Ads by Google Ads by Google

Tala o Faamasinoga

MICHAEL LEATIGAGA

Ua talia e le fa’amasinoga le tali ioe a Michael Leatigaga i le moliaga mamafa, o lona talia o ni oloa sa ave fa’agaoi e nisi, i lalo o se maliliega sa ia sainia ma le malo i le vaiaso nei.  Na ulua’i tu’uaia Leatigaga, e 25 tausaga, i moliaga mamafa e lua, e aofia ai le gaoi atoa ma lona taliaina o ni oloa sa ave fa’agaoi, e se isi ali’i mai i le fale teuoloa a le StarKist i Atu’u.

Ua ta’utino ai nei Leatigaga, sa ia talia ni pusa wahoo mai ia Joe Leota, i le va o le aso 16 ma le 17 o Aokuso 2011, i Atu’u, ma sa ia silafia lelei, na gaoia e Leota nei pusa wahoo mai i le fale teuoloa a le StarKist.

Na fesili le alii faamasino sili ia Leatigaga po o a ana mea sa fai i pusa wahoo ia na maua atu ia Leota, na tali le ua molia, sa alu ma faatau atu i nisi o faleoloa Asia. Na toe fesili le alii faamasino pe sa ia ta’uina i leoleo igoa o faleoloa ia na faatau i ai pusa wahoo, na tali le ua molia, ‘ioe’.

I faamaumauga a le faamasinoga o lo o taua ai e faapea, o Leota na aumaia faagaoi pusa wahoo e lata i le 200 mai le fale teuoloa a le kamupani i’a, ona alu atu lea o Leatigaga ma lana ta’avale ua uta i ai ma aga’i atu ma faatau i nisi o faleoloa, peitai ina ua sailia e leoleo pusa wahoo na gaoia, na mafai ai ona toe maua se vaega tele o pusa.

Ua malie Leatigaga na te toe totogia le tau atoa o pusa wahoo na ia aumai mai le kamupani i’a.

O le Aso Faraile o le vaiaso fou lea ua faamoemoe e lau ai le faasalaga a Leatigaga, o le aso foi lea ua faatulaga e lau ai ma le faasalaga a Leota, lea foi ua maea ona ia ioeina le moliaga o le talepe fale i le tulaga lua ma le gaoi.

O lo o taofia uma Leatigaga ma Leota i le toese e faatali ai le aso e lau ai a laua faasalaga i luma o le faamasinoga maualuga.

O le alii loia fautua ia Mike White o lo o tulai mo Leatigaga ae o Cabel  Poag  o lo o tulai mo le itu a le malo i lenei mataupu.

JIMMY FIDOW

O le alii lea na ia faaaogaina se fagupia e sasa ai foliga o se alii sa fai sa latou inugapia, ua poloaina e le faamasinoga na te tuua le teritori ma aumai ai i fafo atu mo le umi o lana faanofovaavaaia, pe afai e maea ona ia totogiina le pili o le falemai a le alii na manu’a i lana gaioiga sa fai.

E 7 tausaga na manatu le faamasinoga maualuga e loka ai Jimmy Fidow i le toese i Tafuna, ina ua tausala o ia i le moliaga  o le faaoolima i le tulaga lua, i lalo o se maliliega sa ia sainia ma le malo, lea foi na talia e le faamasinoga, peitai ua manatu le faamasinoga e faamalumalu le tuuina atu o le ua molia i le toese, ae o le a faanofovaavaaia o ia mo le 5 tausaga i lalo o poloaiga a le faamasinoga.

O nisii o poloaiga o le faanofovaavaaia a le ua molia e aofia ai lona tuua lea o le teritori ma aumau ai i fafo atu mo le 5 tausaga, pe afai lea e maea ona ia totogiina le tupe atoa o le pili o le falemai a le alii na aafia.

Fai mai le malo, o le faalavelave lea na mafua ai ona loka Fidow, na mafua mai i se inugapia a le ua molia ma nisi o ana uo, ma faai’u puta ai ina ua tulai mai se vevesi ma ta ai loa e Fidow foliga o le alii na aafia i se fagupia, ma taofia ai o i ai le falemai ina ua manaomia se togafitiga faatopetope ona o manu’a tuga na aafia ai ona foliga.

O isi poloaiga e aofia ai le faasa lea ona ia toe tagofia le ava malosi ao i ai pea o ia i le toese, pe na te toe solia foi se tulafono a le malo.

FAAI’U FAAMASINOGA FUSUAGA VA O NI ALII FALENIU MA ATU’U

Na faai’u i le faamasinoga se vevesi na tulai mai i le va o ni alii mai Faleniu ma nisi o le tupulaga a Atuu i le faaiuga o le vaiaso na te’a nei, ina ua agai atu leoleo ma taofia faapagota mai alii e toatolu mai Faleniu faatasi ai ma se alii se toatasi mai Atuu,  ona o se vevesi na tulai mai ai.

O i latou e toafa na taofia e leoleo e aofia ai Jeremiah Ta’ala, Sameli Ta’ala, Mathew Meleisea ma se alii e laititi i lalo o le tulafono.

Na tutulai i latou nei e toafa i luma o le faamasinoga faaitumalo i le taeao ananafi, ma o latou teena ai tuuaiga o le faatupu vevesi i nofoaga faitele e pei ona tuuaia ai i latou e le malo, ma ua toe tolopo ai loa a latou mataupu e toe fofogaina lea i le vaiaso fou.

I faamaumauga a le faamasinoga o loo taua ai e faapea, o se inugapia i le va o alii e toatolu mai Faleniu sa faia i se nofoaga e latalata i le kamupani i’a a le StarKist i Atu’u i le faaiuga o le vaiaso, na tulai mai ai se vevesi ina ua pisapisao le alii o Sameli, ma agai mai ai loa nisi o le tupulaga a Atuu ma amata ai loa le vevesi.

Na alu i le atoa le tuli a le au ula ia mai Faleniu ma susulu i le lotoa a le kamupani a le StarKist mo se fesoasoani, ma faafesootai ai loa e se alii leoleopo le ofisa o leoleo.

Na taunuu leoleo ma taofia alii e toatolu mai Faleniu, ae o le taimi foi lea na alu ai i le atoa le tuli a tamaiti Atuu, ma maua ai e leoleo na o le alii laititi lea e toafa i ai i latou na taofia ma auina atu loa i le ofisa mo suesuega, mulimuli ai taofia i le toese e faatali ai le taimi e tutulai ai i luma o le faamasinoga.