MAUA MARIUANA I SE OSOFAIGA A LEOLEO

E i ai le avanoa e ono faila ai e le malo moliaga o le umia fa’asolitulafono o vaega o fuala’au fa’asaina, e fa’asaga i se alii na taofia ma tu’ua’ia i le ave ta’avale ‘ona i le fa’ai’uga o le vaiaso, ina ua osofaia e leoleo lona fale i Fagaima i le amataga o le vaiaso nei.

O lea alii na taofia i le toese i Tafuna talu mai le fa’ai’uga o le vaiaso, ma na toe tatala i le taeao ananafi ina ua ia te’ena tu’ua’iga fa’asaga ia te ia, peitai ina ua tatala o ia mai le fale faamasino, na toe auina atu ai o ia i leoleo mo le faia i ai o isi suesuega, ona o fuala’au fa’asaina o lo o tu’ua’ia sa maua i lona fale.

O se poloaiga mai le faamasinoga na faavae ai le osofaiga a leoleo i le taeao o le aso Gafua na tea nei i le fale o lenei alii i Fagaima, ma maua i ai ni lau mariuana, o mea e faaaoga e i latou e tagofia fualaau faasaina, ma se tinoitupe e tusa ma le $1,000.

TOALUA FANAU LAITI TUUAIA GAOI MA LE TALEPE FALE

E toalua ni fanau talavou na taofia e leoleo i le fa’aiuga o le vaiaso na te’a nei, ma tutulai ai i luma o le Fa’amasinoga Fa’aitumalo i le taeao ananafi, ona o tuuaiga i lo la osofa’ia o se fale i Futiga i le Aso Faraile na tea nei.

I fa’amaumauga a le fa’amasinoga na taua ai, o se tasi o le toalua lea na maua e le tagata e ana ia le fale ma fa’afeso’otai ai loa leoleo, ae o le isi na alu i le atoa, peitai mulimuli ane na mafai ona maua ina ua momoli atu e ona matua o ia i le ofisa o leoleo, ma taofia ai loa i laua i le toese.

E tai 14 tausaga o i laua ia, ma ua tuuaia nei i moliaga mamafa o le gaoi ma le talepe fale, lea foi sa la teena ina ua tutulai i luma o le faamasinoga faaitumalo i le taeao ananafi.

I lo la teena ai o tuuaiga a le malo faasaga ia te i laua, ua faatulaga ai loa le isi a laua iloiloga, ao tatala ai i laua i lalo o le vaavaaiga a laua matua i lalo o poloaiga mai le faamasinoga.

O nisi o ia poloaiga e aofia ai le faasa lea ona la toe oo i le fale o le aiga lea ua tuuaia i laua na la osofaia, faasa ona la toe soliina ni tulafono, atoa ai ma le faasa lea ona la tuua le fale mai le 6 i le afiafi e oo atu i le 6 i le taeao, sei vagana ua latou malaga ma nisi o laua matua.

E ese mai ai i le faalavelave lea, e toatolu foi isi tamaiti na fesiligia e leoleo i le faaiuga o le vaiaso na tea nei, ona o tuuaiga i lo latou talepeina lea o se fale i Pago Pago i le aso Tofi na tea nei ma ave faagaoi ai nisi o meaaoga mai totonu o le fale.

O loo faaauau pea suesuega a leoleo e tusa ai o lea faalavelave, ae na pau le tulaga na mafai ona faamaonia mai, e silia i le toa 5 tamaiti na fesiligia e leoleo e uiga i lenei mataupu, ae i ai le avanoa e ono tuuaia ai na o le toatolu o i latou nei.

O se tasi o le toatolu lea e pei ona taua e leoleo, o loo aofia i suesuega o le mataupu i le faalavelave lea na talepe ai e nisi le faleaoga o le aoga tulaga muamua a Pago Pago i le masina na tea nei.

Na taua e le tamaiti loia o loo gafa ma le taulimaina o mataupu a fanau laiti o Terri Bullinger, le faatupulaia o mataupu faasaga i fanau laiti e aafia i solitulafono tau talepe fale ma le gaoi, ma o loo galulue faatasi pea le malo, faamasinoga ma nisi o ofisa o le malo i le ofoina atu lea o polokalame, e fesoasoani ai i fanau talavou nei.

Sa ia taua foi, o nisi o i latou e le o le taimi muamua lea ua tuuaia ai i ni solitulafono.

TUUAIA NI TAMA MATUTUA FAIA O UIGA MATAGA I FANAU LAITI

E toalua ni tama matutua e 67 tausaga le matua o le isi ae 64 le isi ua tuuaia e le malo i lo la faia lea o ni uiga mataga i ni tamaitai e laiti i lalo o le tulafono.

O moliaga o loo tuuaia ai i laua nei e aofia ai le faiaiga faamalosi, faia o uiga mataga, faia o ni uiga faasotoma atoa ai ma le faia o ni gaioiga e ono lamatia ai le saogalemu o tamaitai na aafia.

O se tasi o i laua ia e aiga i le tamaitai na aafia e pei ona taua i faamaumauga a le malo, ma o nei solitulafono na tulai mai i le tausaga na tea nei.

O loo taofia pea i laua nei i le toese i Tafuna e faatali ai le isi a la iloiloga lea ua faatulaga e faia i le aso Faraile o le vaiaso nei.

E $35,000 ua faatulaga e tatala ai i tua le 67 tausaga, ae o le 64 tausaga e leai se tupe ua faatulaga e tatala ai o ia i tua.