Ads by Google Ads by Google

Tala o Faamasinoga

RONALD WELLS

O le aso 22 Setema o le a faia ai le fa’amasinoga autu o Ronald Wells, i luma o le Fa’amasinoga Maualuga, ina ua ia teena le maliliega na ofoina atu e le malo i le vaiaso na te’a nei.

O lo o tuuaia Wells i le moliaga mamafa o lona umia faasolitulafono o vaega o le pauta faasaina o le aisa, o le moliaga lava foi lea na manatu le malo e tali ioe i ai o ia, peitai e mama ane lona faasalaga pe afai ae faamaonia e le faamasinoga.

O Wells na taofia faatasi mai ma Punefuolemotu Tuaolo i le aso 27 o Mati i Malaeimi, ina ua maua e leoleo i totonu o le taavale a Tuaolo ni taga pepa iila, o loo i ai vaega o le pauta faasaina o le aisa i totonu, faapea ai ma lau mariuana lusi.

O lo o tuuaia la e le malo Wells i lona umia lea o se taga pepa iila se tasi sa i ai pauta o le aisa i totonu, lea na iloa atu e leoleo o ia taumafai e tia’i ese.

O lo o taofia pea i le toese Wells.

BENJAMIN ‘BEN’ FUALAGA

O le alii talavou lea o lo o tuuaia i lona togiina o se isi alii i se fagupia ma manu’a ai, ua ia teena moliaga faasaga ia te ia ina ua tulai i luma o le Faamasinoga Maualuga i le taeao ananafi, ma ua faatulaga ai loa lana ulua’i iloiloga i le aso  22 Iulai, ma o lo o taofia pea o ia i le  toese i Tafuna.

O lo o tuuaia Benjamin Fualaga i le moliaga mamafa o le faaoolima i le tulaga lua, atoa ai ma moliaga mama e lua o le faatupu vevesi i nofoaga faitele, atoa ai ma le tagofia o le ava malosi ae le’i atoa le21 tausaga le matua.

O moliaga faasaga ia Fualaga na afua mai i se faalavelave na tulai mai i le aso 12 Me, ina ua ia faaaoga se fagupia e faaoo ai manu’a i se alii sa latou inupia faatasi, e pei ona taua i faamaumauga a le faamasinoga.

O le alii loia fautua ia Mike White o loo tulai mo Fualaga ae o le alii loia sili lagolago ia Cabel Poag o loo tulai mo le itu a le malo.

PATI LEPOU

O le taeao nei lea ua faamoemoe e amata aloaia ai ulua’i folasaga a loia i le mataupu a Pati Lepou ma le malo, i le maea ai lea ona sailia o le vaega iloilo iuga latou te iloiloina se faaiuga o lenei mataupu.

O le alii o Lepou o lo o tuuaia i moliaga o le sola ese mai le toese, faomea i le tulaga muamua atoa ai ma le faaoolima i le tulaga muamua, ona o le faalavelave lea o loo tuuaia ai o ia ma isi alii pagota e to’afa, i lo latou sosola ese lea mai le toese ma latou fasi fa’amo’amo’aina se alii leoleopo o le faletupe o le ANZ i le masina o Ianuari 2010.

I faamaumauga a le faamasinoga o loo tuuaia ai Lepou ma isi pagota e toatolu o David Maea, Sefo Lemalu ma Gasona Mafiti i lo latou sosola ese lea mai le toese ma le faamoemoe e saili se taavale latou te o ai i le fale o Lepou i Iliili.

O lo o tuuaia le aveese mai e i latou nei o le ki o le sela sa loka ai i latou, mai le fuifui ki a le leoleo o le toese ma latou sosola ese mai ai loa.

Na vaaia e i latou se alii leoleopo o loo moe mai i luga o le nofoa i le lotoa a le ANZ i Tafuna, ona savali atu loa lea o Lemalu ma ta o ia, ona oso atu loa lea o Lepou ua kiki ma fasi o ia ma fai i ai e avatu ia te ia le ki o lana taavale.

O loo tuuaia e le malo Lepou i lona faatonuina lea o Maea e tui le leoleopo i le naifi, peitai e le’i tele se manu’a o le leoleopo na aafia ai i le naifi. Na faailoa e Lemalu i leoleo e faapea, o Lepou ma Maea na faaauauina le fasiga o le leoleopo, ma la sosola ese mai ai ina ua la vaaia se taavale o aga’i atu ia te i laua, ma latou toe fo’i atu ai loa i totonu o le toese.

E maea lelei le tasaga e 2010 e lei maua e leoleo ni faamatalaga e uiga ia i latou na fasia le leoleopo, peitai i le amataga o le 2011, na agai atu ai se alii sa loka i le toese ua magalo ma faailoa i leoleo e faapea, o loo ia faalogo e i ai pagota o loo talanoa i le mataupu e uiga i le fasiga o le leoleopo, ma o iina na maua ai loa e leoleo le auala e toe suesueina ai lenei mataupu.

O le isi molimau sa ia faailoa i leoleo o se tamaitai sa uo ma se alii pagota, lea foi na ia faailoa i leoleo e faapea, o loo i ai i le alii pagota lea sa avea muamua ma ana uo le telefoni na aveese mai i le alii leoleopo na osofaia.