Ads by Google Ads by Google

Tala o Faamasinoga

LOMITUSI FILIAGA

Na te’ena e le ali’i o lo o tu’ua’ia i le ta’i ina o se fana i se tamaititi, ia ona moliaga, ina ua tula’i i luma o le Fa’amasinoga Fa’aitumalo i le vaiaso nei.

O le Aso Lua na tea nei na faila ai e le malo moliaga fa’aopoopo fa’asaga ia Lomitusi Filiaga, lea ua molia ai nei o ia i moliaga o lona fa’aaoga fa’asolitulafono o se a’upega, umia fa’asolitulafono o se aupega e lei lesitalaina, umia fa’asolitulafono o ni pulufana, fa’ao’olima i le tulaga tolu, atoa ai ma le fa’atupu vevesi i nofoaga faitele e pei ona uluai tuuaia i o ia e le malo i lenei mataupu.

O le faalavelave e pei ona tuuaia ai Filiaga e le malo na tulai mai lea i Fogagogo i le aso Lua o le vaiaso na te’a nei, a’o ‘ona le ua molia e pei ona taua i faamaumauga a le faamasinoga.

Na faamatala e le alii na aafia i leoleo ina ua alu e faila lana tagi faasaga i le ua molia, le ta’i atu lea e le ua molia o se fana ia te ia.

Na agai atu leoleo ma taofia mai le ua molia ina ua maea ona faila le tagi a le alii na aafia, ina ua fesiligia o ia e leoleo, sa ia taua ai e faapea, o gaioiga uma sa ia faia i le alii na aafia, o ana mea pepelo lava.

O loo tumau pea poloaiga a le faamasinoga o loo tatala ai le ua molia i tua e faatali ai le aso lea ua faatulaga e faia ai lana uluai iloiloga i luma o le faamasinoga faaitumalo.

FAAFETAI ATIMALALA

O le alii mai Nuuuli lea o loo tuuaia e le malo i lona umia faasolitulafono lea o ni laau faasaina o le mariuana, ua ia teena tuuaiga faasaga ia te ia ina ua tulai i luma o le faamasinoga maualuga i le taeao ananafi.

I le teena ai e le alii o Faafetai Atimalala o tuuaiga a le malo, ua faatulaga ai loa lana uluai iloiloga e faia i le aso 22 Mati i luma o le alii faamasino sili lagolago ia Lyle L. Richmond, ma afioga i alii faamasino lagolago ia Mamea Sala ma Faamausili Faasua Poumele.

O tuuaiga faasaga ia Atimalala na alia’e mai lea ina ua osofaia e leoleo lona fale i Nuuuli i lalo o se poloaiga mai le faamasinoga, ina ua masalomia lona  umia faasolitulafono o vaega o laau faasaina.

I lea osofaiga e pei ona taua i faamaumauga a le faamasinoga, o loo tuuaia le maua i ai i lona fanua o ni laau mariuana e tusa ma le 13, o ni sikaleti mariuana se 5, faapea ai ma ni paipa e faaaoga i le ulaina lea o le pauta oona o le aisa.

O loo teena e Atimalala tuuaiga faasaga ia te ia, ma o loo taofia pea o ia i le toese ina ua le mafai ona ia totogiina le $50,000 na faatulaga e tatala ai o ia i tua.

JIMMY FIDOW

O le alii lea na ia faaoolima i se isi alii i se inugapia na faia i le masina na tea nei, ua toe tolopo lana uluai iloiloga e toe  valaauina i le aso 3 Mati, lea ua faamoemoe lana loia e tatau ona oo atu ai i le taimi lea, ua mautu talanoaga  o loo faia ma le malo mo se maliliega aufaatasi e faamuta ai lenei mataupu.

O le alii o Jimmy Fidow lea o loo taofia pea i le toese i le taimi nei ina ua le mafai ona ia totogiina le tupe na faatulaga e tatala ai o ia i tua, o loo ia teena le moliaga o le faaoolima i le tulaga lua e pei ona tuuaia o ia e le malo.

O le aso ananafi na faatulaga e faia ai lana uluai iloiloga, peitai na faailoa e lana loia o Mike White i le faamasinoga e faapea, o loo faaauau pea a latou talanoaga ma le malo mo se maliliega aufaatasi e faamuta ai lenei mataupu, ma o loo i ai le manatu e tatau ona maea le lua vaiaso ua mautu talanoaga o loo faia.

Na talia e le faamasinoga le talosaga a le itu tetee ina ia toe tolopo lenei mataupu, ma ua toe taofia nei Fidow i le toese e faatali ai le aso lea ua faatulaga e toe valaauina ai lana mataupu.