LEO FA’AFUA & KALOLO JR SEMAIA

O le Aso Tofi o le vaiaso nei lea ua fa’amoemoe le malo, e tatau ona o’o atu i ai, ua manino se tulaga tonu e uiga i moliaga fa’aopoopo faasaga i alii se toalua ia o lo o tu’ua’ia i lo la fasi fa’amo’amo’aina o se alii ave pasi.

Na fa’ailoa e le tamaitai loia sili lagolago ia Camille Philippe i le fa’amasinoga, o lo o fa’aauau pea su’esu’ega a leoleo fa’asaga i le mataupu lea o lo o tu’ua’ia ai Leo Fa’afua ma Kalolo Jr Semaia, i lo la fa’ao’olima lea i se alii ave pasi e 58 tausaga le matua.

O le taimi nei, o lo o tuuaia Fa’afua ma Semaia i le fa’ao’olima i le tulaga tolu, fa’atasi ai ma le moliaga o le fa’aleaga meatotino o lo o tuuaia ai Fa’afua,  ona o ia lea o lo o tuuaia e le malo, sa ia togia le tioata o le pasi i se ma’a, ina ua mae’a ona la fa’ao’olima i le ave pasi.

O le vevesi na mafua mai ina ua tulai mai se fe’ese’esea’iga i le va o Fa’afua ma le ave pasi i le taeao, ae o’o ai loa i le afiafi fa’atu e le aualii ia le pasi ae fasi le ave pasi.

TALIGALU AH SIU

O le alii talavou lea na alu fa’amalosi i totonu o le fale a se aiga i Vaitogi, i le  tausaga na te’a nei, ma ia sasaina le ulu o se tagata sa moe i totonu o le fale, i le ‘monitor’ o se komepiuta, ua fa’atulaga le lauina o lona fa’asalaga i luma o le Fa’amasinoga Maualuga, i le aso 23 o Mati.

O le alii o Taligalu Ah Siu na ulua’i tu’ua’ia e le malo i moliaga mamafa o le talepe fale i le tulaga muamua, fa’ao’olima i le tulaga lua, inupia ae le’i atoa le 21 tausaga, fa’apea ai ma le fa’atupu vevesi i nofoaga faitele, ae i lalo o se maliliega ma le malo lea foi ua talia e le faamasinoga, ua ia tali ioe ai i le moliaga o le talepe fale i le tulaga lua.

Na fa’ailoa e le na a’afia i leoleo e fa’apea, na fa’ate’ia o ia i luga mai i lana malologa, ina ua tau le ‘monitor’ i lona ulu, ma i lona tepa a’e i luga, na ia va’aia le ua molia, ua toe aga’i atu ia te ia ma se seleulu ma taumafai e tui o ia, peita’i na misi, ma maua ai e lona aiga le avanoa e taofi ai lea ali’i.

O loo taofia pea Ah Siu i le to’ese ina ua le mafai ona ia totogia le $25,000 na fa’atulaga e  tatala ai o ia i tua.

O le tamaitai loia sili lagolago ia Cecilia Reyna na tulai mo le malo i lenei mataupu, ae o le loia fautua mo tagata lautele ia Ruth Risch-Fuatagavi na tulai mo Ah Siu.

FESOASOANI LE ATUNUU I LE TAU SAILIINA O LE AU TALEPE FALE

Na avea le faasalalauga i luga o le nusipepa e uiga i le taui e maua e se tagata na te tu’uina atu ni fa’amatalaga e uiga i ni tagata na talepeina le faleoloa o le Pacific Sales Warehouse, ma itu na tau fai vili atu ai le toatele i le pule o le kamupani, ma tu’uina atu ai i leoleo fa’amatalaga uma lava e uiga i le fa’alavelave sa tupu ma i’u ina molia ai ni alii a’oga se to’afa.

Ua tu’ua’ia e le malo nei ali’i i le moliaga mamafa o le talepe fale i le tulaga muamua, e ui e lei faia se fa’ai’uga a le malo pe ono mafai ona molia i latou o ni tagata matutua.

O oloa na gaoia e i latou nei, na aofia ai pia, sikaleti, pepa telefoni, lavalava ma isi oloa, faapea  ai ma se tinoitupe e $4,000.

I fa’amaumauga a le fa’amasinoga o lo o taua ai e fa’apea, o nisi o oloa na  mafai ona toe maua e leoleo e aofia ai se iPod ma ni speakers, ae o le anoano o oloa na gaoia, e aofia ai ma le tupe e lei toe maua, e masalomia na fa’asoa e i latou na fa’atinoina le solitulafono.

Na ta’ua e le tamaitai loia sili lagolago ia Terri Bullinger, lea o lo o gafa ma le mataupu a fanau talavou i luma o le faamasinoga, o se tasi lenei o solitulafono ua fa’atupulaia lona saoasaoa e a’afia ai fanau aoga ma talavou e laiti i lalo o le tulafono, o le talepe fale ma le gaoi.

Sa ia taua foi e fa’apea, o lo o fa’aauau pea su’esu’ega a leoleo e uiga i lenei mataupu, ma e ono i ai le avanoa e toe molia mai ai nisi fa’asaga i lenei lava mataupu.