TOE LOKA INA UA LE USITA’I I POLOAIGA A LE FA’AMASINOGA

Ua toe taofia i le to’ese i Tafuna i le vaiaso na te’a nei, le tina talavou lea na gaoia se tupe mai se alii papalagi sa la fetaui i le falema’i, ina ua le o’o atu i luma o le fa’amasinoga e tusa ai o sana iloiloga sa fa’atulaga i le vaiaso na te’a nei.

O le tina talavou ia Kilisitina Seigafo na tatala i tua e le fa’amasinoga i le fa’ai’uga o le tausaga na te’a nei, ina ua faia se maliliega i le va o ia ma le malo e fa’apea, afai o le a ia toe totogia le tupe a le tamaloa sa ia gaoia, o le a solofua e le malo le moliaga o le gaoi fa’asaga ia te ia.

Ina ua talia e le fa’amasinoga le maliliega na sainia e le ua molia ma le malo, sa toe tatala i tua o ia mai le falepuipui ma le tu’utu’uga, o le a toe o’o atu i luma o le fa’amasinoga i le fa’ai’uga o le masina o Fepuari na te’a nei, mo le toe iloiloina o lana mataupu, e aofia ai ma le toe fesiligia o le tupe sa ia gaoia pe ua toe totogi.

Na fiu le faamasinoga e vala’au le igoa o Seigafo, i le vaiaso i ona tua atu, o lea na sainia ai loa e le alii faamasino sili lagolago ia Lyle L. Richmond se poloaiga e saili mai ai o ia.

Ina ua toe tula’i Seigafo i luma o le fa’amasinoga, na fesili le ali’i fa’amasino o Richmond i lana loia o Ruth Risch-Fuatagavi, pe i ai se mafua’aga talafeagai na mafua ai ona le o’o atu Seigafo i le taimi na vala’au ai lana mataupu, na tali le tamaitai loia, e leai.

O lea na fa’atonuina ai loa e le fa’amasinoga le toe loka o Seigafo, se’i vagana ua mae’a ona totogi le tupe sa ia gaoia.

O le moliaga o le gaoi o lo o tu’ua’ia ai Seigafo, na afua mai ina ua ia fa’aaoga le pepa tala tupe (ATM card) a le tamaloa na a’afia ma ia tala mai ai le $260. E le o ma’oti mai i fa’amaumauga a le fa’amasinoga, pe na fa’apefea ona iloa e Seigafo le numera e mafai ai ona tala le tupe mai le card a le tamaloa papalagi.

Fai mai le malo, o le tamaloa lea na fetaui ma Seigafo i le falemai i Fagaalu, ma la aga’i atu ai i le Maliu Mai ma inu ai ni a la pia mo sina taimi, ma toe agai atu ai le tamaloa e momoli Seigafo i Nuuuli, peitai e le’i o’o le la ta’avale i Nuuuli, o i’ina na iloa ai e le tamaloa ua leiloa lana ato tupe sa i le taga o lona ofu.

Na tu’u e le tamaloa ia Seigafo i Nuuuli ae toe agai atu i le Maliu Mai e su’e lana ato tupe, peitai sa fa’ailoa atu i ai e se tasi o tagata faigaluega lona va’aia o Seigafo o ia pikiina i luga le ato i le taimi na pa’u mai ai i le taga o lona ofu.

SOPI SENIO

Ua talia e le Fa’amasinoga Maualuga se talosaga na fa’aulu e le loia fautua o lo o tulai mo Sopi Senio, i se avanoa e toe tolopo ai le iloiloga sa fa’atulaga i le vaiaso na te’a nei, ona o nisi o gaioiga a loia o lo o mana’omia le faamae’a lelei, ao lei tu’uina atu lenei mataupu i lona fa’ai’uga.

Na ta’ua e le loia a Senio o Mike White e fa’apea, e tele molimau o lo o mana’omia na te fesiligia e tusa ai o le fa’alavelave na tulai mai i le aso 3 o Tesema 2011, lea ua mafua ai ona tu’ua’ia Senio i le fa’ao’olima i le tulaga muamua, fa’aleaga meatotino ma le fa’atupu vevesi i nofoaga faitele.

I lea fa’alavelave, o lo o tu’ua’ia, na so’aina ai e Senio ia se ali’i, i lana ta’avale.  O lo o tete’e Senio i tu’ua’iga a le malo, ma o lo o tumau pea tu’utu’uga o lo o tatala ai o ia i tua, ina ua ia totogi le $25,000 sa fa’atulaga e le fa’amasinoga.

O se tasi o poloaiga o lo o tatala ai o ia i tua, e aofia ai le fa’asa ona ia taumafai e fa’afeso’otai le na a’afia i lenei mataupu po o lona aiga foi.

MOLIA NI ALII AOGA I LE FA’AO’OLIMA

E to’alua ni alii mai le Aoga Maualuga a Tafuna na tutulai i luma o le Faamasinoga Faaitumalo i le vaiaso na te’a nei, ona o tu’uaiga i le fa’ao’olima i se alii mai le Aoga Maualuga a Samoana.

Na te’ena e i laua nei tu’ua’iga fa’asaga ia te i laua ina ua la tutulai i luma o le faamasinoga, ma ua toe taofia nei i laua i le to’ese i Tafuna, e fa’atalitali ai le isi a la iloiloga lea ua fa’atulaga e faia i le vaiaso nei.

Na a’afia nei ali’i i se fa’alavelave na tula’i mai i Nu’uuli i le vaiaso na te’a nei, ma ina ua la fasia seisi ali’i talavou.  Ma na maua e le na a’afia ia le avanoa e sola ese ai ma sulufa’i atu i se a’iga na lata ifo, ma fa’afeso’ota’i ai e lea aiga le ofisa a leoleo.