TAU MALAE

O le alii lea o lo o tu’ua’ia e le malo i lona faia o ni amioga mataga i ni tei laiti o si ona faletua, ua fa’atulaga e le fa’amasinoga le aso 17 Iulai 2012, e faia ai lona fa’amasinoga autu.

Talu mai le taimi na faila ai e le malo moliaga mamafa fa’asaga ia Malae, o lo o tumau pea lona tete’e i ia moliaga. O lo o tu’uaia Malae i moliaga e aofia ai le faia o uiga fa’asotoma, lua moliaga o lona tagofia o itutinosa o ni tamaitai se toalua, lua moliaga o le faia o ni uiga fa’afeusuaiga i ni tamaitai se toalua, fa’atasi ai ma le moliaga e tasi o le fai’aiga fa’amalosi.

O lo o taofia pea i le to’ese i Tafuna ia Malae, ina ua le mafai ona ia totogia le $50,000 na faatulaga e tatala ai o ia.

O le susuga i le alii loia o Fiti Sunia, o lo o tula’i mo Malae, ae o tama’ita’i loia sili lagolago ia Mitzie Folau, o lo o tula’i mo le malo.

O lenei mata’upu na tofu atu i le ofisa o leoleo ina ua faila e se aiga o tamaitai na a’afia se tagi i le fa’amasinoga fa’asaga ia Malae. I fa’amaumauga a le fa’amasinoga o lo o ta’ua ai e fa’apea, o tamaitai e to’alua na aa’fia, sa ta’i 16 o la tausaga i le taimi na tupu mai ai lenei faalavelave.

E tusa ai ma fa’amaumauga a le fa’amasinoga o lo o ta’ua ai e fa’apea, e le i mafai e tama’itae ’i nei ona fa’amaonia i leoleo le aofa’i o taimi, na faia ai e le ua molia nei gaioiga ia te i laua, ma o nisi taimi e fasi, fa’afefe i laua o le a toe fa’afoi i Upolu pe afai la te ta’uina i se isi le mea o lo o tupu.

Na fa’ailoa e nei tama’ita’i i leoleo, na fa’ato’ese Malae ia i la’ua i se talanoaga a le latou aiga sa faia i le aso 22 o Tesema, 2001.

O lo o ta’ua i fa’amaumauga a le fa’amasinoga, le ioeina e Malae, i leoleo, lona faia o nei gaioiga i tama’ita’i na a’afia i lenei fa’alavelave ma sa ta’ua fo’i e lona to’alua i leoleo, lona iloa o lo o tupu lenei fa’alavelave i nai ona tei.

IOANE TU’UMALO

Na talia e le Fa’amasinoga Maualuga i le vaiaso na te’a nei se talosaga na fa’aulu e le loia a Ioane Tuumalo, mo se taimi se’i iloilo ai fa’amaumauga e uiga i lenei mataupu, ma sa’ili se maliliega e fa’amuta ai lenei mata’upu.

O Tuumalo, o se alii aoga e 18 tausaga, o lo o tu’ua’ia i lona umia fa’asolitulafono o ni vaega o le la’au fa’asaina o le mariuana, ina ua maua ia te ia, ni sikaleti mariuana i totonu o le lotoa a lana aoga i le masina na tea nei.

O lo o ta’ua i fa’amaumauga a le fa’amasinoga, e le gata ina maua le ula e Tuumalo o le sikaleti mariuana i totonu o le fale ta’ele a le a’oga, ae sa maua fo’i ni sikaleti se tolu i totonu o le taga o lona ofu o lo o fai, ae ina ua fesiligia o ia, sa ia taua, o se pepa sa ia mauaina i totonu o le fale taele, sa i ai ni sikaleti se fa.

Na faia e leoleo se suega i sikaleti e tolu na maua ia Tuumalo ma fa’amaonia ai, o mariuana mea ia.

O le aso 12 Aperila lea ua toe tolopo i ai le mataupu a Tuumalo, ma o lo o taofia pea o ia i le toese ina ua le mafai ona ia totogia le $10,000 sa fa’atulaga e tatala ai o ia i tua.

O le alii loia fautua ia Mike White o lo o tulai mo Tuumalo ae o Cabel Poag o lo o tulai mo le malo i le mataupu lenei.

MATAFUA MATAIPULE

Ua toe tolopoina le ulua’i iloiloga o le ali’i sa leoleo po i le Pago Plaza, ona o se talosaga a lana loia ia Mike White, mo se taimi e fa’aauau ai talanoaga ma feutuna’iga ma le itu a le malo.

O le alii o Matafua Mataipule o lo o tu’uaia e le malo i moliaga mamafa e lua, e aofia ai le umi fa’asolitulafono o fuala’au fa’asaina o le mariuana, atoa ai ma le umia fa’asolitulafono ma le fa’amoemoe e tulei ma fa’atau atu i isi tagata.

I fa’amaumauga a le fa’amasinoga o lo o taua ai e fa’apea, na fa’atulaga e leoleo se osofaiga fa’apitoa ina ia mafai ona fa’atau mai ai e se tagata ni sikaleti mariuana mai ia Mataipule, ma auina atu ai e leoleo se tagata faapitoa na te faatauina mai se sikaleti mai le ua molia.

Na tuu e leoleo le $10 i le tagata faapitoa lea mo le faatauina mai o sikaleti mai le alii leoleo, ma latou auina atu ai sikaleti mo le faia i ai o ni suega, lea na faamaonia ai mariuana mea ia.

A’o lei faataunuuina e leoleo le poloaiga a le faamasinoga e sailia ai le tino ma meatotino uma a le ua molia, sa latou toe faia le isi faatau faapitoa e ala i le auina atu o se tagata e fai mai sa latou faatau mai ia Mataipule, ma faatau mai ai e le tagata lea sikaleti e fa, ae o le taimi lava foi lea na agai atu ai loa leoleo ma o latou osofaia loa ma ia, ma maua i ai isi sikaleti mariuana i lona ofu sa fai.

O lo o taofia pea i le toese le ua molia e faatali ai le aso 30 Mati lea ua faatulaga e toe fofogaina ai lana mataupu i luma o le faamasinoga maualuga.