O le tama fai (stepfather) lea o lo o tu’ua’ia i lona faia o ni uiga mataga i lona afafine fai i le tausaga na tea nei...

ua faailoa e lana loia i le Faamasinoga Maualuga lona sauni e tali ioe i nisi o ia moliaga, e ala i se maliliega lea ua maea ona faia ma le malo.

Toe pau lava le mea o lo o totoe, o le saini a le tamaitai loia sili lagolago ia Mitzie Folau, lea o lo o tulai mo le malo i lenei mataupu, lea ua faamoemoe e toe foi mai i le atunuu i le vaiaso nei.

E 4 moliaga mamafa  o lo o tuuaia ai e le malo le tama lenei e 49 tausaga le matua, ina ua maua atu e le tuagane o le teineititi o lo o aafia, o lo o ia faamalosia maia lona tuafafine.

Na faailoa e le loia a lenei alii, o Ruth Risch-Fuatagavi, i le fa’amasinoga i le aso ananafi, ua sauni le ua molia e tali ioe i le moliaga e tasi, ma afai ae  talia e le faamasinoga, ua sauni le malo e talosaga i le faamasinoga ina ia solofua isi moliaga e tolu.

O lo o taofia pea le ua molia i le toese e aunoa ma se tupe na faatulaga e tatala ai o ia i tua, ona o tulaga faaletonu i ona pepa nofomau, ma ua faamoemoe o le Aso Gafua o le vaiaso fou e toe tulai ai o ia i luma o le faamasinoga mo le toe fofogaina o lana mataupu.

APERAAMO LEVI

Ua talosagaina e Apera’amo Levi, lea o lo o loka ina ua ta’usala i moliaga o le gaoi, ia le fa’amasinoga, ina ia tatala o ia e alu e faigaluega, ina ia maua ai se tupe e amata totogi ai le sala tupe ua poloa’ia o ia e le fa’amasinoga, e toe totogi i le na a’afia i lenei mata’upu.

Na faailoa e le loia a Levi o Leslie Gardin, i le faamasinoga, o lo o fa’amoemoe le ua molia e maua sona avanoa faigaluega i le faleoloa o le KS Mart i Tafuna, peitai o le fa’afitauli o lo o tula’i mai, e i ai pepa a le ua molia o lo o fia tu’uina atu i le faleoloa, ina ia fa’amaonia ai lana galuega, peitai o lo o taofia e le malo ia pepa, ma e mana’omia se avanoa e fa’amatu’u mai ai e le malo pepa nei, ina ia mafai ai ona fesoasoani i le talosaga a Levi.

Ua galulue nei loia mo le tuuina atu o pepa  o lo o manaomia mo le talosaga a Levi, ma ua fa’amoemoe e toe vala’auina lenei mata’upu pe a mae’a lea tulaga.

I le aso na tu’uina atu ai le fa’asalaga a le fa’amasinoga mo Levi na te tulia ai le umi e 28 masina i le toese, sa poloaina ai le mafai ona ia talosaga mo se avanoa e alu ai i tua e faigaluega, pe afai e maea ona ia tuli le uluai masina e 6 o lana faasalaga.

FELETI NIUE

E lua vaiaso lea ua toe tolopo i ai le uluai iloiloga o le mata’upu a le alii o Feleti Niue, ina ua talia e le faamasinoga se talosaga sa tu’uina atu e lana loia i le aso ananafi, mo se avanoa e toe tolopo ai lenei mata’upu, ae sei fa’aauau su’esu’ega e tusa ai o le mafua’aga ua ala ai ona toe taofia Niue i le to’ese i Tafuna.

O Niue na toe taofia mai i le masina na te’a nei i lalo o se tusi saisai mai le Faamasinoga Maualuga, ina ua le auai o ia i le isi ana iloiloga sa vala’auina i le masina o Oketopa na te’a nei, e iloilo ai po o ia usita’ia poloaiga uma o lana fa’anofova’ava’aia.

Na taua e le tamaitai loia o Leslie Gardin o loo tulai mo Niue i le faamasinoga, e i ai faamatalaga faaopoopo o loo manaomia mai ia Niue, e fia tuuina atu i luma o le faamasinoga.

O le aso 19 o Tesema lea ua toe tolopo i ai le uluai iloiloga o le mataupu a le alii o Niue, ma o le taofia pea o ia i le toese e aunoa ma se tupe ua faatulaga e tatala ai o ia i tua.

Afai ae fa’amaonia e le faamasinoga maualuga, ua soli e Niue nisi o ana poloaiga sa tuuina atu mo lana faanofovaavaaia, e ono faia se faaiuga a le faamasinoga e faaleaoga ai le avanoa na faanofovaavaaia ai le ua molia, e aofia ai ma le faaleaogaina lea o lana faasalaga faafalepuipui e lima tausaga lea o loo faamalumalu, ina ua tausala o ia e le faamasinoga i le moliaga o lona fesoasoani lea i lona tama i le umiaina lea o vaega o le laau faasaina o le mariuana.