Ads by Google Ads by Google

Tala o Faamasinoga

MALAKE GAUTA

Ua talia e le Faamasinoga Maualuga le tali ioe a le alii o Malake Gauta i le moliaga o lona faia o ni amioga faafeusuaiga ma se teineititi e i lalo o le 16 tausaga le matua, i lalo o se maliliega sa ia sainia ma le malo, ma fofogaina foi i luma o le Faamasinoga Maualuga i le taeao ananafi.

I le tali ioe ai o Gauta i le moliaga lona lua sa tuuaia ai o ia e le malo, na talosaga ai loa le malo i le faamasinoga ina ia solofua isi moliaga e tolu o loo totoe ai faasaga ia te ia, e aofia  ai le moliaga o le faiaiga faamalosi, tagofia o itutinosa o se teineititi, atoa ai ma lona faia o ni gaioiga e ono lamatia ai le saogalemu o se fanau e  laititi i lalo o le tulafono, lea foi na talia e le faamasinoga.

I le tali ioe ai o Gauta i le moliaga lona lua o loo i le pepa o tagi a le malo, sa ia tautino ai e faapea, i le va o le masina o Iulai 2010 ma Setema 2011, sa ia faia ai ni uiga mataga i se teineititi e i lalo o  le 16 tausaga le matua, e ala lea i lona tagofia o ona itutinosa (tulou).

Na tautino foi Gauta e faapea, o gaioiga sa ia faia sa le tusa ai ma ala o le tulafono.

Ua malilie itu e lua o le a faatali ni a laua faafinauga mo se faasalaga mama mo le ua molia, sei maea ona tapena e le Ofisa Faanofovaavaaia sana ripoti e uiga i lenei mataupu, peitai ua malamalama ma iloa e Gauta, tusa lava pe fautua loia i le faamasinoga mo se faasalaga mama, e pule le faamasinoga pe talia pe teena ia fautuaga.

Ua ia iloa foi, afai e tuuina mai se faasalaga a le faamasinoga ae le tusa ai ma lona loto, e le mafai ona toe suia lana tali ioe  ua maea ona tuuina atu.

O le aso 6 Iulai lea ua faamoemoe e lau ai le faasalaga a le ua molia, ma o loo taofia pea o ia i le toese i Tafuna e faatali ai le aso lea o le a lau ai lana faasalaga.

O le tamaitai loia fautua ia Leslie Cardin na tulai mo Gauta ae o Mitzie Folau na tulai mo le itu a le malo i lenei mataupu.

ALI’IOAIGA FILOIALI’I

Na talia e le faamasinoga maualuga se talosaga na tuuina atu e le alii loia o loo fautuaina Ali’ioaiga Filoiali’i, ina ia toe tolopo le iloiloina o lenei mataupu mo se vaiaso, ina ia mafai ai ona la soalaupule ma le ua molia se ofa ua tuuina atu e le malo.

O le alii loia ia Fiti Sunia lea o loo tulai mo Filoiali’i na faaleoina le talosaga, lea foi e lei tete’e i ai le loia a le malo o Cabel Poag ma talia foi e le faamasinoga.

O le aso 11 Iuni lea ua faatulaga e toe valaauina ai lenei mataupu i luma o le faamasinoga mo le isi iloiloga.

O loo tuuaia Filoialii i le ave taavale ua mafua ai ona oo le maliu i se isi tagata, ona o se faalavelave na lavea ai se teineititi ma i’u ina uma ai lona ola i le falema’i.

EDWARD AVEGALIO

Ua poloaina e le alii faamasino sili ia Michael Kruse le tuuina atu o le mataupu i le va o Edward Avegalio ma le malo e taulima e le alii faamasino sili lagolago ia Lyle L. Richmond, ona e i ai se la fesootaiga ma le ua molia i lenei mataupu, o le mafuaaga  lena o le a le mafai ai ona ia taulimaina lana mataupu.

O le taeao ananafi na tofu atu ai i luma o le faamasinoga maualuga le mataupu a Avegalio, lea o loo tuuaia e le malo i le moliaga o le faaleaga meatotino i le tulaga muamua, e mafua mai i se mataupu na tulai mai i le afioaga o Leone, lea o loo tuuaia ai o ia e le malo i lona faaleagaina lea o pou o le fale o le tuugamau a se tasi o ona tauaiga ua maliu.

Ua i ai le faamoemoe o le taeao nei o le a toe  faaauau ai le uluai iloiloga a Avegalio i luma o le alii faamasino o Richmond.

O loo tumau pea poloaiga o loo tatala ai i tua le ua molia ao faagasolo ai taualumaga o lana faamasinoga.