Ads by Google Ads by Google

Tala o Faamasinoga

MOLIA INA UA IA FAAOOLIMA I LONA TOALUA A’O MA’ITAGA

O le alii lea o loo tuuaia i lona faaoolima lea isi ona toalua a’o ma’itaga o ia, ua tuuaia nei e le malo i moliaga o le faatupu vevesi i nofoaga faitele, faatupu vevesi i totonu o lona aiga, faaoolima i le tulaga tolu ma le tete’e atu i leoleo a’o taumafai e taofia faapagota o ia.

O le vaiaso na tea nei na tulai mai ai lenei faalavelave, ina ua ‘ona atu le ua molia i le fale ma faaleaga mea i totonu o le fale, ma faai’u ane ai loa i le fasiina o si ona toalua o loo ma’itaga.

I faamaumauga a le faamasinoga o loo taua ai e faapea, ina ua taunuu leoleo ma taumafai e loka le ua molia, sa taumafai foi o ia e tetee atu i leoleo. E $1,000 le tupe sa faatulaga e le faamasinoga e tatala ai le ua molia i tua, ae ina ua uma faafinauga a loia ma talia e le faamasinoga, na faaitiitia ai loa le tupe i le $300.

Afai ae mafai ona tatala le ua molia i tua, ua poloaina o ia e le faamasinoga e aua nei toe taumafai e faafesootai lona toalua i soo se auala, sei vagana ua tuuina atu se isi poloaiga a le faamasinoga.

O le tamaitai loia fautua ia Donna Clement o loo tulai mo le ua molia, ae o Blake Hanley o loo tulai mo le malo.

JOE LEOTA MA MICHAEL LEATIGAGA

Ua toe tolopo e le faamasinoga maualuga uluai iloiloga sa faatulaga mo alii e toalua, ia o loo tuuaia i lo la ave faagaoi o pusa wahoo e silia ma le 200 mai le kamupani tuuapa o le StarKist Samoa, ina ua faailoa e a la loia le taumafai pea ma le malo mo se maliliega e faamuta ai lenei mataupu.

O loo taofia pea i le toese i Tafuna ia Joe Leota ma Michael Leatigaga ina ua le mafai ona la totogiina le tupe ua faatulaga e tatala  ai i laua, e faatalitali ai le aso 2 Aperila lea ua faamoemoe e toe fofogaina ai a la mataupu.

O Leota o loo tuuaia i le talepe fale i le tulaga  muamua ma le gaoi, ae o Leatigaga o loo tuuaia i le gaoi ma lona taliaina o ni oloa sa ave faagaoi.

I faamaumauga a le faamasinoga o loo taua ai le agai atu o Leota ma aveese mai pusa wahoo mai le fale teu oloa a le kamupani, ona la’u lea i luga o le taavale a Leatigaga ma la agai atu ai loa ma faatau atu i nisi o faleoloa i le atunu.

Ina ua saili e leoleo pusa  wahoo na ave faagaoi, na mafai ai ona toe maua se vaega tele mai faleoloa ia sa faatau atu i ai e i laua ua tuuaia pusa nei.

O loo tumau pea le tete’e o Leatigaga ma Leota i tuuaiga a le malo.

TETE’E LE AU TAUAI TAAVALE I MOLIAGA A LE MALO

O alii talavou e toafa ia o loo tuuaia i le tauaiina lea o taavale a leoleo i le tausaga na tea nei i Nuuuli, ua latou teena moliaga faasaga ia te i laua, ina ua tutulai i luma o le faamasinoga maualuga i le vaiaso nei.

I le teena ai e i latou ia e toafa o moliaga a le malo, ua faatulaga ai loa a latou uluai iloiloga e faia lea i le aso 12 Aperila.

O i latou e toafa e aofia ai Vani Atafua, Siaosi Laulu, Benjamin Maybir ma Iosefa Falealo lea o loo tuuaia i le faaleaga meatotino i le tulaga lua ma le faatupu vevesi i nofoaga faitele.

O loo molia faatasi ma i latou ia e toafa alii toatolu e laiti i lalo o le tulafono, lea o loo molia i le moliaga mamafa o le faaoolima i le tulaga muamua ma le faaleaga meatotino i le tulaga lua.

I faamaumauga a le faamasinoga o loo taua ai le tauai e i latou nei o le taavale a le alii leoleo ia Lt. Fasi Taase, faaleaga ai le taavale ma manu’a ai le alii leoleo.

Fai mai faamaumauga a le faamasinoga, e tolu taavale leoleo na tauai e i latou nei i Nuuuli i le po na tulai mai ai lenei faalavelave.

E $10,000 ua faatulaga e le faamasinoga e tatala ai i latou nei i tua mai le toese. E tusa ma le $1,000 sa manaomia e faaleleia ai le isi taavale leoleo na faaleagaina ae o le isi taavale e $950 sa manaomia e toe faaleleia ai mea na faaleagaina.