Ads by Google Ads by Google

Tala o Faamasinoga

TU’UA’IA LE SIKULAKI NA MAUA AI MARIUANA

Ua tu’ua’ia se ali’i leoleo (security) a le Pago Plaza i lona umia o ni sikaleti mariuana e 15, ma na taofia mai o ia e leoleo i le po o le Aso Lua na te’a nei, ina ua latou fa’atino se poloa’iga mai i le fa’amasinoga, e sailia le tino ma meatotino a lenei ali’i, ona o masalosaloga i lona umia fa’asolitulafono o fuala’au fa’asaina.

Ina ua fesiligia e leoleo le ua molia, sa ia tautino, o mariuana sa maua ia te ia, o ana mea totino ia.

O lo o taofia pea o ia i le to’ese i Tafuna ma le fa’amoemoe e tulai i luma o le fa’amasinoga fa’aitumalo, i le taeao nei.

TETE’E LE AVE TAXI I TU’UA’IGA A LE MALO

Ua te’ena e le alii ave taxi e 67 tausaga le matua tu’ua’iga a le malo fa’asaga ia te ia, ina ua tulai i luma o le Faamasinoga Maualuga i le vaiaso nei, ma ua fa’atulaga ai lana uluai iloiloga mo le masina fou, lea o le a fa’ailoa ai e lana loia, pe ua i ai se maliliega ua faia ma le malo, po o le tu’uina atu foi o lenei mataupu e fa’ataunuu sona fa’amasinoga autu.

O le alii o Siulepa Auelua lea o lo o fa’amatalaina i fa’amaumauga a le Faamasinoga o se ave taxi, o lo o tu’ua’ia i le faia o ni uiga mataga i se teineititi e 16 tausaga le matua i totonu o se tama’i fale, i le togavao lea e fa’afesaga’i ma le nofoaga o lo o i ai le Falepuipui o Tamaiti i Tafuna.

E $35,000 ua fa’atulaga e le fa’amasinoga e tatala ai Auelua, ae ona ua le mafai ona ia totogia lea tupe, o lo o taofia ai pea o ia i le to’ese.

FA’ANOFOVA’AVA’AIA LE LOIA A LE LBJ

Ua fa’amalumalu le tu’uina atu e le Fa’amasinoga Fa’aitumalo o le alii loia a le LBJ i le to’ese mo le 45 aso, ae ua fa’anofova’ava’aia o ia mo le 7 masina i lalo o poloaiga e ao ona ia usita’i i ai.

Na ta’usalaina e le faamasinoga le alii o Kevin Kornegay i le moliaga o le ave ta’avale ‘ona i lalo o se maliliega sa ia sainia ma le malo, lea na ia te’ena ai ona moliaga.

O tu’ua’iga fa’asaga ia Kornegay, lea foi sa galue muamua i le Ofisa o le Loia Sili, na afua mai i le fa’alavelave lea na tulai mai i Iliili i le masina na te’a nei, ina ua na so’aina se pou moli.

Ua mae’a ona se’i le laisene aveta’avale a le ua molia mo le fitu masina, ma ua fa’atonu o ia e auai i ni a’oa’oga e fesoasoani i a’afia o le ‘ava malosi.

E $1,000 le salatupe na manatu le fa’amasinoga e fa’asala ai o ia, peitai ua fa’amalumalu lona totogia o le $810, ae ua poloaina o ia na te totogia na o le $190.

TAUNUU OFISA LOIA SILI RIPOTI I LE FA’ALEAGAINA FALEAOGA PAGO PAGO

Ua fa’amaonia e le loia o lo o tula’i mo ni tamaiti a’oga se to’alima, lona umia o le ripoti a leoleo e tusa ai ma lenei mata’upu.  O lo o molia nei tamaiti i lo latou fa’aleaga o se vaega o le A’oga Tulaga Muamua i Pago Pago, na aofia potu a’oga, tusi a’oga, mea a’oga ma le ave o ni pusa susu ma fa’apapa i luga o le auala, i le masina na te’a nei.

Na taua e Terri Bullinger e fa’apea, e to’aiva fanau a’oga o lo o a’afia i lenei mata’upu e ui e na o le to’alima lea ua faasala e le afio’aga o Pago Pago.

O lo o iloilo e le ofisa o le loia sili le mataupu i le taimi nei ma le fa’amoemoe, o se taimi o le vaiaso nei latou te failaina ai lenei mataupu i luma o le fa’amasinoga.

O le taimi nei, o lo o fa’aauau foi isi su’esu’ega a leoleo i se tasi foi fa’alavelave lea na talepe ma osofa’ia ai e ni tagata se fale o se aiga i totonu lava o Pago Pago, i le Aso Tofi o le vaiaso na te’a nei.

E to’afa ni fanau laiti na ave e leoleo ma fesiligia i lea osofaiga, ma e o’o mai i le taimi nei e le’i taunu’u se ripoti o lea suesuega i le Ofisa o le Loia Sili, peitai na fa’amaonia mai e le Vaega Suesue a Leoleo le fa’aauau pea o su’esu’ega i lea mat’aupu, ae o lo o i ai se talitonuga, o lo o aofia ai fo’i i lenei mata’upu ia ni ali’i se to’alua, o lo o a’afia fo’i i le osofa’iga o le falea’oga a Pago Pago.