Ads by Google Ads by Google

Tala o Faamasinoga

TUILUAAI FAAMAUSILI

Ua tatalaina nei i tua mai le toese i Tafuna ia Tuilua’ai Fa’amausili i le maea ai ona ia totogia le $15,000 na faatulaga e le faamasinoga, e faatali ai lana ulua’i iloiloga lea ua fuafua ia Iuni 1, 2012, mo lona ulua’i iloiloga.

O lo o tuuaia le ua molia e le malo i lona tuuina atu o siaki e aunoa ma se tupe o i ai i totonu, i se kamupani sa faatauina mai ai e lana pisinisi meafale mo ana galuega sa faia.

I faamaumauga a le faamasinoga o lo o taua ai e faapea, o le aso 7 o Tesema 2011 na faila ai e le pule o le kamupani a le K & K sana tagi i le ofisa o leoleo, faasaga i le ua molia i le tusia atu o ni  siaki se tolu i lana kamupani e aunoa ma se tupe o i ai.

O le alii loia ia Fiti Sunia lea ua tulai mo le ua molia ae o le alii o Blake Hanley o lo o tulai mo le malo i lenei mataupu.

VILI ONEY

O le taeao nei lea ua faamoemoe e lau ai le faasalaga a le  alii o Vili Oney i luma o le Faamasinoga Maualuga, i le maea ai ona talia e le faamasinoga o lana tali ioe i le moliaga o le umia faasolitulafono o vaega o laau faasaina o mariuana.

O Oney na osofai e leoleo lona fale i le amataga o le tausaga nei, ma maua i ai ni vaega o mariuana. Na faailoa e le malo i le faamasinoga e faapea, e le tele naua mariuana sa maua i le fale o lenei alii, ma e atagia i vaega sa maua, o mea lava e faaaoga e ia lava.

Na uluai tuuaia e le malo Oney i le moliaga pito sili ona mamafa, lea e mafai ona faasala ai o ia i le toese mo le umi e le itiiti ifo i le 5 tausaga i le toese, poo le salatupe e le itiiti ifo i le $5,000, ae i le maliliega sa ia sainia ma le malo ma talia e le faamasinoga, na tali ioe ai le ua molia i le moliaga feololo lea e mafai ona faasala ai o ia i le toese mo le umi e le silia i le 5 tausaga, poo le salatupe e le silia ma le $5,000.

O lo o tumau pea poloaiga a le faamasinoga o lo o tatala ai Oney i tua e faatali ai le fofogaina o lona faasalaga.

O le tamaitai loia ia Sharron Rancourt o loo tulai mo le ua molia ae o le alii loia ia Cabel Poag o lo o tulai mo le malo.

TATALA I TUA TOEAINA MATUA TUUAIA FAIA UIGA MATAGA

Ua tatala nei i tua mai le toese i Tafuna le tama matua e 93 tausaga lea o loo tuuaia i lona faia lea o ni uiga mataga i se alualu toto e 4 tausaga, ina ua maea ona totogi e lona aiga le  tupe sa faatulaga e le faamasinoga, e faatali ai le aso lea o le a fofogaina ai lana uluai iloiloga i luma o le faamasinoga faaitumalo.

E $25,000 le tupe na uluai faatulaga e le faamasinoga e tatala ai le ua molia i tua, peitai ina ua tauaao e le faamasinoga faafinauga mai loia, na toe faaitiitia ai loa  i le $5,000 le tupe e tatala ai le ua molia i tua i lalo o poloaiga a le faamasinoga.

O nisi o ia  poloaiga e aofia ai le faasa lea ona ia toe faafesootai ina le teineititi o loo aafia i lenei mataupu, o lona great granddaughter lea e pei ona taua e le malo.

O loo tuuaia lenei tama matua i moliaga mamafa e fa e aofia ai le faia o uiga faasotoma, tagofia o itutinosa o se alualutoto, faia o gaioiga faafeusuaiga, atoa ai ma le faia o uiga mataga i se fanau laititi.

O le itula e 1:00 i le aoauli nei lea ua faatulaga e faataunuu ai lana uluai iloiloga i luma o le faamasinoga faaitumalo.