SATELE GALU SATELE

O le aso 24 o Aperila lea ua toe tolopo i ai le mataupu faasaga i le Kovana Itumalo o le Falelima i Sisifo, i le mae’a ai o se iloiloga i le vaiaso nei, lea na talosaga ai le itu a le malo ina ia talia suiga ua latou toe faia i le moliaga o lo o tuuaia ai le afioga Satele Galu Satele.

O Satele sa tuuaia i le moliaga mama o le faaleaga meatotino i le tulaga lua, peitai ua toe sui le moliaga  i le faaleaga meatotino i le tulaga tolu, o se solitulafono e mafai ona faasala ai se tasi i le toese mo le umi e le silia i le 6 masina, pe faasala foi i se salatupe e le silia i le $500, po o le faasala foi i faasalaga uma ia e lua.

Na taua e le loia a le malo o Blake Hanley, o suiga ua toe faia i le moliaga faasaga ia Satele, na afua mai i nisi o faamatalaga na toe tuuina atu e le alii o lo o aafia i lenei mataupu, ma faia ai loa e le malo le faaiuga ina ia toe fai se teuteuga i le ulua’i moliaga ua i luma o le faamasinoga.

Na talosagaina e le loia a Satele o Marcellus Tala Uiagalelei le faamasinoga ina ia toe faaauau le iloiloga o lenei mataupu i se isi taimi, sei maua ai se avanoa la te talanoa ai ma le ua molia i le suiga lea ua toe faia e le malo.

O le moliaga faasaga ia Satele, na afua mai lea i se faalavelave na tulai mai i le tausaga na te’a nei, lea o lo o tuuaia ai o ia i lona faatonuina o ni matai o le afioaga o Vailoa, e faaleaga le tuugamau o le tuaa o le alii o lo o tagi i lenei mataupu, ina ua le fiafia Satele i le maualuga atu o le tuugamau lea, mai tuugamau a ona tuaa.

TAU SAILI E LEOLEO SE ALII TUUAIA I LE FAAOOLIMA

O lo o tau sailia pea e leoleo le alii lea na ia so’aina se isi ali’i i lana taavale i le faaiuga o le vaiaso na te’a nei, atoa ai ma lona sasaina o lona tino i se pate kirikiti, i le mae’a ai ona tula’i mai o se vevesi i se faleaiga i totonu o le malae vaalele.

O le alii o lo o tau saili e leoleo, e pei ona faamaonia mai e le Sui Komesina, o le susuga ia Sitau Ofoia mai le afioaga o Vaitogi. O Ofoia na tuli sona taimi faafalepuipui i le toese i Tafuna, ina ua faamaonia e le faamasinoga le moliaga o le faaoolima.

Saunoa Leseiau Laumoli e faapea, o le mataupu lenei na uluai taulimaina e le Ofisa o Leoleo i Tafuna, ae e le’i o’o mai i le ofisa autu i Fagatogo, ma e lomia lenei ripoti i le aso ananafi, o lo o taua mai le i ai pea o le alii na aafia i le falemai ona o manu’aga tuga o lo o aafia ai lona tino.

O le taeao o le Aso Sa na te’a nei na maua ai e leoleo se vala’au mo se fesoasoani, ona o se ali’i sa ta’atia i tafatafa

se telefoni ma nisi o lo o i ai i le vaega tonu o lo o taatia ai le alii na aafia, ma talosagaina ai se fesoasoani ona o se tagata o loo taatia i tafatafa o le alatele.

Na taunuu leoleo ma latou vaaia ai le alii na aafia o loo taatia i tafatafa o le auala, ae o loo tu ai i tafatafa se taavale, ae o le isi itu le pate kirikiti.

Na faailoa e molimau i leoleo e faapea, a’o tamo’e mai le alii na aafia, sa latou vaaia le agai mai o le taavale a le alii o loo tau sailia nei ma so’a o ia ma pau ai i lalo, o le taimi lea na o latou vaaia ai loa le oso i fafo o le alii lea ma uu mai le pate kirikiti sa i tua o lana taavale, ma sasa ai loa le alii na manu’a a’o taatia i lalo.

Ina ua maea ona faia e le alii o loo tau sailia nei gaioiga ia, na sola ese loa ae tuu ai lana taavale ma le pate kirikiti i le vaega na tupu ai le faalavelave.Ua taofia nei e leoleo le taavale atoa ai ma le pate na faatino ai le solitulafono, ae ua latou talosagaina le atunuu mo ni faamatalaga e uiga i le alii o loo tau sailia nei.