IOE WAYNE MOTU I LONA MOLIAGA

O le aso 25 Oketopa lea ua faamoemoe e lau ai le faasalaga o Wayne Motu, i le maea ai ona talia e le faamasinoga o lana ioega i le moliaga mamafa o le tete’e i leoleo a’o taumafai e pu’e faapagota o ia, i lalo o se maliliega sa latou sainia ma le malo ma ua talia foi e le faamasinoga.

Na talosaga le malo ina ia solofua isi moliaga o Motu.  Ua ta’utino ai nei Motu, o le aso 21 o Aokuso na taumafai e sola ese mai i leoleo, ma faia ai se latou tuliga taavale i luga o le alatele.

Na tautino Motu e faapea, o lea tuliga ma leoleo na ono lamatia ai ola o tagata lautele, ina ua ia tipi taavale sa i luma o lana taavale, atoa ai ma lona tau so’aina o tagata sa kolosi i laina kolosi o le alatele.

Na ioe foi Motu e faapea, sa ia iloa lelei lava le taumafai o leoleo e taofi lana taavale, peitai sa atili ai le alu saoasaoa o lana taavale ma fetoai ai ma se pupu fa’i.

O le po na tupu ai le faalavelave na toe alu ai Motu ma faailoa o ia i leoleo ma fai i ai, na mafua ona sola ese ona ua fefe. Sa ia faailoa i leoleo e faapea, o le taavale sa ia aveina ua uma le taimi na tatau ai ona fealuai i luga o le auala, ae o le laisene sa faapipii ai o le laisene mai le isi taavale.

FAATULAGA FAAMASINOGA AUTU O MATAGI SAVAI’I

O se tina mai Vaitogi lea o lo o tuuaia e le malo i se faalavelave na osofa’i ai e sana ta’ifau se teineititi ma manu’a ai, ua faatulaga lona faamasinoga autu mo le aso 2 o Aperila o le tausaga fou 2013.

O lo o molia Savaii i le moliaga mamafa o le i ai o sana ta’ifau feai, o lea moliaga e mafai ona faasala ai se tasi i le toese mo le 5 tausaga, po o le salatupe e $5,000 pe afai ae faamaonia e le faamasinoga.

O le vaiaso na tea nei na faatulaga e faia ai le uluai iloiloga o lenei mataupu, peitai na faailoa e le loia a Matagi Savai’i o Michael White i le faamasinoga maualuga, ua manao le ua molia e tuu atu lana mataupu e faamasino i luma o tagatanuu.

O le aso 30 Iuni na tulai mai ai le faalavelave ina ua osofa’i e le ta’ifau a le ua molia e igoa ia Bruno le teineititi ma aafia, ma manu’a ai ona foliga ma ona vae.

E ui o lo o tete’e le ua molia e le o sana ta’ifau lea na osofaia le teineititi na aafia, peitai fai mai leoleo, o lo o i ai molimau sa latou faamaonia atu o Bruno o le ta’ifau a le ua molia.

O le afioga i le alii faamasino sili lagolago ia Lyle L. Richmond o loo taulimaina lenei mataupu, i le lagolagosua a afioga i alii faamasino lagolago o Mamea ma Muasau.