo o se maliliega sa ia sainia ma le malo ma talia e le faamasinoga.

O le tuuaiga faasaga ia Oney na afua mai ina ua osofaia e leoleo lona fale i lalo o se poloaiga a le faamasinoga, i le amataga o le tausaga nei, ma maua i ai ni vaega o lau mamago o le mariuana, o se tupe, o pepa taai faapea ai ma mea e faaaoga i fualaau faasaina e aofia ai se mea faigaluega e faanini’i ai lau mariuana.

SAUNI TOEAIINA TOALUA E TALI IOE I LA MOLIAGA

O faamasinoga o toeaiina e to’alua ia o lo o tuuaia i lo la faia o ni uiga mataga i fanau teine laiti, ua toe tolopo e le faamasinoga a laua ulua’i iloiloga, ina ua faailoa e a laua loia le toeitiiti maea feutanaiga o lo o faia ma le malo mo ni maliliega e faamuta ai a laua mataupu.

O le isi o le toalua lea o se alii ave taxi e 67 tausaga le matua, lea na maua atu e leoleo, ma se teineititi e 16 tausaga le matua, i se fale tuufua i se togavao i Nuuuli.

O lo o taofia pea lenei tama matua i le toese ina ua le mafai ona ia totogia le $35,000 sa faatulaga e tatala ai o ia, e faatali ai le isi ana iloiloga lea ua faatulaga e le faamasinoga.

O le isi toeaina o se tama e 64 tausaga le matua, o lo o tuuaia i lona faia o uiga mataga i se alualutoto e 6 tausaga le matua e aiga i ai, ma e le o mafai ona faalauiloa le suafa o le ua molia, ona o puipuiga lava i le ono iloa ai ma le alualutoto o loo aafia i lenei mataupu.

E $100,000 le tupe o lo o taofia ai le ua molia i le toese e faatali ai le isi ana iloiloga lea ua toe faatulaga i le faaiuga o le masina lenei.

O le tamaitai loia fautua ia Leslie Cardin o loo tulai mo i laua nei ae o le tamaitai loia sili lagolago ia Mitzie Folau o loo tulai mo le itu a le malo.