MIKE KIM MA MOTAU SAMANI

Ua taoto atu nei i se faaiuga a le Faamasinoga Maualuga. se talosaga na faaulu e le malo, i se avanoa e mafai ai ona faataunuu faatasi le faamasinoga autu, o le ali’i faipisinisi o Mike Kim ma Motau Samani, lea o lo o molia i le faia o uiga mataga i se teineititi talavou.

O lenei fa’alavelave na tula’i mai i Tafuna ia Iuni, 2010.

O lo o ta’ua e le malo, e mafai ona fa’asaoina le taimi o le fa’amasinoga ma le mal pe afai ae vala’au fa’atasi mata’upu a nei ali’i.

Fai mai le malo, o Kim ma Samani o loo tuuaia faatasi i le mataupu e tasi, e tai foliga tutusa foi a laua moliaga.

O nisi o moliaga o lo o tuuaia ai Kim, e aofia ai le fesoasoani i se tagata i le faatinoina o le solitulafono o le faiaiga faamalosi, o le isi foi lea moliaga e lima i ai tuuaiga o lo o faia faasaga ia Samani.

O le isi alii o lo o toatolu i ai i latou o lo o tuuaia i lenei mataupu, o le alii leoleo lea o Apisai Atoa, lea o lo o tuuaia i lona taumafai e faalavelave i galuega a leoleo, ina  ua ia faatonu le tama o le teineititi na aafia, e alu e toe ave i tua le tagi ua faaulu i le ofisa o leoleo.

O le alii loia ia Fiti Sunia o lo o tulai mo Kim, o Sharron Rancourt o lo o tulai mo Atoa, ae o le tamaitai loia fautua ia Ruth Risch-Fuatagavi o lo o tulai mo Samani, ma Mitzie Folau o lo o tulai mo le malo.

SAUNI TAMAITAI LEOLEO TULAI LUMA FAAMASINOGA MAUALUGA

O le taeao nei lea ua faamoemoe e tulai ai i luma o le Faamasinoga Maualuga le tamaitai leoleo lea o lo o tuuaia i lona ave faagaoi o se iPod na aveese mai e ni tamaitai se toalua mai le ACE i le 2010, ina ua faaagafua ona aia tatau mo le faia o sona uluai iloiloga i luma o le Faamasinoga Faaitumalo.

O le tamaitai leoleo ia Siufaalele Sai o lo o tuuaia e le malo i moliaga mamafa  e lua, lea e aofia ai lona ave faagaoi o se meatotino sa tuuina atu i lalo o lana  vaavaaiga, atoa ai ma lona faaleagaina o mea molimau a le malo.

O le tamaitai talavou ia Rockshane Siaki lea na tu’uaia e le malo o ia lea na aveesea maia iPod mai totonu o le ACE i le 2010, ua solofua e le faamasinoga faaitumalo i le taeao ananafi tuuaiga sa faia faasaga ia te ia, ina ua talitonu le faamasinoga, e le o talafeagai le auala lea ua molia ai e le malo lea tamaitai.

FAATULAGA VAIASO FOU LE ILOILOGA AUTU TOEAINA 62 TAUSAGA

O le Aso Tofi o le vaiaso fou lea ua faatulaga e faataunuu ai le uluai iloiloga o se toeaina e 62 tausaga le matua, lea o lo o molia i le faiaiga ma se teineititi talavou.

Ae o le alii e 22 tausaga lea o lo o tuuaia faatasi ma lenei tama matua, ua tofu atu i luma o le Faamasinoga Maualuga lana mataupu e faaauau ai, ma ua faamoemoe o le taeao nei e tulai ai i luma o le faamasinoga maualuga.

E le o mafai ona faalauiloa suafa o i laua ua molia ona o puipuiga i lalo o le tulafono, aemaise ai e i ai le fesootaiga a i laua nei ma le teineititi e 16 tausaga le matua, o lo o aafia i lenei mataupu.

O i laua nei o lo o tuuaia i moliaga taitolu, e aofia ai le faiaiga ma se teineititi e laititi i lalo o le tulafono, tagofia o itutinosa o se teineititi laititi, atoa ai ma le faia o ni gaioiga e ono lamatia ai le saogalemu o lea teineitiiti, ma i’u ina ma’itaga ai le ua aafia.