TUUAIA I LE FAALEAGAINA POU TUUGAMAU

O le alii lea o lo o tuuaia i lona faaleagaina o pou o le fale o le tuugamau a le afioga ia Tauiliili Pat Tervola, ua tuuaia nei e le malo i le moliaga mamafa o le faaleaga meatotino i le tulaga muamua, lea e mafai ai ona faasala se tasi i le toese mo le umi e le silia i le 5 tausaga, po o se salatupe e le silia i le $5,000, ia po o faasalaga uma e lua.

Ua fa’atulaga le toe tula’i o Edward Avegalio, i luma o le Fa’amasinoga Fa’aitumalo i le vaiaso nei.

O le aso 22 Iulai 2011 na ripoti ai e le faletua o Tervola lenei mataupu i le Ofisa o Leoleo, ma faagasolo ai loa suesuega.  Na faailoa e molimau na fesiligia e leoleo, e faapea, sa latou vaaia le ua molia o lo o ia faaaogaina se samala ta u’amea e sasa ai i lalo pou o le fale o le tuugamau a Tervola.

Na taua e le isi molimau i leoleo e faapea, ina ua ia vaaia le gaioiga o loo faia e le ua molia, na ia aumaia se mea pu’eata peitai, na pupuni e se taavale le vaega o lo o faatino ai le gaioiga a Avegalio.

Ina ua fesiligia e le alii leoleo ia Det. Vili Faapouli, o ia lea na faauluulu i ai le suesueina o lenei mataupu, ia Avegalio i le aso 29 Fepuari 2012, sa ia faamaonia ai, o ia o le ‘nephew’ o le e ana le fanua lea o lo o fausia ai le tuugaumau a Tervola.

Na taua e Avegalio i le alii leoleo e faapea, e le o mananao le aiga e fai se mea i le tuugamau sei vagana ua faia se maliliega, peitai na toe maua e le aiga le tala, ua faaopoopo e le toalua a Tervola, se isi vaega o le fale o le tuugamau, ma faatonuina ai loa e lona aiga le au kamuta e taofi le galuega.

Na taua e Avegalio e faapea, na usitai le au kamuta ma taofi le latou galuega, peitai latou te lei toe tatalaina i lalo vaega ua maea ona latou fausia, o le mea lea na ia faailoa ai i kamuta e faapea, e mafai ona ia tatalaina i lalo vaega ua latou fausia, ma ia alu ai ua aumai ni alii se toalua ma ia faatonuina i laua i le mea e fai, ae leai so la aafiaga i le faatinoina o lenei gaioiga.

Na faamaonia e Avegalio i le alii leoleo lona taina i lalo o pou sima ua maea ona fausia e ala i lona faaaogaina o se samala ta ma’a.

E tusa ai ma faamaumauga a le faamasinoga, e tusa ma le $1,200 le tupe sa faaaluina e le ua tagi i le faatauina mai o mea e faatinoina ai le galuega, atoa ai ma le $1,800 sa faaalu mo le au kamuta.

PENE WELLS

O le aso 15 Iuni lea ua faatulaga e lau ai le faasalaga o Pene Wells e le Faamasinoga Maualuga, ina ua talia e le faamasinoga lana tali ioe i le moliaga ua toe teuteuina nei e le malo, i lalo o se maliliega sa sainia ma talia e le faamasinoga.

O Wells, na uluai tuuaia ma isi alii e toafa mai le kalapu lakapi a Nuuuli i le fasiga o le alii laufali o Ponifasio Vasa mai Samoa i le aso 23 Iulai 2011, lea na tuuaia ai loa o ia i le moliaga mamafa o le faaoolima i le tulaga muamua, ae i lalo o se maliliega ma le malo, ua ia tali ioe ai i le moliaga feololo o le faaoolima i le tulaga lua, lea e mafai ona faasala ai se tasi i le toese mo le umi e le silia i le 5 tausaga, pe faasala foi i se salatupe e le silia i le $5,000.

Ua tautino Wells e faapea, i se taimi o le aso 23 Iulai 2011, sa ia taumafai ai e faia se gaioiga e ono oo ai ni manu’a tiga i le tino o Vasa, ma o lea gaioiga e le tusa ai ma le tulafono.

O lo o taofia pea Wells i le toese e faatali ai le aso lea ua faatulaga e lau ai lana faasalaga i luma o le alii faamasino ia Michael Kruse, ma alii faamasino lagolago ia Logoai Siaki ma Faamausili Faasua Poumele.

I le talia ai e le faamasinoga o le tali ioe a Wells, ua solofua ai loa le moliaga mama o le faatupu vevesi i nofoaga faitele sa faia faasaga ia te ia.

Mai le toalima na tuuaia e le malo i lenei mataupu, e toafa i latou e aofia ai ma Wells ua tali ioe i o latou moliaga, lea e aofaia ai Iopu Siolo ma Pelenato Puautolu lea ua la tali ioe foi i le moliaga mamafa o le faaoolima i le tulaga lua, ae o Selefuti Tago lea ua maea tali ioe i le moliaga mama o le faaoolima i le tulaga tolu, ua maea ona lau lona faasalaga ma o loo faanofovaavaaia o ia.

O le isi toatasi e toalima i ai i latou na tuuaia i lenei mataupu o Fuata’i Tago, lea ua tatala i tua mai le toese e faatali ai le isi laasaga o lana mataupu ma le malo