Ads by Google Ads by Google

Tala o Faamasinoga

MANAOMIA FAAMATALAGA LOIA MATAUPU FAASAGA ALII TOATOLU

Ao faagasolo ai pea i luma o le faamasinoga faafinauga a le malo ma loia tete’e i le mataupu o loo tuuaia ai ni alii toatolu, ona o le faalavelave lea na maliu ai se alii talavou i le tausaga na te’a nei i Malaeimi, ua faatonuina ai e le Faamasinoga Maualuga loia uma ina ia tuuina atu se ata faataitai o ituaiga faamatalaga, ia ua latou sauni e tuu atu i le taimi e faataunuu ai le faamasinoga autu o alii e toatolu o loo tuuaia i lenei mataupu.

O lea faatonuga mai le faamasinoga maualuga, na tuuina atu lea ina ua maea ona faailoa e loia a le itu tete’e lo latou teena o le manatu o le malo, ina ia fai faatasi le faamasinoga autu o i latou nei e toatolu.

Fai mai loia a le itu tete’e, e i ai itu o le a fete’ena’i ai lenei mataupu, pe afai ae fai faatasi le faamasinoga autu a Raponi Siaulaiga poo Sefo foi e pei ona iloa ai, o Migo Misa ma Neemaia poo Neemia Poamo.

Mo se faataitaiga o le tali tete’e a le alii loia ia David Vargas lea o loo tulai mo Siaulaiga, afai o le a fai faatasi le faamasinoga autu a i latou nei e toatolu, o le a le mafai ona valaau e le isi itu le isi o i latou e molimau le tasi, e le gata foi i lea, o le a le mafai foi ona tuuina atu e le tagata e toatasi lana molimau atoatoa e uiga i le mea sa tupu ona o lea o le a fai faatasi le latou faamasinoga autu.

O loo finau le malo e faapea, o le manatu ina ia tuu faatasi le faamasinoga faasaga ia i latou nei e toatolu, e le gata o le a sefe ai le taimi a le faamasinoga, ae o le a sefe ai foi mea e ono faaaluina ai i lenei mataupu.

O loo taofia pea i latou nei e toatolu i le toese e faatali ai le isi aso lea ua faatulaga e toe fofogaina ai a latou mataupu.

O loo tuuaia uma i latou i le moliaga o le fasioti tagata i le tulaga lua, ona o le faalavelave na  tulai mai ia Iuni 2011 i Malaeimi, ma mafua ai ona maliu le alii o Sio ‘Chico’ Faumui o Iliili.

NIUE NIUE

O le aso Faraile o le vaiaso nei lea ua faamoemoe e fofoga aloaia ai i luma o le faamasinoga maualuga, se maliliega na sainia e le malo ma le susuga Niue Niue, ina ua maua e le faamasinoga, o le maliliega lea na sainia e itu e lua i le 2010 peitai e le’i toe valaauina lava le mataupu a le ua molia.

O se tasi lenei o mataupu na mae’a ona faia se maliliega i le va o itu e lua, peitai sa le’i toe tuuina atu i luga o le kalena a le faamasinoga, e pei ona saunoa i ai le alii faamasino sili ia Michael Kruse i le vaiaso na tea nei.

Ua maea nei ona faila i luma o le faamasinoga le maliliega a Niue ma le malo, ma ua faamoemoe o le aso Faraile nei o le a fofogaina ai loa.

O Niue na taofia faatasi mai e leoleo i le tausaga e 2010 i Nuuuli ma lona atalii o Feleti Niue, ina ua maua i ai ni vaega o le laau faasaina o le mariuana.

O le taimi nei, ua maea ona tuli le faasalaga faafalepuipui a Feleti peitai ua toe taofia i le toese ina ua ia le usitai i tuutuuga o lana faanofovaavaaia, ae o lona tama o Niue, o loo tatalaina pea i tua e faatali ai le aso lea o lea toe tulai ai i luma o le faamasinoga.