LAUMOLI NANSEN

O lo o loka pea i le to’ese i Tafuna, ia se ali’i na ona ma pisapisa o solo i Pago Pago, i le po o le Aso Lulu na te’a nei, e fa’atali ai le isi ana iloiloga lea ua fa’atulaga mo le Aso Gafua o le vaiaso fou, ina ua maua i fa’amaumauga a le fa’amasinoga, ua mae’a le aoga o le pemita e 30 aso na malaga mai ai i le teritori.

O le alii o Laumoli Nansen sa ta’usalaina foi e le fa’amasinoga i lona solia o tulafono tau ta’avale afi i luga o le alatele, ma poloaina ai lona totogia o se sala tupe e $300, peitai e taofia e leoleo i le po o le Aso Lulu na te’a nei, e le i totogia lava.

I fa’amaumauga mai le Ofisa o Femalagaaiga na ta’ua ai e fa’apea, o le masina o Oketopa 2010 na malaga mai ai Nansen i se pemita 30 aso, ma e o’o mai lava i le taimi nei, e lei toe fa’afouina lona aumau ai i le teritori.

Na fa’ailoa e le malo i le taeao ananafi, lo latou sauni e tu’uina atu se tusi saisai e poloa’i ai le taofia pea o Nansen i le falepuipui i Tafuna, ina ua le tusa lona aumau ai i le teritori ma tulafono tau Femalagaaiga a le malo o Amerika Samoa.

O le Aso Gafua o le vaiaso fou lea ua fa’amoemoe e toe vala’auina ai le mataupu a le ua molia i luma o le fa’amasinoga, ma fa’atulaga ai loa se aso e tatau ona toe fa’afo’i atu ai o ia i lona atunu’u, pe afai e talia e le fa’amasinoga se maliliega o le a latou sainia ma le malo.

KERETI LAFOGA

Ua te’ena e se ali’i talavou, lea ua tu’ua’ia e le malo i lona sasaina o le ulu o se fa’atauoloa fafine i se paipa, ina ua taofi e le fa’atauoloa le .50 sene o lana sui, e totogi ai sana aitalafu mai le isi ana faatauga, ia moliaga o le fa’atupu vevesi i nofoaga faitele ma le fa’ao’olima i le tulaga tolu, ina ua tulai i luma o le Fa’amasinoga Fa’aitumalo i le taeao ananafi.

Ua fa’atulaga nei e le malo ia se isi iloiloga mo Kereti Lafoga, e faia i le aso 20 o Mati, lea foi ua fa’amoemoe le malo e tatau ona o’o atu i le aso lea, ua mae’a su’esu’ega a leoleo ma iloa tonu ai pe i ai nisi moliaga fa’aopoopo e ono faila faa’saga ia Lafoga.

O lenei fa’alavelave na tula’i mai i Afono, e pei ona ta’ua i totonu o fa’amaumauga a le fa’amasinoga.  E $200 lea ua faatulaga e le faamasinoga e tatau ona totogi e Lafoga, ona fa’atoa mafai ona tatala i tua mai le toese.

Ae afai e mafai ona tatala i tua, ua faasa e le faamasinoga ona toe alu i le faleoloa lea na tulai mai ai le faalavelave e pei ona molia ai o ia e le malo, pe na te toe soliina foi se tulafono a le malo, ae ia fesootai ma lana loia i soo se taimi e valaau ai lana mataupu.

Ua faasa e le faamasinoga le ua molia ona ia toe tagofia le ava malosi, ma ua poloina foi le tuuina atu o ona malaga e taofi e le malo sei maea lana mataupu ona faatoa mafai lea ona toe tuu atu ia te ia.

KEIANA TALAESE

O le tamaitai talavou lea na tu’ua’ia e le malo i le vaiaso na tea nei i lona umia faasolitulafono o ni vaega o le laau faasaina o le mariuana, na toe tulai i luma o le Faamasinoga Faaitumalo i le taeao ananafi, ona o se isi moliaga fou faasaga ia te ia, o lona sola ese lea mai le toese i Tafuna ao taofia ai o ia.

Na te’ena e Keiana Talaese le moli’aga fou a le malo fa’asaga ia te ia, ina ua tula’i i le taeao ananafi. Sa manatu le fa’amasinoga o le a fa’atulaga sana iloiloga fa’apitoa e iloilo ai mau a le malo, pe fa’amaonia lona sola ese lea mai le to’ese, peitai sa le i faataunuuina lea iloiloga, ona ua manatu Talaese e faaagafua ona aia tatau, ae tuu sao atu loa lana mataupu i luma o le Faamasinoga Maualuga.

O le taeao nei lea ua fa’amoemoe e tula’i ai Talaese i luma o le faamasinoga ae o lo o taofia pea o ia i le falepuipui ina ua le mafai ona ia totogia le $20,000 na faatulaga e le faamasinoga.

O le masina na te’a nei na maua ai ni vaega o lau mariuana ia Talaese ina ua agai atu leoleo ma aumaia o ia i le vaega o lo o i ai le uafu o vaa faila i Malaloa, ae ina ua taunu’u atu o ia i le ofisa o leoleo, sa tuuaia foi lona agai atu i le fale le ta’ua ma fa’atama’ia ai nei fuala’au fa’asaina.

O le masina fou lea ua faatulaga e fofogaina ai le uluai iloiloga a Talaese ma isi e toatolu o lo o tuuaia i le umia o fualaau faasaina.