O le aso  19 Ianuari 2012 lea ua faatulaga e toe fofogaina ai le mataupu a le alii o Melota Faalemiga, ona o tuuaiga faasaga ia te ia e aofia ai le moliaga mamafa o lona faafoeina lea o se taavale a’o se’i lona laisene, atoa ai ma le isi moliaga mama o le ave taavale ‘ona.

I faamaumauga a le faamasinoga o loo taua ai, o le aso 26 Novema na taofia ai e leoleo le ua molia ma tuuaia ai loa i moliaga e pei ona taua.

O loo teena e Faalemiga tuuaiga a le malo faasaga ia te ia, ma ua faatulaga ai loa le isi ana iloiloga e faia lea i le masina fou.

O le faalua ai lea ona tuuaia e le malo Faalemiga i le solitulafono o le ave taavale a’o se’i lona laisene.

O loo tumau pea poloaiga o loo tatala ai le ua molia i tua e faatali ai le aso lea ua faatulaga e toe tulai ai i luma o le faamasinoga faaitumalo.

O le alii loia o Fiti Sunia o loo tulai mo le ua molia.

FU YUNG LIN

O le alii ave taavale lea na ia faafoeina le taavale lea na mafua ai ona tulai mai se faalavelave tau taavale, i luma tonu o le nofoaga o loo i ai afi eletise a le ASPA i Satala, i le po o le aso  28 Novema, ua molia o ia e le malo i le moliaga mamafa o le ave taavale ‘ona ua mafua ai ona oo ni manu’a ia te ia, atoa ai ma le moliaga mamafa o le ave taavale faatautala.

Na teena Fu Yung Lin moliaga faasaga ia te ia, tauala atu i lana loia o Marshall Ashley, ma ua faatulaga ai loa e le faamasinoga le aso 19 Ianuari 2012 e faataunuu ai lana uluai iloiloga mo lenei mataupu.

O loo tumau pea poloaiga a le faamasinoga o loo tatala ai Lin i tua, e faatali ai le aso lea ua faatulaga e toe fofogaina ai lana mataupu i luma o le faamasinoga faaitumalo.

RAYMOND NOA

O le taeao nei lea ua faatulaga e fofogaina ai le talosaga lea na faaulu e le ali’i leoleo o Lt. Raymond Noa i le Faamasinoga Maualuga, e talosagaina ai le toe faia o sona faamasinoga iloilo fou, ina ua maea lana faamasinoga iloilo lea na faataunuuina i le masina o Aokuso, ma tausalaina ai o ia e se vaega iloilo iuga, i le moliaga mamafa o le faaoolima i le tulaga lua, ma moliaga mama  e lua o le faaleaga meatotino i le tulaga lua ma le faatupu vevesi i nofoaga faitele.

O le masina o Oketopa na faasala ai e le faamasinoga maualuga Noa i le umi e 5 tausaga, ma le fautuaga sa tuuina atu i ai, e mafai ona ia apiliina le faaiuga a le faamasinoga.

O le taeao nei la lea ua faatulaga e fofogaina ai le talosaga a Noa lea na faila e lana loia o David Vargas, mo le toe faataunuuina lea o se isi ona faamasinoga fou.

O moliaga ua tausalaina ai Noa, na afua mai i se faalavelave na tulai i le po o le aso 8 Oketopa o le tausaga na tea nei i Nuuuli, lea na faaoolima ai Noa ia Arthur Blake ma manu’a tigaina ai lona ulu.