Ads by Google Ads by Google

Tala o Faamasinoga

ISALA POLI

O le alii lea o loo tuli sona faasalaga faafalepuipui ina ua tausalaina o ia i le moliaga o lona faia lea o ni uiga mataga i se teineititi e laititi i lalo o le tulafono, ua tuu atu i ai e le  faamasinoga maualuga nisi o teuteuga i poloaiga o lana faanofovaavaaia, ma poloaina ai o ia ina ia ona tuua le teritori ma toe foi atu i Samoa mo le taimi e totoe o lana faanofovaavaaia e 5 tausaga.

O le alii o Isala Poli na faafalepuipui mo le 20 masina ina ua faamaonia e le faamasinoga le moliaga o le faaoolima i le tulaga lua faasaga ia te ia, ona o le faalavelave lea na tulai mai i le kamupani i’a o le StarKist Samoa i le 2008, ina ua ia tu’iina se alii ma manu’a tigaina ai, e aofia ai le pe atoa lea o le tino o lea alii ma ua le toe aoga ai i se galuega a lona aiga.

E lei atoa se 6 masina talu ona magalo mai Poli mai le tuliina o lana faasalaga lea ae toe molia loa o ia i lona taumafai lea e faamalosi se teineititi, ae o le taimi lea o loo faanofovaavaaia ai o ia mo le 5 tausaga, ma faasala ai loa o ia e le faamasinoga i le toese mo le umi e 5 tausaga ina ua ia tali ioe i le moliaga o le faia lea o uiga mataga i se teineititi laititi.

O lana iloiloga lea na faia i le vaiaso na tea nei, o se iloiloga e faamaonia ai pe sa ia soliina tuutuuga o lana faanofovaavaaia mai le faalavelave na tulai mai i le 2008.

Na faamaonia i faamaumauga a le  faamasinoga le  soli e Poli o tuutuuga o lana faanofovaavaaia, lea foi sa faaalia e le ua molia i le faamasinoga, mai tausaga e 6 ao taofia o ia i le falepuipui, e tele se lesona ua ia aoaoina mai ai.

Sa ia talosagaina le faamasinoga mo se avanoa sei toe foi atu ai i lona aiga ma toe mafuta ma lona toaalua ma lana fanau, peitai na saunoa le alii faamasino sili ia Michael Kruse e faapea, o Poli o se tagatanuu mai Samoa, ua tusa ma le 11 tausaga o aumau i Amerika Samoa, ma o le 6 o ia tausaga sa nofo ai o ia i le toese, ma fafaga ai ai o ia e tagata Amerika Samoa.

E lei taliaina e le komiti o le Palola le uluai talosaga e tatala ai Poli i tua, ina ua manino sa ia soli poloaiga o lana faanofovaavaaia, peitai sa faailoa i ai e le faamasinoga, afai loa ae talia e le komiti faafoe o le Palola lana talosaga, ona faataunuuina loa lea o suiga fou i le poloaiga a le faamasinoga mo ia.

AARON WISDOM

O le alii lea o loo tuuaia e le malo i lona umia faasolitulafono mariuana, fana ma pulufana, ina ua maua e sui o le Ofisa o Tiute vaega o ia mea i totonu o se container na aumai i lalo o le igoa o lenei alii mai Amerika, ua faamoemoe e tulai i luma o le faamasinoga maualuga i le taeao nei, lea e pei ona tuuina atu i ai lana mataupu e faaauau ai.

Na faaagafua e le alii o Aarom Wisdom ona aia tatau faaletulafono ma le faataunuuina ai lana uluai iloiloga lea sa fuafua e faataunuu i le aso Faraile na tea nei, ae ua ia manatu e tuu sao atu loa lana mataupu i luma o le faamasinoga e faaauau ai.

O loo tumau pea poloaiga o loo tatala ai o ia i tua, ina ua maea ona ia totogiina le tupe e $20,000 sa faatulaga atu e le faamasinoga.

ELIOTA SIAUMAU SR

O le aso 16 Mati lea ua faatulaga e fofogaina ai le faasalaga a le faamasinoga maualuga faasaga i le susuga Eliota Siaumau Sr, ina ua talia e le faamasinoga se maliliega sa ia sainia ma le malo i le vaiaso na tea nei, lea e pei ona ia tali ioe ai i le moliaga mama o le ave taavale ‘ona, ae solofua e le faamasinoga isi moliaga sa uluai tuuaia ai o ia, lea e aofia ai le moliaga mamafa o le tete’e atu i leoleo, ma le moliaga mama o le ave taavale ‘ona.

I le taliaina ai e le faamasinoga o le maliliega i le va o Eliota ma le malo, ua ia poloaina ai loa e le faamasino sili ia Michael Kruse le ua molia ina ia aua nei ona toe aveina se taavale ao faatalitali ai le aso lea o le a lau ai lona faasalaga.

Ua ia poloaina foi le ofisa faanofovaavaaia ina ia tapena se ripoti e uiga i lenei mataupu.

O le po o le tausaga fou 2010 na tulai mai ai lenei faalavelave e pei ona taua i faamaumauga a le faamasinoga, ina ua taumafai leoleo tuliloa le taavale sa faafoe e le ua molia ao ‘ona o ia.

O le tamaitai loia fautua ia Ruth Risch-Fuatagavi o loo tulai mo le ua molia, ae o Mitzie Folau o loo tulai mo le malo i lenei mataupu.