SAGELE SAGELE

O le alii lea na se’i e le Fa’amasinoga Fa’aitumalo lana laisene ave taavale, ina ua ta’usala e le faamasinoga o ia i le solitulafono o le ave taavale ‘ona, ua faamaonia nei e le faamasinoga faaitumalo le moliaga o le ave taavale a’o se’i lana laisene ave taavale, ma ua faamoemoe o le aso 12 Aperila o le a lauina ai lona faasalaga.

O le moliaga o le ave taavale a’o se’i le laisene, o se solitulafono mamafa e faamalosi ai le loka o se tasi i le toese mo le umi e amata atu i le 90 aso, ae le sili atu ma le 5 tausaga, pe faasala foi i le salatupe e le silia ma le $5,000, ia poo le faasala foi i faasalaga uma ia e lua.

I faamaumauga a le faamasinoga na taua ai e faapea, na taofi e leoleo le taavale na ave e Sagele ao agai atu e momoli lana fanau i le falema’i, ina ua leai se isi e mafai ona aveina le taavale i le taimi o le appointment a lana fanau.

Ua poloaina e le faamasinoga se ripoti mai le Ofisa Faanofovaavaaia mo Sagele ina ia fuafua ai e le faamasinoga se ituaiga faasalaga e talafeagai mo ia.

CALVIN IOAPO

O le alii ‘ona lea na ulufale faamalosi i totonu o le fale o se tasi o ona tuaoi ma gaoi le DVD player mai totonu o le fale, ua faamoemoe le malo e tatau ona maea le vaiaso lenei ua latou failaina moliaga faaopoopo faasaga ia te ia.

 O le alii o Calvin Ioapo na taofia e leoleo i le faaiuga o le vaiaso na tea nei, ma tulai ai i luma o le faamasinoga faaitumalo e tali i le moliaga mama o le faatupu vevesi i nofoaga faitele.

I faamaumauga a le faamasinoga na taua ai e faapea, na agai atu le ua molia e ‘ona i le fale  o le tagata sa tagi, ma fesili i ai i se DVD sa faasalalau o loo fia faatau atu.  Ao uu e le ua molia le DVD, sa fai i le tagata e ana ia le DVD, e i ai le tupe o loo i se tasi o ana uo e nofo latalata atu i le nofoaga lea, e mafai ona avatu e faatau ai le DVD, peitai na tei le tagata e ana le DVD ina ua alu i le atoa le ua molia ma ave lana DVD.

O lo o fa’aauau pea suesuega a le malo e uiga i lenei mataupu.

PIO FAGAAUTAU

O le alii lea o lo o tuuaia i le talepe  fale ma le gaoi, ona o se faalavelave na tulai mai i le tausaga na tea nei, ina ua ia gaoia ni mea aoga mai se fale a se tasi o ona au aiga, ua faatulaga le isi ana iloiloga e faia lea i le aso 2 Aperila, ina ua talia e le faamasinoga le talosaga na faaulu e lana loia ina ia tuu atu se isi taimi faaopoopo e faaauau ai feutanaiga ma loia a le malo mo se maliliega e faamuta ai lenei mataupu.

O lo o taofia pea i le toese le alii o Pio Fagaautau ina ua le mafai ona ia totogiina le $15,000 sa faatulaga e le faamasinoga e tatala ai o ia i tua.

I faamaumauga a le faamasinoga o loo taua ai e faapea, o le aso 7 Tesema 2011 pe tusa o le 5:00 i le vaveao, na ulufale faamalosi ai le ua molia i totonu o le fale a se tasi o ona au aiga, ma ia gaoia ai seevae,  telefoni ma se tupe.

Na mafai ona iloa lenei gaioiga ina ua ala a’e i luga se  tasi o le aiga ma ia vaaia ai le ua molia o loo fealuai i totonu o le latou fale.

Na faailoa e le loia a le ua molia o Mike White i le faamasinoga e faapea, e i ai lona talitonuga e tatau ona oo atu i le aso lea ua toe faatulaga i ai le isi iloiloga o lenei mataupu, ua maua se maliliega a le ua molia ma le malo e faamuta ai lenei mataupu.