Ads by Google Ads by Google

Tala o Faamasinoga

FOLASA GALEA’I

O le masina fou lea ua faatulaga e faia ai le uluai iloiloga o le mataupu a le alii o Folasa Galea’i i luma o le Faamasinoga Maualuga, ina ua ia teena tuuaiga a le malo faasaga ia te ia i le taeao ananafi.

O le tama’ita’i loia o Marie Ala’ilima, na tula’i mo Galea’i e sui ia Sharron Rancourt, ae o Cabel Poag, na tula’i mo le itu a le malo.

O Galea’i o lo o tuuaia e le malo i moliaga mamafa e lua, o lona umia faasolitulafono o vaega o le pauta faasaina o le aisa ma le mariuana ma le faamoemoe e faatau atu i tagata.

O ia tuuaiga na afua mai ina ua alu atu e piki se afiafi a lona uncle sa aumai i le meli i le Aso Faraile, Me 25, 2012, ae taofia ai e alii Ofisa o le Tiute ina ua masalomia nisi o oloa sa aumai i totonu o le atigi pusa.

Ua tatalaina i tua mai le toese ia Galea’i ina ua mae’a ona ia totogia le $50,000 na faatulaga e le faamasinoga, i lalo o tuutuuga e ao ona ia usita’i i ai, ao faagasolo ai lana mataupu.

TALIA LE TALOSAGA A LE MALO

Ua talia e le Faamasinoga Maualuga le talosaga na faaulu e le itu a le malo, ina ia toe tolopo le faamasinoga autu o le alii faipisinisi o Mike Kim ma se alii sa faigaluega ia te ia, o Motau Samani, lea na fuafua e faia i le masina fou, ona faatoa avanoa mai se tasi o molimau a le malo i le masina o Aokuso.

O lo o tuuaia i la’ua nei, i se mataupu na a’afia ai se teineititi 17 tausaga, i le 2010.

Na faailoa e le tamaitai loia ia Mitzie Folau lea o lo o tula’i mo le malo, e faapea, o le latou molimau lea fa’ato’a mafai ona o’o mai ia Aokuso, o se foma’i su’e toto (lab technician) o lo o fuafua e molimau i su’esu’ega o le DNA.

Fai mai Folau, o nisi o tiute tauave o lenei tagata atoa ai ma le tulaga i le faatoa maua o sana galuega fou, o nisi ia o mafuaaga ua ala ai ona tuai ona malaga mai o ia i Amerika Samoa mo lea faamoemoe.

Na taua e le loia a Kim ia Fiti Sunia i le faamasinoga e faapea, o loo lava pea le onosa’i o le ua molia ao faagasolo ai taualumaga o lana mataupu. Sa ia taua foi, o le masina o Setema ma Novema e le o ni masina lelei lea mo le ua molia, ma o le mafuaaga lea ua ia talosagaina ai ina ia faataunuu le faamasinoga ia Tesema, lea foi na talia e le faamasinoga.

O loo tumau pea tuutuuga o loo tatala ai Kim ma Samani i tua e faatali ai le aso lea ua faatulaga e faia ai le la faamasinoga autu.

O le alii leoleo ia Apisai Atoe lea e toatolu i ai i latou o loo tuuaia i lenei mataupu, o loo faaauau pea lana mataupu i luma o le faamasinoga i le taimi nei.

CRYSTAL TEO

O le aso 26 o le masina lenei lea ua fuafua le malo ma le loia a le tamaitai o Crystal Teo e tatau ona fofoga ina ai i luma o le faamasinoga le maliliega lea ua latou faia ma le ua molia ma faauma ai loa lenei mataupu.

O le vaiaso nei na faatulaga ai le uluai iloiloga a Teo peitai na faailoa e lana loia o Mike White e faapea, ua i ai le ofa ua tuu atu e le malo mo le ua molia, ma ua tatau loa ona faatulaga se aso e fofogaina ai lea maliliega.

O Teo o loo tuuaia e le malo i moliaga mamafa e lua o lona ave faagaoi lea o ni tupe sa i lalo o lana  vaavaaiga, lea na afua mai i le taimi ao avea o ia ma pule o le Ofisa o le kamupani la’u meli o le GDX i Pago Pago mai le aso 1 Iuni 2009 seia oo atu i le aso 6 Aperila 2010.

O loo tuuaia Teo i lona faaaogaina lea o tupe a le kamupani e totogi ai le taavale rental lea sa  ia faaaogaina mo ia lava, e aofia ai foi ma le tupe sa utu ai le taavale.

E tusa ma le $40,000 o loo tuuaia e le malo Teo sa ia totogiina i le kamupani rental ae tusa ma le $5,000 sa ia totogia i le pamu kesi mo le utuina o le taavale.

O loo taofia pea i le toese i Tafuna Teo ina ua le mafai ona ia totogiina le tupe na faatulaga e tatala ai o ia i tua, e faatali ai le isi ana iloiloga lea ua faatulaga i le vaiaso mulimuli o le masina lenei.