Ads by Google Ads by Google

Tala o Faamasinoga

TALIA FAAMASINOGA TALOSAGA SIAUMAU SIAUMAU JR

Ua mae’a ona sainia e le alii faamasino sili lagolago ia Lyle L. Richmond le talosaga na faaulu e le alii loia fautua ia Mike White, lea ua tula’i nei mo Siaumau Siaumau Jr, mo se avanoa e totogi ai e le malo lona pasese ina ia mafai ai ona auai atu i se aoaoga e faia i fafo, lea e iloilo ai taualumaga o mataupu e aofia ai le tuuina atu o le faasalaga o le oti, i se tagata o loo tuuaia i se solitulafono.

O le aoaoga lea o le a faia i le aai o Wyoming lea o le a faatasi atu i ai White, o le a mafai ai ona ia maua se tusi pasi e agavaa ai  ona ia finauina mataupu e aofia ai se faasalaga o le oti i luma o le faamasinoga.

E lei tete’e le loia a le malo ia Kelly Dixion i le talosaga a le itu tete’e, pau lana faamatalaga i le faamasinoga, faatoa tete’e lava le malo pe afai o le malaga lenei o le a aofia ai ma ni malologa a le alii loia i lona aiga.

Ae na taua e White i le faamasinoga e faapea, e leai se malologa mo ia e maua i lenei malaga, aua e mamao tele Wyoming ma Georgia, o le aai lea e sau ai o ia.

O loo galulue faatasi le alii loia o White ma le tamaitai loia fautua ia Leslie Cardin i le taulimaina lea o le mataupu a le alii i Siamuau Jr, lea o loo tuuaia i le moliaga o le fasioti tagata i le tulaga muamua, faapea ai ma le anoanoa’i o isi moliaga mamafa e aofia ai le taumafai e faaoo le oti i se tagata, faaoolima i le tulaga muamua, ma moliaga e aofia ai le umia o a’upega mata’utia, ona o le faalavelave lea o loo tuuaia ai o ia i le tagatavaleina o le alii leoleo ia Det. Lt. Lusila Brown i le masina o Iulai 2010.

O lea ua taliu mai i fanua le tamaitai loia ia Cardin i le maea ai lea ona ia auai atu i le aoaoga lava foi lea, ina ia agavaa ai o ia ona avea ma loia mo le alii o Siaumau Jr, ona o lea o loo aofia ai le talosaga a le malo mo se faasalaga o le oti (tulou).

Saunoa le alii faamasino ia Richmond e faapea, o le talosaga lava foi lea na tuuina atu e le tamaitai loia ia Cardin, lea foi na talia e le faamasinoga ina ia malaga atu ai ma auai i le aoaoga lenei,  lea foi o le a malaga atu i ai White.

E tatau ona agavaa loia latou te umia tusi faataga e mafai ai ona latou taulimaina mataupu e aofia ai faasalaga o le oti, ma i lalo o taiala a le Asosi o loia a Amerika Samoa, ia le itiiti ane i le toalua loia e agavaa mo le taulimaina o mataupu faapenei.

O loo taofia pea i le toese Siaumau Jr e faatali ai le isi ana iloiloga lea o le a faatulaga e le faamasinoga i se taimi o i luma.

TUUAIA SE ALII TAUMAFAI E OSOFA’I LONA TINA & TUAFAFINE

O le alii talavou lea na ia taumafai e faaleaga meatotino i le fale a lona tina, atoa ai ma lona taumafai e osofa’i lona tina ma si ona tuafafine, ua tuuaia nei e le malo i le tuuaiga o le faatupu vevesi i nofoaga faitele, ma le faamoemoe o le a faila nisi moliaga faaopoopo faasaga ia te ia, pe afai ae maea suesuega a le malo o loo faagasolo e uiga i lenei mataupu.

I faamaumauga a le faamasinoga na taua ai e faapea, na manao le alii o Alesana Alesana na te fia faaaogaina le taavale a lona tina, lea foi na malie i ai ma lona tina ma le tuutuuga, ia toe vave fo’i atu i le fale, na te fia faaaogaina foi le taavale.

Ae na avea lea ma itu na ita ai le ua molia ma amata ai loa ona ia taumafai e faaleaga meatotino i totonu o le fale, atoa ai ma lona palauvale isi ona tina.

Fai mai leoleo, na faaaoga e le ua molia se samala e tata’e ai faamalama tioata o le fale, amata mai lava i le potu malolo e oo atu i le umukuka.

Na taunuu leoleo ma latou vaaia ai le paepae solo o tioata i totonu o le fale, ae o le isi itu o loo taatia mai ai le tv.

Fai mai leoleo, e tusa ma le $5,000 le tau aofai o mea ua faaleagaina, ma ua faatulaga e le faamasinoga le tupe e $500 e totogi ona mafai lea ona tatala le ua molia i tua, e faatali ai le aso  lea ua faamoemoe le malo e faila ai moliaga faaopoopo faasaga ia te ia.