Ads by Google Ads by Google

Tala o Faamasinoga

JIMMY FIDOW

O le alii lea o lo o tu’ua’ia i lona sasaina o foliga o se isi alii i se fagupia, ua ia teena moliaga faasaga ia te ia ina ua tulai i luma o le faamasinoga maualuga i le vaiaso na tea nei.

O le alii o Jimmy Fidow, lea ua tuuaia nei i le moliaga mamafa o le faaoolima i le tulaga muamua ma le moliaga mama o le faatupu vevesi i nofoaga faitele, ua faatulaga lana ulua’i iloiloga i le aso 21 Fepuari, ma o loo taofia pea o ia i le toese i Tafuna, ina ua le mafai ona ia totogiina le $15,000 sa faatulaga e le faamasinoga e  tatala ai o ia i tua.

I faamaumauga a le faamasinoga o loo taua ai faapea, o se inugapia sa faia na tulai mai ai loa se feeseeseaiga i le va o le ua molia ma le alii na aafia, ma tuuaia ai loa le sasa e le ua molia o foliga o le alii ua aafia i le fagupia, ma gau ai lona isu atoa ai ma manu’a i ona foliga.

Na faanatinati atu le alii na manu’a mo togafitiga i le falemai, ae auina sa’o atu Fidow i le ofisa o leoleo mo suesuega, ma i’u ina taofia ai loa o ia seia oo mai i le taimi nei.

O le alii loia faitua ia Mike White lea o loo tulai mo Fidow i lenei mataupu.

ASOTASI MAIAVA

Na faamaonia e le loia a le malo o Cecilia Reyna i luma o le faamasinoga maualuga i le vaiaso na tea nei, o le fana lea na faaaoga e Asotasi Maiava ina ua latou osofaia ma ni alii talavou se toalua se faleoloa a se tamaloa Asia i Ottoville i le masina o Setema na te’a, o se fana meataalo, ma o loo i lalo nei o le vaavaaiga a le malo lea aupega.

O le aso Faraile nei lea ua faamoemoe e lau ai le faasalaga a Maiava, ina ua toe tolopo mai i le vaiaso na tea nei ona sa malaga lana loia o Leslie Cardin i fafo mo ni aoaoga faaloia.

O Maiava ua tausalaina i le moliaga o le taupulepule lea e faatino le solitulafono o le faomea, lea e mafai ai ona faasala se tasi i le toese mai le 5 e oo atu i le 15 tausaga le umi.

I faamaumauga a le faamasinoga o loo taua ai e faapea, i le tausaga na te’a nei, na osofaia ai e Maiava ma ni alii laiti se toalua le faleoloa na aafia i Ottoville, ma latou fao faamalosi mai ai se tinoitupe, o pepa sikaleti atoa ai ma pepa faitelefoni.

Na faaaoga e i latou nei ofu mafanafana e kava ai o latou tino, atoa ai ma pulou na ufiufi ai o latou foliga ao latou faatinoina lea solitulafono. Fai mai faamaumauga a le faamasinoga, o Maiava sa na ia faalala le fana meataalo i le faatauoloa ma fai i ai e aumai tupe o loo i totonu o le masini, ina ua maea ona faatinoina e i latou nei nei gaioiga, sa latou sosola ese loa, peitai e le’i atoa se 2 itula na sailia ai e leoleo i latou i le po lava lea ae maua loa.

O loo taofia pea Maiava i le toese ina ua le mafai ona ia totogiina le $100,000 sa faatulaga e le faamasinoga e tatala ai o ia i tua.

NATHANIEL ZAPI RODRIGUEZ

O le alii 19 tausaga lea sa ia vaaia se fale e mautotogi ai ni tagata i Malaeimi, ua tuuaia nei e le malo i le moliaga mamafa o le gaoi, ona ona o se faalavelave na tulai mai i le amataga o le masina lenei i Malaeimi lava, lea na ia ulufale faamalosi ai i totonu o le potu moe a se tasi o tagata  o loo mautotogi i le fale, ma ia gaoia ni mea aoga sa i ai i totonu e pei o se iPod, o se tupe ma ni meaai.

O loo tuuaia e le malo le faaaoga e le alii o Nathaniel Zapi Rodriguez o le sipea ki o le potu sa ia te ia e tatala ai le poto ma alu ai i totonu, ma mafua ai loa ona vili e le tagata e ana ia le potu leoleo ma faailoa i ai le mea ua tupu.

Ina ua fesiligia e leoleo le ua molia, sa ia tautino ai e sa’o sa ia alu i totonu o le potu ma gaoi meaai sa i totonu o le potu, peitai na te lei aveeseina se tupe ma le iPod.

O le vaiaso nei lea ua faatulaga e faia ai le uluai iloiloga a le ua molia, ma o loo taofia pea o ia i le toese i Tafuna i le taimi nei, ina ua le mafai ona ia totogiina le $15,000 sa faatulaga e tatala ai o ia i tua.

PELASIO SOOTAGA

Ua talia e le faamasinoga le talosaga na faaulu e le Ofisa Faanofovaavaaia, ina ia toe tolopo le lauina o le faasalaga mo le alii o Pelasio Sootaga i le aso Faraile o le vaiaso nei, ona o nisi o ripoti o loo manaomia le fia faamae’a a’o le’i tuina mai se faasalaga a le faamasinoga.

O Sootaga ua ta’usalaina i le moliaga mamafa o le talepe fale i le tulaga lua, ona o se faalavelave na tulai mai i le masina o Setema o le tausaga na tea nei, lea sa latou talepeina ai ma nisi alii talavou se to’alua le Ofisa o le Aoga  Maualuga a Tafuna.

I faamaumauga a le faamasinoga o loo taua ai, na osofaia e Maiava ma ni alii talavou se toalua le Ofisa o le Aoga Maualuga a Tafuna i le masina o Setema, e ala i lo latou talepeina o le faitoto’a ma ulufale ai i totonu, ae ina ua iloa mai i latou e le leoleopo, na tamomo’e ese ai loa ma sosola.

Ina ua fesiligia e le alii faamasino sili lagolago o Lyle L. Richmond le ua molia i le mafuaaga na o latou osofaia ai le Ofisa a le Aoga na ia taua ai e faapea, na avea le le fiafia o alii talavou ia sa latou toatolu i le Faufautua a le Aoga, i lona faia lea o ni tala faalumaluma ia te i laua a’o tumu tamaiti aoga, ma itu sa la tauanauina ai loa o ia latou te o e faaleaga le faleaoga.