LT. RAYMOND NOAUa ta’oto atu nei i se faaiuga a le faamasinoga maualuga le talosaga na faaulu e le loia a le alii leoleo o Lt. Raymond Noa, e talosagaina ai le faamasinoga ina ia toe faia se faamasinoga iloilo fou a le ua molia.O le Aso Faraile na te’a nei na fofogaina ai lenei mata’upu i luma o le fa’amasinoga, i le mae’a ai lea ona ta’usalaina e se vaega iloilo iuga o Lt. Noa i le masina o Aokuso na te’a nei i le moliaga o le faaoolima i le tulaga lua, faaleaga meatotino i le tulaga lua, ma le faatupu vevesi i nofoaga faitele.Ona o le fa’aiuga a le vaega iloilo iuga e tausalaina ai Lt. Noa, na faasala ai loa e le faamasinoga le ua molia i le toese i Tafuna mo le umi e 5 tausaga.O moliaga ua tausalaina ai Lt. Noa na afua mai lea i se faalavelave na tulai mai i luma o le fale kalapu o le Rubbles Tavern lea ua tapunia nei i Nuuuli, ina ua ia faaoolima i le alii o Afa “Arthur” Blake e ala i lona togiina lea o ia i se fagupia, kiki ma feanu ia te ia a’o taoto i lalo, faapea ai ma lona faaleagaina o le tioata o se taavale sa tu ai i le vaega e paka ai taavale a le Rubbles.O lo o taofia pea Lt. Noa i le toese i Tafuna i le taimi nei e tuli ai lona faasalaga faafalepuipui, e faatali ai se faaiuga a le faamasinoga e tusa ai o lana talosaga ua tuuina atu.LAGA TUIO le alii talavou lea na tuuaia e le malo i lona faaaogaina o se agaese e faaoo ai ni manu’a i se isi alii i Pava’ia’i, i le faaiuga o le vaiaso i ona tua atu na tea nei, ua molia nei e le malo i le moliaga mamafa o le faaoolima i le tulaga lua, le solitulafono e mafai ona faasala ai se tasi i le toese mo le olaga atoa, poo le faasala foi i le 10 e oo atu i le 30 tausaga.O loo taofia pea i le toese i Tafuna le alii o Laga Tui e aunoa ma se tupe ua faatulaga e tatala ai o ia i tua, ona o tulaga faaletonu i ona pepa nofomau, e pei ona taua i faamaumauga a le faamasinoga.I faamaumauga a le faamasinoga o loo taua ai, o se feeseeseaiga na tulai mai i le va o le ua molia ma le alii na aafia, na mafua ai loa ona tulai mai lenei faalavelave, ina ua faaaoga e le ua molia se agaese e faaoo ai manua i le tino o le alii na aafia, ma taofia ai loa o ia i le falemai.Na taua e le loia a le malo ia Blake Hanley le matuia o manu’a na aafia ai le alii na manu’a i lenei faalavelave.AFA “ARTHUR” BLAKEO le aso 14 Me 2012 lea ua faatulaga e le faamasinoga e fai ai le faamasinoga autu o le alii o Afa “Arthur” Blake, i le maea ai lea ona tauaao e le faamasinoga o le ripoti lea na saunia e le fomai sa suesueina le mafaufau o le alii o Blake, e iloilo ai pe gafatia e le ua molia ona tulai i le taimi o lona faamasinoga autu.Saunoa le alii faamasino sili ia Michael Kruse, o le faaiuga a le faamasinoga ina ia faatulaga loa le aso e valaauina ai le faamasinoga autu o lenei mataupu, o loo faavae mai lea i le fautuaga o loo i le vaega faaiu o le ripoti a le foma’i na suesueina le mafaufau o Blake.E lei faalaua’itele e le faamasinoga vaega faaiu o loo i totonu o le ripoti.O Blake o loo tuuaia i le moliaga o le faaoolima i le tulaga muamua, ona o se faalavelave na tulai mai i le tausaga na tea nei, lea sa ia taumafai ai e faaoo ni manu’a i se alii e ala i lona taina lea o ia i se agaese i le taimi a’o faia se taaloga volipolo, peitai na misi le ta e pei ona taua i faamaumauga a le faamasinoga.O loo taofia pea i le toese i Tafuna Blake e faatali ai le aso lea ua faatulaga e valaauina ai lana mataupu ma le faamoemoe, afai ae i ai se maliliega e ono faia e le malo ma le ua molia e faaiuina ai lenei mataupu, ona toe valaauina loa lea o le mataupu a Blake i se taimi lata mai.