ANDRES VILLAR

Na fa’amaonia e le ali’i 21 tausaga na tu’ua’ia e le malo i lona osofa’ia o le falema’i i Tafuna ma gaoia ni ta’avale se lua, lona faia o ia tulaga.

E lua moliaga mamafa o le gaoi lea ua tali ioe i ai le alii o Andres Villar i lalo o se maliliega sa ia sainia ma le malo, lea foi ua talia a le fa’amasinoga, ae solofua ai e le malo isi moliaga e lua e aofia ai le talepe fale  i le tulaga lua ma le fa’aleaga meatotino i le tulaga tolu.

Na taua e Villar e fa’apea, o lona ita tele i lona tama o lo o i fafo, na mafua ai ona ia alu ma osofa’ia le falemai. Ua malie Villar o le ia toe totogia i le malo mo vaega o taavale atoa ai ma isi meatotino sa ia fa’aleagaina.

Ua malilie loia o le a tu’uina atu ni a la’ua fa’afinauga i le fa’amasinoga mo se fa’asalaga mama mo le ua molia, peitai ua malamalama le ua molia, tusa lava pe finau loia i le faamasinoga mo se faasalaga mama mo ia, e pule le faamasinoga pe talia pe teena ia faafinauga.

O lo o taofia pea i le to’ese i Tafuna ia Villar e fa’atali ai le aso 16 o Mati, lea ua fa’atulaga e lau ai lona fa’asalaga.

O alii faamasino lagolago ia Logoai Siaki ma Faamausili Faasua Pomele na lagolago i le faamasino sili ia Michael Kruse i le iloiloina o lenei mataupu.

KOSEMA LEAFI

O le alii lea na tu’uaia e le malo i lona umia fa’asolitulafono o mariuana, ina ua maua i ai e leoleo se sikaleti mariuana se tasi, i le aso 21 Tesema o le tausaga na tea nei, sa ia fa’amaonia  i luma o le fa’amasinoga maualuga i le vaiaso na tea nei, tu’ua’iga fa’asaga ia te ia.

O le aso 23 o Mati ua fuafua e lau ai le fa’asalaga a Kosema Leafi.

O lo o taofia pea o ia i le to’ese, ina ua le mafai ona ia totogia le $5,000 sa faatulaga e le faamasinoga.  Ua fa’atonuina o ia e le fa’amasinoga, afai e mafai ona ia totogia se $500 i le faamasinoga, tu’u atu lana tusi folau e taofi e le faamasinoga, atoa ai ma se tusi mai lana sponsor po o se tagatanu’u matua o Amerika Samoa e fa’amaonia mai ai lona auai atu i le taimi e lau ai lona fa’asalaga, ona mafai loa lea ona tatala o ia i tua e faatalitali ai le taimi e lau ai lona faasalaga.

Ae faalagolago le tatalaina o ia i tua mai le toese, pe afai e pasi lana suega lea o le a faia e faamaonia ai, na te lei toe faaaogaina ni vaega o fualaau faasaina talu mai le taimi na taofia ai o ia e leoleo.

Saunoa le alii faamasino sili ia Michael Kruse, o le atugaluga o le faamasinoga o loo i ai i lenei mataupu, e na o le tasi le sikaleti mariuana sa maua ia Kosena a’o lea o le a tele aso e tausi ma fafaga ai o ia e le malo ao taofia ai i le toese.

O alii faamasino lagolago ia Logoai Siaki ma Faamausili Faasua Pomele na lagolago i le faamasino sili i le iloiloina o lenei mataupu.

FALEPUIPUI SE ALII 13 TAUSAGA

O le alii talavou e 13 tausaga lea na ia osofaia ni faleoloa se lua i le tausaga na te’a nei, a’o faanofovaavaaia o ia i lalo o poloaiga mai le faamasinoga, ua faasala e le faamasinoga faaitumalo i le Falepuipui o Tamaiti i Tafuna mo le umi e lua tausaga.

O le mataupu faasaga i le alii talavou lenei na faatoa alia’e ina ua maua o ia i le talepeina o le faleoloa o le Union World i Tafuna i le masina o Oketopa, ma mafua ai loa ona aga’i i ai suesuega i le tagata sa ia osofaia ma talepe le faleoloao le Gold Conda i Fagaalu i le masina o Aokuso o le tausaga lava na tea nei.

Ina ua fesiligia o ia e leoleo, sa ia ioeina ai lona osofaia o faleoloa ia e lua.

Na taua e le loia sili lagolago o loo gafa ma mataupu a tamaiti o Terri Bullinger, e ui i le faatupulaia o solitulafono e aafia ai fanau laiti, peitai o loo taumafai lava le malo e galulue faatasi ma le faamasinoga ma nisi o Matagaluega a le malo, i ni auala e mafai ai ona fesoasoani atu i olaga o talavou nei, ina ia mafai ona suia uiga le lelei o loo aafia ai, ae ave la latou faamuamua i le aoga ina ia mafai ai ona maua se lumanai manuia mo i latou.