Ads by Google Ads by Google

Tala o Faamasinoga

KILISITINA SEIGAFO

Ua faamalumalu le tuliga e le tamaitai o Kilisitina Seigafo o lona faasalaga faafalepuipui e tasi le tausaga mai le Faamasinoga Maualuga, ae ua faanofovaavaaia nei o ia mo le lua tausaga i lalo o poloaiga a le faamasinoga, ina ua ia ioeina le moliaga o le gaoi e pei ona tuuaia ai o ia e le malo.

Ao lei tuuina atu le faasalaga faafalepuipui a le faamasinoga maualuga i le vaiaso na tea nei, na muai faatoese le ua molia ma ia talosaga i le faamasinoga ina ia faamagalo sona sese ua fai. Sa ia taua foi e faapea, o le umi lea na taofia ai o ia i le toese ua ia aoaoina mai ai se lesona aoga mo ia i le lumanai.

Na malilie loia a itu uma o lenei mataupu ina ia aua nei toe tuuina atu se isi faasalaga faafalepuipui ia Seigafo, ae ua lava le umi lea sa taofia ai o ia i le toese e avea ma ona faasalaga i lenei mataupu, lea foi na talia e le faamasinoga.

I le faanofovaavaaia ai e le faamasinoga o le ua molia, ua poloaina ai foi o ia na te totogiina le salatupe e $250 i totonu o le 3 masina o lana faasalaga faanofovaavaaia.

O Seigafo na uluai tuuaia e le malo i le moliaga mamafa o le gaoi, ae i lalo o le maliliega lea sa ia sainia ma le malo ma talia foi e le faamasinoga, na sui ai e le malo le moliaga mamafa aga’i i le moliaga mama.

O lea moliaga na afua mai ina ua faaaoga e Seigafo le pepa talatupe a se alii papalagi sa la fetaui i le falemai, ma tala faagaoi mai ai le $260 mai le teugatupe a lea alii i se masini talatupe, ma o lana gaioiga sa mafai ona maua uma e leoleo i luga o le masini pu’eata a le faletupe e ana ia le masini talatupe sa faaaoga e le ua molia.,

Fai mai faamaumauga a le faamasinoga, ina ua uma se evaga laititi a le ua molia ma le alii papalagi i le Maliu Mai i Fogagogo, na la tutu ai loa i luga ma savavali atu  i le taavale, ae o le va lea na pau ai le ato tupe a le alii papalagi, ma piki ai loa e Seigafo i luga, ma ia aveeseina mai ai le pepa talatupe ma ia faatinoina ai loa le solitulafono e pei ona ta’usalaina ai o ia.

CRYSTAL TE’O

O le taeao nei lea ua faamoemoe e tatau ona iloa ai pe faataunuu le ulua’i iloiloga a le tamaitai lea sa avea ma pule o le Kamupani o le DGX, pe tuuina sa’o atu loa lana mataupu i luma o le faamasinoga maualuga e faaauau ai lana faamasinoga.

O le a faapea foi ona tuuina atu ai ma se faaiuga a le alii faamasino ia John Ward II, e tusa ai o faafinauga a loia i le vaiaso na tea nei, i se tupe e tatau ona faatulaga e tatala ai le ua molia i tua, a’o faagasolo ai lana faamasinoga.

E $25,000 le tupe ua maea ona faatulaga e tatala ai o ia i tua, peitai na finau lana loia i le vaiaso na te’a nei ina ia tuutuu teisi i lalo le vaega tupe, ae sa talosaga le malo i le faamasinoga e faatumau pea le tupe i lona maualuga ua i ai.

O Te’o o loo tuuaia i moliaga mamafa e lua, o lona faaaogaina lea o tupe a le kamupani sa tuuina atu i lalo o lana vaavaaia, ona o se faalavelave o loo finau mai le kamupani na tulai mai i le lua tausaga talu ai seia oo mai i le amataga o le masina lenei, lea na faaaoga ai e le ua molia tupe a le kaupani e totogi ai le taavale rental sa ia faaaogaina mai le kamupani a le Tautai Car Rentals, atoa ai ma lona faaaogaina o nisi o ia tupe e totogi ai le kesi o le taavale mai le pamu kesi a le Nuuuli Service Station.