Ads by Google Ads by Google

Tala o Faamasinoga

BRIAN THOMPSON

O le alii lea na ta’usalaina e le Faamasinoga Maualuga i le moliaga mama o le faaoolima i le tulaga tolu, ona o le faalavelave lea na tulai mai i lona fale i le tausaga na tea nei, lea na ia tagofia ai itutinosa o le niece a lona toalua, ua faanofovaavaaia e le faamasinoga mo le 2 tausaga i lalo o tuutuuga e ao ona ia usita’i i ai.

O le susuga Brian Thompson na ulua’i tuuaia i le moliaga mamafa o lona tagofia lea o itutinosa o se teineititi i le tulaga muamua, o se solitulafono e mafai ona faasala ai se tasi i le toese mo le umi e le silia i le 7 tausaga, pe faasala i le salatupe e le silia i le $5,000 poo le faasala foi i faasalaga uma ia e lua, ae i lalo o se maliliega sa ia sainia ma le malo lea foi na talia e le faamasinoga, na ia ioeina ai le moliaga na toe suia e le malo, o le faaoolima i le tulaga tolu, lea e mafai ona faasala ai se tasi i le toese mo le 15 aso, poo le salatupe e $300, ia poo le faasala foi i faasalaga uma nei e lua.

I faamaumauga a le faamasinoga o loo taua ai e faapea, o se pati sa faia i le fale o Thompson i le tausaga na te’a, na tulai mai ai lenei solitulafono ina ua ia tagofia le itutinosa o le tamaitai na aafia a’o moe.

Na taua e Sunia lona lagolagoina o le faafinauga a le Ofisa Faanofovaavaaia, i le agavaa lea o Thompson ona faanofovaavaaia nai lo le tuuina atu i le falepuipui. Fai mai Sunia, o le ua molia o se tasi o loo tele sana fesoasoani mo le atunuu, e le gata o se faiaoga ae o ia foi o se tama tausi aiga.

Na taua foi e Sunia le salamo moni o le ua molia mai le solitulafono sa faia, peitai i le faafinaugaa le malo na taua ai e Folau e faapea, e ui na te faafetaia le ripoti mae’ae’a lelei a le Ofisa Faanofovaavaaia, peitai i lona talitonuga e foliga mai e tasi lava le itu o loo aumaia e le ripoti.

Na valaau e Folau le tina o le tamaitai na aafia e molimau i aafiaga na oo ai lona aiga ona o le mea sa faia e le ua molia i lana tama. Na taua e le tina, o le ua molia o se tasi o totino o le aiga.

Na faaiu le molimau a le tina i lona talosagaina lea o le faamasinoga ina ia faasala Thompson i le faasalaga pito maualuga o loo faatulaga mai e le tulafono.

O le isi poloaiga o le faanofovaavaaia a le ua molia e aofia ai lona totogiina o le salatupe e $300 i totonu o aso e 10. Ua faasa foi ona ia toe tagofia le ava malosi pe soli se isi tulafono, ua faasa foi ona ia toe taumafai e faafesootai le na aafia poo lona aiga i soo se auala.

O le afioga i le faamasino sili lagolago ia Lyl L. Richmond na faatautaia le iloiloga a Thompson, i le lagolagosua a le afioga i le alii faamasino lagolago ia Mamea Sala Jr.

O le tamaitai loia sili lagolago ia Folau J. Mitzie na tulai mo le malo, ae o le susuga ia Fiti Sunia na tulai mo le ua mol ia.

FAATULAGA ILOILOGA FAAPITOA  MATAUPU A NI ALII SE TOATOLU

O alii e toatolu ia o loo tuuaia i le moliaga mamafa o le fasioti tagata i le tulaga lua, ona o le faalavelave lea na maliu ai le alii o Sio Faumui i Malaeimi i le masina o Iuni na tea nei, ua faatulaga sa latou iloiloga faapitoa i luma o le faamasinoga maualuga i le vaiaso nei.

O lea iloiloga ua faatulaga ina ia manino ai loia ma le faamasinoga, poo fea tonu lea ua taoto ai lenei mataupu. O i latou e toatolu o loo tuuaia i lenei mataupu e aofia ai Sefo Siaulaiga, Migo Misa ma Nemaia Poamo, lea na faatulaga o le vaiaso na tea nei na fuafua e faia ai la latou faamasinoga autu, peitai o lea ua toe tolopo seia maea le iloiloga faapitoa i le aso Faraile nei.

I faamaumauga a le faamasinoga o loo taua ai e faapea, na faaaoga e Siaulaiga ma Poamo o la lima e ta tu’i ai foliga o Faumui pe tusa ma le 20 tu’i, mulimuli ane ona sau lea o Misa ma le atigi fagupia ma ta ai ona foliga, ma avea ai tulaga tuaga i manu’a sa oo i lenei alii ma itu na maliu ai o ia.

O loo taofia pea i le toese i latou nei e toatolu ina ua le mafai ona o latou totogiina le tai 100,000 sa faatulaga e tatala ai i latou i tua ma le toese.