Ads by Google Ads by Google

Tala o Faamasinoga

TO’ATOLU NA TAOFIA E LEOLEO ASO MALOLO FU’A

E na o le to’atolu lava i latou na taofia e leoleo i aso malolo e lua na mavae atu nei, a’o alo atu le atunuu i le Sisiga Fu’a.

O i latou e toatolu na taofia e aofia ai ni alii se to’alua e tai 17 tausaga le matutua mai Nuuuli, lea na taofia ina ua la faia ni gaioiga e save’u ai le nonofo filemu o tagata lautele, ma le alii leoleo o Semi Sago lea na taofia mai ina ua oso i tua ma le auala le taavale sa ia aveina.

I faamaumauga a le faamasinoga na taua ai e faapea, o alii laiti e to’alua mai i Nuuuli, na taofia mai e leoleo ina ua la aga’i atu ma ta kiki tino o taavale o lo o paka i luma o se faleoloa.

Na teena e i laua ua molia moliaga o le faatupu vevesi i nofoaga faitele ma ua tatala i tua i lalo o poloaiga mai le faamasinoga, e faatali ai le isi aso lea ua faatulaga e toe fofogaina ai a la mataupu.

Na taua e le loia a le malo o Terri Bullinger e faapea, e le’i onana ia alii aoga e toalua i le taimi na tupu ai le faalavelave, o le taimi muamua foi lea ua tuuaia ai i laua i ni solitulafono.

O le alii o Sago ua tuuaia o ia e le malo i moliaga o le ave taavale ‘ona atoa ai ma le ave taavale faatamala, ma ua toe tatala i tua o ia e faatali ai le isi ana iloiloga i luma o le faamasinoga.

Na taua e le loia sili lagolago ia Blake Hanley e faapea, e leai ni faalavelave matuia na ripotia atu i le ofisa o le loia sili tauala mai i le ofisa o leoleo, ao alo atu le atunuu i le faamanatuina o lana sisiga fu’a i le amataga o le vaiaso nei.

SITAU JR OFOIA

O le alii lea na ia so’aina le isi alii i lana taavale, atoa ai ma lona taina o lona tino i se pate kirikiti, ua tofu atu nei i luma o le Faamasinoga Maualuga lana mataupu, ma ua faamoemoe o le taeao nei o le a tulai ai mo le tuuina atu o sana tali e tusa ai o tuuaiga faasaga ia te ia.

O Sitau Jr Ofoia o lo o taofia pea i le toese i le taimi nei, o lo o tuuaia i moliaga mamafa e tolu e aofia ai le  taumafai e faaoo le oti i se isi tagata, faapea ai ma moliaga e lua o le faaoolima i le tulaga muamua. O lo o tuuaia foi o ia i isi moliaga mama e aofia ai le faatupu vevesi i nofoaga faitele, musu e faailoa i leoleo le faalavelave na tupu, atoa ai ma le sola ese mai le nofoaga na tupu ai le faalavelave.

O le aso 8 Aperila na tulai mai ai le faalavelave e pei ona tuuaia ai Ofoia i Tafuna. Na faailoa e ni molimau i leoleo e faapea, o Ofoia ma le alii na aafia, sa i ai uma i le faleaiga lea o lo o i totonu o le malae va’alele, ae ina ua la agai mai i fafo, o iina na tulai mai ai loa le faalavelave.

Na faailoa e se tasi o molimau i leoleo e faapea, sa ia vaaia le alii na aafia o savali agai atu i le isi itu o le auala, e le’i umi ae ona vaaia se pikiapu o lo o alu atu i se saoasaoa uigaese ma so’a le alii na aafia ma fiti atu ai i le isi itu.

Ona ia vaaia lea o Ofoia ua oso i fafo mai le itu a le ave taavale, aapa i tua o le keli o le pikiapu ma aumai le pate kirikiti sa i ai, ma savali atu ma sasa ai le alii na aafia o lo o taatia i lalo, ina ua mae’a, sa toe oso i lana taavale ma alu ese.

O lo o taofia pea Ofoia i le toese i Tafuna ina ua le mafai ona ia totogia le $100,000  lea ua faatulaga e tatala ai o ia i tua.

FAAFEFE LONA AFAFINE I LE FANA

O le tama lea na ia faafefeina lona afafine e ala i le faalala i ai o le fana i lona muaulu, ua faamoemoe e tulai i luma o  le Faamasinoga Maualuga i le taeao nei, mo le tuuina atu o sana tali e tusa ai o tuuaiga faasaga ia te ia.

E le o mafai ona faalauiloa le suafa o lenei tama  ona o puipuiga i lona afafine o loo aafia.

O lo o tuuaia lenei tama i le moliaga mamafa o lona faaaoga faasolitulafono o se a’upega, faapea ai ma moliaga mama e pei o le faaoolima i le tulaga tolu ma lona umia faasolitulafono o se fana.

I faamaumauga a le faamasinoga o lo o taua ai e faapea, o lenei faalavelave na tulai mai ina ua vili atu se tagata i le telefoni a le ua molia, ma fesili atu i lona afafine. Sa su’esu’eina e lenei tama lona afafine po o ai le tagata lea na vili atu e su’e atu o ia, peitai sa faailoa i ai e lona afafine na te le iloa, ma o iina lea na fai mai ai loa le malo, na tago ai le ua molia i le fana ma faalala i foliga o lona afafine.

O lo o taofia pea i le toese lenei tama sei vagana ua totogi le $3,200 e tatala ai o ia i tua e faatali ai taualumaga o lona faamasinoga.