Ads by Google Ads by Google

Tala o Faamasinoga

LOMITUSI FILIGA

O le aso 30 Mati lea ua faatulaga e lau ai le faasalaga a le alii o Lomitusi Filiga, ina ua talia e le Faamasinoga Maualuga le maliliega lea sa ia sainia ma le malo e faamuta ai lenei mataupu, ona o le faalavelave lea na tulai mai i le masina na tea nei, lea sa ia ta’i ai se fana i foliga o se tasi o ona au aiga.

E 5 moliaga na uluai tuuaia ai e le malo ia Filiga, lea e aofia ai le moliaga mamafa e tasi o le faaaoga faasolitulafono o se a’upega, atoa ai ma moliaga o le umia o se a’upega e le’i lesitalaina, umia faasolitulafono o ni ututau, faaoolima i le tulaga tolu ma le faatupu vevesi i nofoaga faitele.

Ae i lalo o le maliliega lea ua talia e le faamasinoga, ua tali ioe  ai Filiga i moliaga e tolu, e aofia ai lona umia faasolitulafono o se a’upega e le’i lesitalaina, umia faasolitulafono o ni ututau, faapea ai ma le faaoolima i le tulaga tolu, ae solofua e le faamasinoga le moliaga mamafa e tasi ma le moliaga mama o le faatupu vevesi i nofoaga faitele.

Ua malilie loia a itu e lua o le a tuuina atu ni a laua faafinauga i le faamasinoga mo se faasalaga mama mo Filiga, peitai ua manino le ua molia tusa lava pe talosaga loia i le faamasinoga mo se faasalaga mama mo ia, e pule le faamasinoga pe talia pe teena ia faafinauga.

Ua ia malamalama foi ma talia, afai e tuuina mai se faasalaga a le faamasinoga ae le tusa ai a lona loto, e le mafai ona toe suia lana tali ioe ua tuuina atu.

O lenei faalavelave na tulai mai i Fagatogo, ina ua ta’i e le ua molia le fana i foliga o le alii na aafia ao ‘ona o ia, ma alu ai loa le alii na aafia ma faila lana tagi i le Ofisa o leoleo, ae ina ua fesiligia e leoleo le ua molia, sa ia faailoa ai i leoleo, e lei i ai sona mafaufau e faamanu’alia le na aafia, ae o ana mea ula lava sa fai i ai .

IOANE TUUMALO

O le alii aoga mai le aoga maualuga a Tafuna lea na tuuaia i lona umia faasolitulafono o silaketi mariuana, ua ia ta’utino i luma o le faamasinoga, e faamaonia tuuaiga a le malo faasaga ia te ia.

O le vaiaso na tea nei na talia e le faamasinoga maualuga le maliliega na sainia e Ioane Tuumalo ma le malo, ina ia tau faamama le moliaga mamafa lea na tuuaia ai le ua molia, ina ia tali ioe o ia i le moliaga o lona umia faasolitulafono o vaega o le laau mariuana, o se solitulafono e mafai ona faasalaga ai o ia i le toese e amata atu i le aso e tasi e oo atu i le 5 tausaga, i le toese, pe faasala foi i se salatupe e le mafai ona silia ma le $5,000.

Ina ua fesiligia e le faamasinoga na taua ai e Tuumalo e faapea, o ia sa alu i le fale taele a le aoga ae ona vaaia ai se pepa iila o loo taatia i lalo o le fola o le fale, ona ia pikiina lea i luga ma ia maua ai i totonu ni sikaleti mariuana.

Na taua e Tuumalo, ina ua sailia e se alii Ofisa a le aoga taga o lona ofu sa sai, sa maua i ai ni sikaleti mariuana se fa sa i totonu o le pepa iila sa i totonu o lona ofu.

Ina ua talia e le faamasinoga le tali ioe a Tuumalo, sa talosaga ai loa  lana loia o Ruth Risch-Fuatagavi ina ia tatala o ia i tua e faatali ai le aso e lau ai lona faasalaga, peitai ina ua maea se talanoaga puupuu a alii faamasingoa, sa laua tuuina mai ai loa le faaiuga ina ia faaauau pea le taofia o Tuumalo i le toese, sei vagana ua ia totogi le $10,000 ona faatoa mafai lea ona tatala o ia i tua.

O le aso 19 Aperila lea ua faatulaga e lau ai le faasalaga a le ua molia lea o loo taofia pea i le toese i Tafuna.

ELIOTA SIAUMAU SR.

O le lauina o le faasalaga  a le susuga ia Eliota Siaumau Sr lea sa fuafua e faia i le aso Faraile na tea nei, ua toe tolopo  e le faamasinoga i le aso 30 Mati.

O le sususga Eliota Sr ua ta’usala i le ave taavale ‘ona ma le alu ese ma leoleo ina ua taumafai leoleo e taofia lana taavale i le po o le tausaga fou 2010.

Ina ua talia e le faamasinoga le maliliega na sainia e le ua molia ma le malo, sa poloaina ai loa o ia e le faamasino sili ina ia aua ne’i ona toe aveina se taavale ao faatali ai le aso e lau ai lona faasalaga.