Ads by Google Ads by Google

Tala o Faamasinoga

MICHAEL LEATIGAGA & JOE LEOTA

O le Aso Gafua na te’a nei na tutulai ai i luma o le Fa’amasinoga Fa’aitumalo ia Joe Leota ma Michael Leatigaga, lea o lo o tu’ua’ia i lo la ave fa’agaoia o ni pusa wahoo mai i le fale teu’oloa a le kamupani i’a, o le StarKist, i le masina o Aokuso 2011.

O Leota ua molia i moliaga e lua o le talepe fale ma le gaoi, ae o Leatigaga ua tu’ua’ia i le gaoi ma lona taliaina o ni oloa sa ave fa’agaoi.

O lo o te’ena e Leota ma Leatigaga o la moliaga, ma ua fa’atulaga ai loa le la uluai iloiloga, e faia i le Aso Faraile o le vaiaso nei.

I fa’amaumauga a le fa’amasinoga o lo o ta’ua ai e fa’apea, i le masina o Aokuso o le tausaga na te’a nei, o lo o tu’uaia ai le ulufale o Leatigaga i le fale teu’oloa a le kamupani i’a, ma ia gaoia mai ni pusa wahoo e silia ma le 200, ona fa’aaoga lea o le ta’avale a Leota e la’u mai ai pusa wahoo nei, ma la faa’tauina atu i nisi o faleoloa i le atunu’u.

Fai mai fa’amaumauga a le malo, e silia ma le 100 pusa wahoo na mafai ona toe maua mai e leoleo.

E $15,000 le tupe ua fa’atulaga e totogi ona fa’ato’a mafai lea ona tatala Leota i tua, ae $10,000 mo Leatigaga.

IOANE TUUMALO

Na te’ena e le alii aoga mai le Aoga Maualuga a Tafuna, ona tu’ua’iga i lona umia o fuala’au fa’asaina, ina ua tula’i i luma o le Fa’amasinoga Maualuga i le taeao ananafi.

O le loia mai le Ofisa Loia Fautua mo tagata lautele o lo o tulai mo Ioane Tu’umalo ma o le aso 29 o Mati lea ua fa’atulaga ai lona ulua’i iloiloga, ae o lo o taofia pea o ia i le to’ese i Tafuna, ina ua na le mafai ona totogia le $10,000 e tatala ai o ia i tua.

Na afua mai moliaga o Tu’umalo, i se fa’alavelave na tula’i mai i totonu o le a’oga i le vaiaso ua tuana’i, lea na maua atu o ia e se sui pule o ula sana sikareti i totonu o le lotoa a le aoga.

Ina ua su’esu’eina Tu’umalo, sa ia fa’ailoa i le sui pule, o lana sikaleti mariuana na maua i totonu o se taga pepa sa i totonu o se potu a’oga.  Na ia fa’ailoa fo’i i leoleo, e fa sikaleti sa i totonu o lea taga pepa, ae tasi na ia ulaina.  O isi sikaleti e tolu, na maua e le sui pule i le taga o le ofu a Tu’umalo, lea na tu’uina atu i leoleo.

O lo o taofia pea i le to’ese i Tafuna le alii o Tuumalo sei vagana ua totogi le $10,000 ona faatoa mafai lea ona tatala o ia i tua.

KARENMARY MELENDEZ

O le tamaitai lea na tausalaina e se vaega iloilo iuga i luma o le Fa’amasinoga Fa’aitumalo, i le moliaga o le fa’ao’olima i le tulaga tolu, ona o le fa’alavelave lea na ia sasaina ai se tama e 86 tausaga i se laupapa, ua poloaina e le faamasinoga na te totogia le salatupe e $500.

E 18 masina lea ua fa’anofova’ava’aia ai e le fa’amasinoga ia Karenmary Melendez, i lalo o ni poloaiga e ao ona ia usita’ia, e aofia ai lona auai i se a’oa’oga e fesoasoani i le tulaga o le ita, fa’atasi ai ma lona totogia o le $150 i le tama na a’afia i lenei mata’upu.

I fa’amaumauga a le fa’amasinoga na ta’ua ai e fa’apea, o le masina o Aperila 2011 na  tulai mai ai lenei faalavelave, ina ua agai atu le tama na aafia e asiasi i lana ma’umaga, ae agai mai ai le ua molia ma faaoolima ia te ia, e ala i lona sasaina lea o ia i le laupapa 2x4.