Ads by Google Ads by Google

Tala o Faamasinoga

ALOSIO LEPOU

O le tama matua pe a ma le 60 tausaga, lea na tulai i luma o le Faamasinoga Faaitumalo i le taeao ananafi, ona o tuuaiga i lona faaaogaina lea o se telefoni e faalavelave ai i se tamaitai, ua poloaina e le faamasinoga o ia e aua nei ona toe faia nisi lava gaioiga e faalavelave ai i le mafine lea, e ala i lona faaaogaina o se telefoni poo fesootaiga foi i luga o le facebook.

Na teena e le tama o Alosio Lepou tuuaiga o lona faia lea o ni gaioiga i luga o le telefoni e pala ai le mafine na aafia, ma o lea solitulafono o le vaega A lea o solitulafono mama, lea e mafai ona faasala ai o ia i le toese mo le umi e le silia ma le tasi le tausaga, poo le salatupe e $1,000 pe faasala uma foi i faasalaga uma ia e lua.

I faamaumauga a le faamasinoga o loo taua ai e faapea, o gaioiga a le ua molia na afua  mai i le masina o Setema 2011 e oo mai i le masina o Fepuari na tea nei.

Ina ua maea le uluai iloiloga a le ua molia i le taeao ananafi, na toe tatala ai loa o ia i tua mai le toese e aunoa ma se tupe na faatulaga e le faamasinoga, faatasi ai ma tuutuuga e ao ona usitai i ai.

O nisi o ia poloaiga e aofia ai le faasa lea ona ia toe taumafai e faafesootai le mafine o loo aafia i soo se taimi ma soo se auala.

Ua faasa foi ona ia toe soli se isi tulafono, a ia fesootai vavalalata ma lana loia i soo se taimi, ma ia auai i soo se taimi e valaau ai lana mataupu.

FA’AEA TAFEA

O le alii lea na se’i e le faamasinoga faaitumalo lona laisene ave taavale i le tausaga na tea nei, ina ua ta’usala o ia i le moliaga o le ave taavale ‘ona, ua molia nei i le moliaga mamafa o le ave taavale a’o se’i lona laisene, ma o lea moliaga e ono mafai ona faasala ai se tasi i le toese mo le umi e faamalosia le tuli o le 90 aso, ae le mafai ona silia ma le  5 tausaga.

Ina ua tulai Faaea Tafea i luma o le faamasinoga faaitumalo i le vaiaso nei, sa ia teena ai tuuaiga faasaga ia te ia, sa ia faaagafua foi ona aia tatau ina ia aua ai nei faataunuuina lana uluai iloiloga sa fuafua e faia i luma o le alii faamasino o John Ward II, ma ua faatulaga ai loa le isi ana iloiloga e faia lea i le aso 12 o Mati.

I faamaumauga a le faamasinoga o loo taua ai e faapea, na taofia e leoleo se taavale i luga o le alatele ina ua latou vaaia ua uma le aoga o le laisene.

Na taofi e leoleo le taavale ma latou vaaia ai le ua molia i totonu, o ia o le ave taavale.

E $3,000 ua faatulaga e le faamasinoga e totogi ona faatoa mafai lea ona tatala Tafea i tua mai le toese i Tafuna