Ads by Google Ads by Google

Tala o Faamasinoga

TO’A FILEMU POLOKA LEOLEO FAAIUGA VAIASO

E leai ni faalavelave matuia na tulai mai i le faaiuga o le vaiaso  na te’a nei, a’o alu atu le atunuu i le amataina o sauniga mo le faamanatuina o le 112 tausaga o lana sisiga fu’a i lenei vaiaso.

Mai le silia i le toa 10 na taofia mai e leoleo i le faaiuga o le vaiaso na tea nei ona o tuuaiga eseese e aofia ai le faatupu vevesi i nofoaga faitele, atoa ai ma le ave taavale ‘ona,

E toa 10 na tuuaia i le save’uina o le filemu o tagata lautele ae toalima na tuuaia i le ave  taavale ‘ona, lea e aofia ai se tina na oso ese lana taavale ma le auala ina ua moe, atoa ai ma se alii na oso ese lana taavale ma so’a se pou moli i Iliili.

Ua tu’ua’ia nei Seakerise Tuatoo, lea na tula’i mai ai le fa’alavelave i Iliili,  i moliaga mama e lua e aofia ai le ave taavale ‘ona ma le ave taavale faatamala.  Ae ua i ai le faamoemoe o le malo, o le a faaauau suesuega pe i ai ni moliaga faaopoopo e ono faila faasaga ia te ia.

O le isi toafa na taofia mai i le faatupu vevesi i nofoaga faitele e aofia ai ni alii faifaiva na onana ma pisa i se latou inuga sa faia i le faaiuga o le vaiaso.

O le toatele lava o i latou na taofia e leoleo na toe tatala i tua e aunoa ma ni tupe na faatulaga, sei vagana ai se vaega itiiti na manaomia le totogi o se vaega tupe e tatala ai, ona o loo i ai ni a latou sala i le faamasinoga e lei totogiina.

Saunoa le Sui Komesina o leoleo o Leseiau Laumoli e faapea, sa to’a filemu le faaiuga  o le vaiaso na tea nei i le atunuu, e leai ni faalavelave matuia na tutupu mai ai, sei vagana ai lava le  faafitauli o le ave taavale ‘ona.

Ua ia toe fautuaina le atunuu ina ia tuu le taavale i le fale pe afai e tagofia le ava malosi, ina ia mautinoa  e  saogalemu le ave taavale, saogalemu atu ai ma le mamalu o le atunuu.

POLOA’I E LE FAAMASINOGA LOIA INA IA TUUINA ATU FAAMATALAGA

O le Aso Tofi na te’a nei, na fa’agata ai ona toe tu’uina atu e loia i luma o le fa’amasinoga fa’amatalaga uma ua latou fuafua e tatau ona tuuina atu, pe afai e faataunuuina le iloiloga autu o alii e toatolu ia o lo o tuuaia i le fasioti tagata i le tulaga lua, ona o le faalavelave lea na maliu ai se alii mai Iliili i le tausaga na tea nei.

O i latou e toatolu o lo o tuuaia i lenei mataupu e aofia ai Sefo Siaulaiga, Neemia Poamo ma Migo Misa.

Fai mai le loia a Siaulaiga o David Vargas, e ui eseese  taimi na faila ai mataupu a i latou nei i luma o le faamasinoga, peitai sa manatu le  malo ina ia fai faatasi a latou iloiloga.

O le aso 9 Iuni 2011 na faila eseese ai e le malo moliaga faasaga ia i latou nei i luma o le faamasinoga, ona o le faalavelave lea na maliu ai Sio Faumui i le aso 4 Iuni 2011, ma tofu atu ai i luma o le  faamasinoga maualuga mataupu a i latou nei i le aso 24 Iuni.

I le uluai taimi ao faagasolo mai mataupu nei, e tolu lava mataupu eseese sa faila e le  malo, peitai ina ua oo maii le aso 8 o Mati 2012, o iina lea o loo finau Vargas na faila ai loa e le malo sana talosaga ina ia  fai faatasi le faamasinoga autu o lenei mataupu.

E talitonu le alii o Siaulaiga, talu ai e eseese taimi na faatinoina ai gaioiga e pei  ona tuuaia ai i latou, e le talafeagai pe a fai faatasi le latou faamasinoga, e ono avea foi lea ma itu e le mafai ai ona ia molimau faasaga i isi e toalua o loo tuuaia faatasi i latou, e le mafai foi o na ia fesiligia i laua ia pe afai e i ai ni faamatalaga e faia faasaga ia te ia.

Ua lagolagoina e loia a Misa ma Poamo le talosaga ua faaulu e le loia a Siaulaiga, ma ua latou manatu e tutu faatasi i le latou talosaga e pei ona taua.

O lo o tumau pea le faafinauga a le malo e pei ona taua e le tamaitai loia ia Mitzie Folau, ina ia fai faatasi faamasinoga a i latou nei, ina ia sefe ai le taimi o le faamasinoga ma taofia ai le ono faamaimau o nisi mea totino a le malo.

E le o manino mai i le taimi nei pe talia e le faamasinoga le talosaga a le malo, ae ua taoto atu mo sana faaiuga, pe afai e maea ona iloilo e le faamasinoga famaatalaga ia ua poloaina loia e tuu atu.

O lo o taofia pea i le toese i latou nei sei vagana ua totogi le tai $100,000 ona faatoa mafai lea ona tatala i tua.